តើអ្វីនៅពីក្រោយការសុំចូលនិវត្តរបស់លោកគង់ គាំ?
លោកគង់ គាំ បច្ចុប្បន្នជាប្រធានគណបក្សសម រង្ស៊ី ប្រធានក្រុមសមាជិកព្រឹទ្ធសភាគណបក្ស សម រង្ស៊ី និងជាប្រធានគណៈកម្មការសិទ្ធិមនុស្ស ទទួលពាក្យបណ្តឹង និងអង្កេត នៅព្រឹទ្ធសភាបានប្រកាសចូលនិវត្តពីនយោបាយនៅថ្ងៃទី២ វិច្ឆិកា ម្សិលមិញនេះ។ ការប្រកាសចូលនិវត្តនេះត្រូវបានលោកគង់ គាំផ្ទាល់ បញ្ជាក់នៅក្នុងលិខិតជាផ្លូវការថា បណ្តាលមកពីមូលហេតុសុខភាពមិនបរិបូរណ៍ និងស្ថិតក្នុងភាពជរាព្យាធិជាប្រចាំទៅហើយ ខណៈដែលពេលនេះលោកមានអាយុ៧៥ឆ្នាំ។ ក្រៅពីបញ្ហាសុខភាពតើនៅមានកត្តាអ្វីផ្សេងទៀតដែរឬទេ ដែលធ្វើឲ្យបុរសវ័យចំណាស់ម្នាក់នេះ ដកខ្លួនចេញពីចាកនយោបាយកម្ពុជា?
ចុះផ្សាយនៅថ្ងៃ៖
ស្តាប់ - ០២:២៥
លោកគង់ គាំ ដែលជាប្រធានគណបក្សសម រង្ស៊ីអស់រយៈពេលជាច្រើនឆ្នាំមកហើយនោះ បានប្រកាសចូលនិវត្តដោយសារតែបញ្ហាសុខភាព។ ការប្រកាសនៅពេលនេះ ត្រូវបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកគង់ សភា ដែលត្រូវជាកូនប្រុសបង្កើតរបស់លោក គង់ គាំ និងជាតំណាងរាស្ត្រគណបក្សសង្គ្រោះជាតិត្រូវបានក្រុមជនដៃដល់ វាយឲ្យរងរបួសធ្ងន់ នៅខាងមុខរដ្ឋសភា កាលពីថ្ងៃ២៦ តុលាកន្លងទៅថ្មីនេះៗ។
តាមប្រភពស្និតនិងក្រុមគ្រួសាររបស់លោកគង់ គាំ បានបង្ហើបប្រាប់វិទ្យុបារាំងថា បច្ចុប្បន្ននេះ លោកគង់ គាំ កំពុងតែស្ថិតនៅក្នុងប្រទេសថៃ ដើម្បីពិនិត្យសុខភាព និងទៅសួរសុខទុក្ខកូនប្រុសរបស់លោកផងដែរ។ ប៉ុន្តែប្រភពដដែលនោះ មិនបានបញ្ជាក់ថា លោកបានចាកចេញពីប្រទេសកម្ពុជា តាំងពីពេលណា និងត្រឡប់មកវិញនៅពេលណានោះដែរ។
នៅក្នុងលិខិតផ្លូវការកំរាស់៤ ទំព័រ លោកគង់ គាំបានសុំការអនុគ្រោះ និងយោគយល់ពីការសុំចូលនិវត្តរបស់លោកពីប្រជាជនដែលធ្លាប់គាំទ្ររូបលោកនាពេលកន្លងមក។ ហើយលោកក៏បានសុំអនុគ្រោះសំដែងចំពោះមេដឹកនាំទាំងឡាយ ដែលមាន«ជំងឺតួឯក» ដែលចេះតែមានគំនិតជានិច្ចថា«មានតែខ្លួន បើគ្មានខ្លួន» មិនអាចដឹកនាំការ «ការពារ និងកសាង» កម្ពុជាឲ្យមានសន្តិភាព ប្រជាធិបតេយ្យ និងការអភិវឌ្ឍន៍ ដូចសព្វថ្ងៃ និងតទៅមុខបានទេនោះ សូមឲ្យមេដឹកនាំ «អត្តាធិបតេយ្យ» ត្រូវតែឆាប់ប្តូរគំនិត «មានតែអញ» ចោលទៅ ដើម្បីបើកឱកាសផ្លាស់ប្តូរឲ្យប្រជាពលរដ្ឋ និងយុវជនខ្មែរ ដែលទាន់សម័យបានជួយជាតិ មាតុភូមិដោយខ្លួនឯង។
លោកគង់ គាំ បានបង្ហាញពីចំណុចអវិជ្ជមានជាច្រើនចំណុច នៅក្នុងលិខិតផ្លូវការរបស់លោក ដែលក្នុងនោះរួមមានទាំងការនិយាយពីប្រវត្តិនៃព្រឹត្តិការណ៍សំខាន់ៗជាច្រើននៅកម្ពុជា ដូចជាថ្ងៃ១៧ មេសា ១៩៧៥ , ៧មករា ១៩៧៩, ២៣តុលា១៩៩១ជាដើម។ កាយវិការសន្ទនារវាងមេដឹកនាំគណបក្សកាន់អំណាចទាំងពីរ លោកហ៊ុន សែន និងលោកសម រង្ស៊ី។ ការគោររពសិទ្ធមនុស្ស ការបែងចែកគោលនយោបាយដីធ្លី ការផ្តល់ដីសម្បទានសេដ្ឋកិច្ចដែលធ្វើឲ្យប៉ះពាល់ដល់ព្រៃឈើ និងការផ្តល់ប្រាក់ខែដល់គ្រូបង្រៀនជាដើម។
សូមបញ្ជាក់ថាលោកគង់ គាំ បានចំណាយពេលស្ទើតែពេញមួយជីវិតរបស់លោកប្រឡូកនៅក្នុងឆាកនយោបាយកម្ពុជា ហើយមុននឹងក្លាយជាប្រធានគណបក្សសម រង្ស៊ី លោកក៏ធ្លាប់បានបំរើការងារជាមន្ត្រីនៅក្នុងគណបក្សប្រជាជនកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ