សភានឹងសម្រេចករណី លោក កឹម សុខា នៅសប្ដាហ៍ក្រោយ
នៅព្រឹកថ្ងៃទី៧ខែកញ្ញាឆ្នាំ២០១៧នេះ រដ្ឋសភាបានបើកកិច្ចប្រជុំគណៈកម្មាធិការអចិន្រ្តៃយ៌រដ្ឋសភាអំពីករណីលោក កឹម សុខា។ ជាលទ្ធផលនៃកិច្ចប្រជុំនេះ រដ្ឋសភាបានសម្រេចកំណត់យកថ្ងៃទី ១១ កញ្ញា ជាថ្ងៃប្រជុំរដ្ឋសភាវិសាមញ្ញនីតិកាលទី៥ ដើម្បីសម្រេចលើសំណុំរឿង លោក កឹម សុខា។
ចុះផ្សាយនៅថ្ងៃ៖
ស្តាប់ - ០១:៣៧
លោក ឈាង វុន អ្នកនាំពាក្យរដ្ឋសភា បានថ្លែងប្រាប់ក្រុមអ្នកសារព័ត៌មានក្រោយកិច្ចប្រជុំគណៈកម្មាធិការអចិន្ដ្រៃរដ្ឋសភាថា កិច្ចប្រជុំវិសាមញ្ញនៅថ្ងៃទី១១ កញ្ញា ខាងមុខ សភានឹងពិនិត្យលើរបាយការណ៍របស់សមត្ថកិច្ច អំពីការចាប់ខ្លួនលោក កឹម សុខា។ លោកបន្ដថា ក្រោយពីពិនិត្យលើរបាយការណ៍នឹងច្បាប់ពាក់ព័ន្ធ សភានឹងអនុម័តតាមការសម្រេច ៥០ បូកមួយ ដើម្បីអនុញ្ញាតឲ្យតុលាការអាចបន្ដ ឬទម្លាក់បទចោល។
លោក ឈាង វុន បន្ថែមថា ករណីលោក កឹម សុខា ជាការប្រព្រឹត្តិបទឧក្រិដ្ឋជាក់ស្តែង ដែលលោកហៅថាជាសកម្មភាព ”រស់រវើក កំពុងតែបន្ដអនុវត្ត”។ អ្នកនាំពាក្យសភារូបនេះ បញ្ជាក់ថា សមត្ថកិច្ចចាប់ខ្លួនលោក កឹម សុខា ជាការត្រឹមត្រូវតាមបទបញ្ញត្ដិមាត្រា៨០ នៃរដ្ឋធម្មនុញ្ញ។ លោកថា ក្នុងករណីនេះ អភ័យឯកសិទ្ធិរបស់តំណាងរាស្ដ្រ មិនអាចការពារបានទេ។
ជុំវិញករណីចាប់ខ្លួនលោក កឹម សុខា នេះ កាលពីថ្ងៃទី៦ កញ្ញា ក្រុមតំណាងរាស្រ្តគណបក្សសង្រ្គោះជាតិ បានចេញសេចក្តីថ្លែងការណ៍មួយ។ សេចក្ដីថ្លែងការណ៍នេះបានចាត់ទុកថា តុលាការត្រូវបានប្រើប្រាស់ជាឧបករណ៍នយោបាយ ធ្វើទុក្ខបុកម្នេញឥតឈប់ឈរទៅលើសកម្មជន និងថ្នាក់ដឹកនាំគណបក្សសង្រ្គោះជាតិ។
សេចក្តីថ្លែងការណ៍នេះបន្តថា ក្រុមតំណាងរាស្រ្តបក្សប្រឆាំង មិនអាចទទួលយកបានជាដាច់ខាតនូវ ការចាប់ខ្លួន និងការចោទប្រកាន់លើលោក កឹម សុខា។ បើតាមសេចក្ដីថ្លែងការណ៍នេះ ការចាប់ខ្លួនលោក កឹម សុខា ដោយផ្អែកលើរូបភាពដែលមានក្នុងវិដេអូ មិនមែនជាអំពើល្មើសជាក់ស្តែង ស្របតាមមាត្រា៨៦ នៃក្រមនីតិវិធីព្រហ្មទណ្ឌទេ។
សូមបញ្ជាក់ថា កាលពីដើមសប្ដាហ៍នេះ សមត្ថកិច្ចបានផ្ញើរបាយកាណ៍អំពីការចាប់ខ្លួនលោក កឹម សុខា ជូនទៅរដ្ឋសភា។ កាលពីថ្ងៃទី ០៦ កញ្ញា តុលាការក្រុងភ្នំពេញ បានសម្រេចចោទប្រកាន់ លោក កឹម សុខា ពីបទ «សន្ទិដ្ឋិភាពជាមួយបរទេស» ដែលជាបទល្មើសមួយក្នុងអំពើក្បត់ជាតិតាមមាត្រា៤៤៣ នៃក្រមព្រហ្មទណ្ឌ។ យោងតាមបទល្មើសនេះ លោក កឹម សុខា អាចប្រឈមនឹងជាប់ពន្ធនាគារពី១៥ ទៅ៣០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ