អ្នករស់នៅលើទូក និងតាមច្រាំងទន្លេខេត្តកំពង់ឆ្នាំងជិត ១ពាន់គ្រួសារនឹងត្រូវឡើងគោកទាំងអស់នៅឆ្នាំ ២០១៨
អាជ្ញាធរខេត្តកំពង់ឆ្នាំងបានប្រកាសថា ខេត្តមានផែនការបញ្ចប់ការរស់នៅលើទឹក និងអ្នករស់នៅតាមមាត់ច្រាំងទន្លេ របស់ពលរដ្ឋជាច្រើនរយគ្រួសារយ៉ាងយូរបំផុតដាច់ឆ្នាំ ២០១៨។ ការលើកឡើងរបស់អាជ្ញាធរខេត្តដូច្នេះ បានធ្វើឡើងបន្ទាប់ពីខេត្តត្រូវការអភិវឌ្ឍន៍ ដើម្បីរក្សាបរិស្ថានធម្មជាតិនៃទឹកបឹងទន្លេសាប ដែលជាប្រភពធនធានត្រីទឹកសាបដ៏ធំរបស់ប្រទេស និង ដើម្បីរៀបចំទទួលបុណ្យទន្លេនៅឆ្នាំខាងមុខ។
ចុះផ្សាយនៅថ្ងៃ៖
ស្តាប់ - ០២:៣៩
តាមពិត ផែនការបំលាស់ទីប្រជាជន ដែលរស់នៅលើទឹក និងមាត់ច្រាំង របស់អាជ្ញាធរខេត្តកំពង់ឆ្នាំង ឲ្យទៅរស់នៅលើគោក បានធ្វើឡើងចាប់តាំងពីឆ្នាំ ២០១៥ មកម្លេះ ហើយគ្រោងនឹងបញ្ចប់នៅឆ្នាំ ២០១៩។ ក៏ប៉ុន្តែអាជ្ញាធរនឹងប្រឹងប្រែងបញ្ចប់ការងារនេះមុនកំណត់ គឺត្រឹមឆ្នាំ ២០១៨ ដើម្បីខេត្តមានលទ្ធភាពរៀបចំអភិវឌ្ឍន៍តំបន់នោះ ឲ្យមានស្ថានភាពបែបធម្មជាតិឡើងវិញ។ នេះបើតាមលោក ស៊ុន សុវណ្ណារិទ្ធិ អភិបាលរងខេត្តកំពង់ឆ្នាំង។
ជាទូទៅការបំលាស់ទីប្រជាជនរួមមានជនជាតិខ្មែរ ខ្មែរឥស្លាម និងជនជាតិវៀតណាម ចេញពីលើទឹកនឹងមាត់ច្រាំង ដែលសង់ផ្ទះទយចូលទន្លេនោះ ត្រូវបានបែងចែកជា ២ដំណាក់កាល។ បច្ចុប្បន្ន ជនជាតិខ្មែរ ជនជាតិខ្មែរឥសា្លមចំនួន ២១០ខ្នងផ្ទះ ត្រូវបានអាជ្ញាធរខេត្តកំពង់ឆ្នាំងធ្វើការបំលាស់ទី ទៅកាន់ទីគោកខាងក្រោយផ្សារថ្មីខេត្តកំពង់ឆ្នាំង តាមកិច្ចព្រមព្រៀងទទួលថវិកាគោលនយោបាយ និងការផ្តល់ដីមួយប្លង់ដោយមិនគិតប្រាក់ ដែលមានហេដ្ឋារចនាសម្ព័ន្ធខ្លះហើយ។
អាជ្ញាធរខេត្តក៏បានអះអាងដែរថា នៅចុងឆ្នាំ ២០១៧នេះ ប្រជាជនដែលរស់នៅលក់ដូរតាមតូប និងស្តង់ឈើជាង ២០០ នៅមុខវត្តយាយទេព ក៏ត្រូវមានការបំលាស់ទីដែរ ដើម្បីផ្តល់ឲ្យធនាគារអភិវឌ្ឍន៍អាស៊ី អនុវត្តគម្រោងជំនួយការពារទឹកជំនន់ចំងាយ ១៥គីឡូម៉ែត្រ។ ជាមួយគ្នានេះ សាលាខេត្តក៏ត្រូវរៀបចំធ្វើសួនច្បារ ចំងាយជាង ២ពាន់ម៉ែត្រ ដើម្បីជាផ្នែកមួយរចនាតំបន់កំសាន្តខេត្តកំពង់ឆ្នាំង សម្រាប់ទទួលពិធីបុណ្យទន្លេ នៅពេលខាងមុខ។
លោក ស៊ុន សុវណ្ណារិទ្ធ បញ្ជាក់ថា ជាជំហានបន្ទាប់ សមត្ថកិច្ចរបស់លោកនឹងធ្វើការបំលាស់ទីប្រជាជនដែលរស់នៅលើទឹកចំនួនជាង ១៤០០ខ្នងផ្ទះ ដែលមានប្រជាជនសរុបជាង ៤ពាន់នាក់ ឲ្យឡើងមកលើគោក ដែលដំណោះស្រាយនេះនឹងអាចបញ្ចប់ទាំងស្រុងនៅឆ្នាំ ២០១៨ខាងមុខ។
សូមរំលឹកថា វត្តមានផ្ទះបណ្តែតទឹកនៅលើទឹកដីខេត្តកំពង់ឆ្នាំងជាយូរឆ្នាំមកហើយនោះ ដែលភាគច្រើនជាជនអន្តោប្រវេសន៍វៀតណាមនោះ បានរងការរិះគន់ថាធ្វើឲ្យប៉ះពាល់ដល់បរិស្ថាន ធ្ងន់ធ្ងរ ដោយសារតែការបំពុលទឹក នឹងធ្វើឲ្យគោករាក់ពីការចាក់កាកសំណល់គ្រប់ប្រភេទទៅក្នុងទឹក។ កាលពីដើមខែមេសា កន្លងទៅ អភិបាលខេត្តកំពង់ឆ្នាំង លោក ឈួ ច័ន្ទឌឿន បានលើកឡើងក្នុងកិច្ចប្រជុំនៅសាលាខេត្តកំពង់ឆ្នាំងថា ក្នុងមួយថ្ងៃៗ ត្រូវគេប៉ាន់ប្រមាណថា យ៉ាងហោចណាស់ក៏មានការទំលាក់កាកសំណល់ទៅក្នុងទឹកចំនួន ៥តោនដែរ ខណៈដែលអ្នករស់នៅក្នុងទឹកសព្វថ្ងៃមានប្រមាណជា ៥ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ