ពលរដ្ឋខ្មែរនៅអូស្ត្រាលី កាណាដា និងបារាំងផ្តើមធ្វើបាតុកម្មទាមទារដោះលែងលោកកឹម សុខា នៅថ្ងៃនេះ
នៅរសៀលនេះ ប្រជាពលរដ្ឋខ្មែរនៅក្នុងប្រទេសអូស្ត្រាលីដែលគាំទ្រគណបក្សសង្គ្រោះជាតិចាប់ផ្តើមជួបជុំគ្នាធ្វើបាតុកម្ម ដើម្បីទាមទារឲ្យមានការដោះលែងលោកកឹម សុខា ប្រធានបក្សប្រឆាំងដោយឥតលក្ខខណ្ឌ ការគោរពសិទ្ធិមនុស្ស និងការគោរពសេរីភាពសារព័ត៌មាននៅកម្ពុជា។ បាតុកម្មនេះ ដឹកនាំធ្វើដោយសហព័ន្ធខ្មែរអូស្ត្រាលីសារជីវកម្ម។ ក្រៅពីអូស្ត្រាលី ពលរដ្ឋខ្មែរនៅប្រទេសកាណាដា និងប្រទេសបារាំងក៏គ្រោងធ្វើបាតុកម្មនៅថ្ងៃនេះដូចគ្នាផងដែរ។
ចុះផ្សាយនៅថ្ងៃ៖
ស្តាប់ - ០២:៤០
បាតុកម្មរបស់ពលរដ្ឋខ្មែរនៅក្នុងប្រទេសអូស្ត្រាលី ត្រូវបានសហព័ន្ធខ្មែរអូស្ត្រាលីសាជីវកម្មដាក់ឈ្មោះថា ទិវាទាមទារការដោះលែងលោកកឹម សុខា ប្រធានគណបក្សប្រឆាំង ការគោរពសិទ្ធិមនុស្ស និងសេរីភាពខាងសារព័ត៌មាននៅកម្ពុជា។ បាតុកម្មនេះ ធ្វើឡើងនៅមុខអាគារSpringvale ក្នុងទីក្រុង Melbourne នៃរដ្ឋ Victoria ប្រទេសអូស្ត្រាលី។ តាមសេចក្តីអំពាវនាវឲ្យជួបជុំគ្នាធ្វើបាតុកម្មរបស់ខ្លួន សហព័ន្ធខ្មែរអូស្ត្រាលីសាជីវកម្មបញ្ជាក់ថា ការចូលរួមធ្វើបាតុកម្មលើកនេះ គឺដើម្បីបង្ហាញនូវមនសិការស្នេហាជាតិនិងសាមគ្គីភាពរបស់ជនជាតិខ្មែរនៅក្នុងប្រទេសអូស្ត្រាលី។
ក៏ប៉ុន្តែចំពោះការធ្វើបាតុកម្មនេះ សមាគមខ្មែរនៅប្រទេសអូស្ត្រាលីចំនួន៥ផ្សេងទៀត បានចេញមុខបដិសេធថា សហព័ន្ធខ្មែរអូស្ត្រាលីសាជីវកម្មដែលប្រមែប្រមូលពលរដ្ឋខ្មែរធ្វើបាតុកម្មនេះ មិនមែនតំណាងឲ្យពលរដ្ឋខ្មែរ និងសមាគមខ្មែរទូទាំងប្រទេសអូស្ត្រាលីនោះឡើយ។ សមាគមខ្មែរនៅអូស្ត្រាលីទាំង៥នេះ រួមមានសមគមវប្បធម៌សាជីវកម្មរដ្ឋអូស្ត្រាលីខាងត្បូង សមាគមខ្មែរ អូស្ត្រាលីនៃរដ្ឋឃ្លីនស្លែនដ៍សាជីវកម្ម សមាគមពលរដ្ឋខ្មែរអូស្ត្រាលីរដ្ឋវិចតូរីយ៉ា សមាគមមិត្តភាពកម្ពុជា និងវប្បធម៌ប្រចាំរដ្ឋអូស្ត្រាលីខាងត្បូងសាជីវកម្ម និងសមាគមយុវជនខ្មែរទីក្រុងស៊ីដនី។
ផ្ទុយពីសហព័ន្ធខ្មែរអូស្ត្រាលីសាជីវកម្ម សមាគមខ្មែរទាំង៥នៅក្នុងប្រទេសអូស្ត្រាលីនេះ បានអំពាវនាវឲ្យពលរដ្ឋខ្មែរទាំងអស់រក្សាភាពស្ងប់ស្ងាត់ និងទុកករណីលោកកឹម សុខានេះ ជូនតុលាការចាត់ការទៅតាមផ្លូវច្បាប់ ដើម្បីធានាបាននូវសន្តិសុខ និងសណ្តាប់ធ្នាប់នៅក្នុងប្រទេសកម្ពុជា។ បន្ថែមពីលើនេះ សមាគមខ្មែរទាំង៥ ក៏បានអំពាវនាវកុំពលរដ្ឋខ្មែរទៅចូលរួមធ្វើបាតុកម្មតាមការអំពាវនាវរបស់សហព័ន្ធខ្មែរអូស្ត្រាលីសាជីវកម្មថែមទៀត។
បើទោះបីជាមានការអំពាវនាវកុំពលរដ្ឋចូលរួមបាតុកម្មបែបនេះក្តី ប៉ុន្តែបាតុកម្មនៅអូស្ត្រាលីនៅតែបន្តធ្វើដូចការគ្រោងទុក។ ក្រៅតែពីអូស្ត្រាលីនេះ បាតុកម្មក៏ធ្វើឡើងនៅបារាំង និងកាណាដានៅថ្ងៃតែមួយនេះថែមទៀត។ បន្ថែមលើនេះ គម្រោងធ្វើបាតុកម្មនៅបរទេសដើម្បីទាមទារឲ្យដោះលែងលោកកឹម សុខា ក៏គ្រោងធ្វើនៅថ្ងៃទី១០ ខែកញ្ញា នៅទីក្រុងLong Beach រដ្ឋកាលីហ្វញ៉ា និង វ៉ាស៊ីនតោន សហរដ្ឋអាមេរិក។ ចំណែកនៅថ្ងៃទី១៥ ខែកញ្ញា បាតុកម្មនឹងធ្វើម្តងទៀតនៅវ៉ាស៊ីនតោន ហើយនៅថ្ងៃទី១៦ ខែកញ្ញា បាតុកម្មរបៀបនេះនឹងធ្វើឡើងផងដែរនៅក្នុងប្រទេសនូវែលសេឡង់។ នេះបើតាមគម្រោងធ្វើបាតុកម្មនៅក្រៅប្រទេសដែលកញ្ញាកឹម មនោវិទ្យា កូនស្រីលោកឹម សុខា បានបង្ហោះនៅលើគណនីធ្វីតធើរបស់ខ្លួនកាលពីថ្ងៃ៧ កញ្ញាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ