អ្នកដឹកនាំខ្មែរឥស្លាមកំពុងសម្លឹងមើលកន្លែងឲ្យសិស្សនិស្សិតរៀនបន្តនៅក្នុងតំបន់
សិស្សនិស្សិត ខ្មែរឥស្លាមចំនួន ១៦នាក់ ដែលសហគមន៍ខ្មែរឥស្លាមនៅកម្ពុជាបានបញ្ចូនទៅសិក្សានៅប្រទេសយ៉េមែនតាមរូបភាពអាហារូបករណ៍ត្រូវបានបញ្ជូនមកដល់ព្រលានយន្តហោះអន្តរជាតិភ្នំពេញហើយកាលពីរសៀលថ្ងៃអង្គារនេះ។ ភាពចលាចល វឹកវរ នៅប្រទេស យ៉េមែន ជាហេតុផលដែលជំរុញឲ្យនិស្សិតខ្មែរឥស្លាម បង្ខំចិត្តជន្លៀសខ្លួនចេញពីប្រទេសនេះ ដោយមានការជ្រោមជ្រែងពីរដ្ឋាភិបាលកម្ពុជា និងគណៈដឹកនាំសាសនាឥស្លាមកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សិស្សនិស្សិត ខ្មែរឥស្លាមចំនួន ១៦នាក់ ដែលសហគមន៍ខ្មែរឥស្លាមនៅកម្ពុជាបានបញ្ចូនទៅសិក្សានៅប្រទេសយ៉េមែន បានត្រលប់មកដល់មាតុប្រទេសវិញហើយ កាលពីរសៀលថ្ងៃទី១៤មេសានេះ តាមជើងយន្តហោះនៃក្រុមហ៊ុនអាកាសចរណ៍ Quatar Airway។
ការបញ្ចូនសិស្សនិស្សិតខ្មែរឥស្លាម មកប្រទេសកម្ពុជាវិញនាពេលនេះ បានធ្វើឡើងបន្ទាប់ពី
មេដឹកនាំសាសនាឥស្លាម នៅប្រទេសនេះ បានពិនិត្យឃើញថា មានភាពវឹកវរដោយការធ្វើ
បាតុកម្ម និងស្ថានភាពសង្គ្រាមនៅប្រទេសយ៉េមែន កាន់តែអាក្រក់ទៅៗពីមួយថ្ងៃទៅមួយថ្ងៃ។
លោកអូស្មាន ហាសាន់ រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងថា លោកបានអន្តរាគមន៍ទៅស្ថានទូតកម្ពុជាប្រចាំប្រទេសគូវ៉ែត ស្ថានទូតម៉ាឡេស៊ី នៅប្រទេសយ៉េមែន និងរដ្ឋាភិបាលប្រទេសអូម៉ង់និងអារ៉ាប់ដើម្បីបញ្ជូនសិស្សនិស្សិតឥស្លាមចំនួន២០ មកប្រទេសជាបន្ទាន់ ក៏ប៉ុន្តែ៤នាក់ជាប់រវល់ប្រលង។
ជាមួយគ្នានេះ លោក សុះ មុះសិន រដ្ឋលេខាធិការក្រសួងធម្មការ និងសាសនា និងជាអនុប្រធានអង្គការមូលនិធិអភិវឌ្ឍមុស្លិមកម្ពុជា បានឲ្យដឹងដែរថា គម្រោងបញ្ជូនសិស្សនិស្សិត ខ្មែរឥស្លាម ទៅសិក្សានៅប្រទេសមួយចំនួននឹងត្រូវបានផ្អាក។
លោក មុះសិន បញ្ជាក់ថាសិស្សនិស្សិតខ្មែរឥស្លាមកន្លងមកតែងទទួលអាហារូបករណ៍ច្រើន
ពីប្រទេសនៅតំបន់មជ្ឈិមបូព៌ា ក៏ប៉ុន្តែនៅពេលនេះក្រុមមេដឹកនាំសាសនាឥស្លាមកម្ពុជាកំពុង
ពិចារណាស្នើសុំបង្វិលអាហារូបករណ៍ពីប្រទេសអ្នកមាននៅតំបន់នោះ ដោយផ្តល់ដល់សិស្សនិស្សិតឥស្លាម ទៅរៀននៅតំបន់អាស៊ានវិញ។
លើសពីនេះលោករដ្ឋលេខាធិការក៏បានបង្ហើបដែរថា គណៈដឹកនាំសាសនាឥស្លាមកម្ពុជាកំពុងមានគំរោងបង្កើតគ្រឹះស្ថានសិក្សាខ្ពស់ៗនៃសាសនាឥស្លាមនៅប្រទេសកម្ពុជាផងដែរ
ម្ចាស់ជំនួយគ្រាន់តែជួយជាអាហាររូបករណ៍ក្នុងស្រុកក៏បានដែរ។ ទោះយ៉ាងនេះក្តីមេដឹកនាំសាសនាឥស្លាមនៅកម្ពុជាក៏មិនបោះបង់ចោលទាំងស្រុងដែរ ពីការបញ្ជូនសិស្សនិស្សិត ទៅយកសញ្ញាបត្រជាន់ខ្ពស់នៅសកលវិទ្យាល័យមួយចំនួននៅប្រទេសអារ៉ាប៊ីសាអ៊ូឌីត និងប្រទេសអេហ្សីប ដែលទីនោះជាសកលវិទ្យាល័យចំណាស់និងមានការទទួលស្គាល់ជាអន្តរជាតិ។
លោកនាយករដ្ឋមន្ត្រី ហ៊ុន សែន កាលពីព្រឹកមិញ នៅក្នុងឱកាសនៃពិធីថ្ងៃដំបូងអង្គរសង្ក្រាន្ត
ពីខេត្តសៀមរាប បានថ្លែងថាកម្ពុជាលោកមានមោទនភាពពីការធ្វើសុខដុមនីយកម្មខាងសាសនា ដោយយកវប្បធម៌សន្ទនាគ្របដណ្តប់អំពើហិង្សា។ ជាមួយគ្នានេះលោក ហ៊ុន សែនក៏ថ្លែងពីការជន្លៀសពលរដ្ឋខ្មែរឥស្លាមម្តងហើយម្តងទៀតចេញពីប្រទេសដែលមានសង្គ្រាមដូចជាប្រទេសយ៉េមែន ដោយរង់ចាំការបញ្ជូនទៅរៀនវិញនៅពេលយ៉េមែនបានសុខសប្បាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ