ព្រះរាជអាជ្ញាខេត្តកំពត សម្រេចចោទប្រកាន់ ២បទល្មើស ចំពោះជនសង្ស័យទាំង១៣នាក់
នៅថ្ងៃនេះ តំណាងអយ្យការអមសាលាដំបូងខេត្តកំពត បានសម្រេចចោទប្រកាន់២បទល្មើស ចំពោះជនសង្ស័យទាំង១៣នាក់ ទាក់ទងនឹងករណីបំផ្លិចបំផ្លាញទ្រព្យសម្បត្តិឯកជននិងទ្រព្យសម្បត្តិសាធារណៈ។ ក៏ប៉ុន្តែប្រធានបក្សសម្ព័ន្ធដើម្បីប្រជាធិបតេយ្យ ឬ LDP លោក ខឹម វាសនា អះអាងថា ការចោទប្រកាន់នេះ គឺមិនត្រឹមត្រូវទេ ហើយគ្មានសមហេតុផល ព្រោះដីទំនាស់ គឺស្ថិតក្នុងភាពមិនច្បាស់លាស់នៅឡើយ។ ទន្ទឹមនេះ ក្រុមអ្នកគាំទ្របក្ស LDP បានចេញទៅបោះជំរុំនៅលើដីរបស់ខ្លួន ដែលជាប់ដីទំនាស់នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ក្រោយពីការសាកសួរពេញមួយថ្ងៃម្សិលមិញ តំណាងអយ្យការខេត្តកំពត គឺព្រះរាជអាជ្ញារង លោក ខាន់ សុផល បានសម្រេចចោទប្រកាន់ជនសង្ស័យទាំង១៣នាក់នោះ ចំនួន២បទល្មើស គឺករណីធ្វើឲ្យខូចខាតដោយចេតនានូវទ្រព្យសម្បត្តិឯកជន និងការប៉ះពាល់ទ្រព្យសម្បត្តិសាធារណៈ។ ហើយនៅថ្ងៃនេះ ចៅក្រមក្រមស៊ើប កំពុងតែបើកការស៊ើបសួរបន្តទៀត មុននឹងឈានទៅដល់ ការសម្រេចឃុំខ្លួន និងបញ្ចូនរឿងទៅជំនុំជម្រះ ឬក៏សម្រេចលើកលែងការចោទប្រកាន់។
ចំពោះមុខការសម្រេចចោទប្រកាន់សមាជិកអ្នកគាំទ្ររបស់ខ្លួនយ៉ាងដូច្នេះ លោក ខឹម វាសនា បានអះអាងដាច់អហង្ការថា មិនត្រឹមត្រូវទេ។ ថ្លែងប្រាប់វិទ្យុបារាំង ប្រមុខបក្សLDPរូបនេះ វែកញែកថា ទី១ តើប៉ះពាល់ដល់ទ្រព្យសម្បត្តិឯកជន យ៉ាងដូចម្តេចកើត បើអ្នកមានជម្លោះដែលអ្នកអះអាងថាជាម្ចាស់ដីនោះ គ្មានប្លង់រឹង ឬប្លង់កម្មសិទ្ធិផងនោះ។ ហើយម្យ៉ាង ក្រុមអ្នកត្រូវចាប់ខ្លួនទាំង១៣នាក់នោះ គឺធ្វើសកម្មភាពដាំដំណាំលើដីរបស់ខ្លួន នៅលើដីលោក លី គឹមហុង និងនៅដីរបស់លោក ខឹម វាសនា ដែលមានឯកសារត្រឹមត្រូវសោះហ្នឹង។
ចំពោះការចោទបទល្មើសទី២ ពីការប៉ះពាល់ដល់ទ្រព្យសម្បត្តិសាធារណៈ លោក ខឹម វាសនា សួរថា តើបើប៉ះពាល់ដីសម្បទានសង្គមកិច្ចរបស់រដ្ឋ ម្តេចក៏ប៉ះពាល់តែប៉ុន្មាន១៣នាក់ហ្នឹងនោះ? ចុះមនុស្សរាប់សិបរយគ្រួសារទៀត ម្តេចក៏មិនប៉ះ? ព្រោះដីសម្បទានសង្គមកិច្ចនៅទីនោះ មានរហូតដល់ជាង១២៨៨ហិកតាឯណោះ រួមទាំងមានដីរបស់មន្ត្រីជាន់ខ្ពស់របស់ក្រសួងមហាផ្ទៃផង ម្តេចមិនថាប៉ះពាល់ផងទៅ?
តាមប្រមុខបក្សLDPដដែល, ដើមហេតុចម្បងនៃទំនាស់នេះ គឺ កើតចេញពីការឃុបឃិតគ្នារបស់អាជ្ញាធរដែលចង់យកដី លក់ឲ្យឈ្មួញ ហើយក្រុមរបស់លោក ដែលមានដីប្រមាណជាង២០ហិកតានិងដីរបស់លោកកន្លះហិកតានៅទីនោះផង គឺជាឆ្អឹងទទឹងកចំពោះអាជ្ញាធរ។ នេះបើតាមការអះអាងរបស់លោក ខឹម វាសនា ប្រធានបក្សសម្ព័ន្ធដើម្បីប្រជាធិបតេយ្យ។
ដោយឡែក នៅថ្ងៃនេះ ក្រុមអ្នកគាំទ្របក្ស LDP ប្រមាណជា៤០នាក់ បានចេញទៅបោះជំរុំនៅខេត្តកំពត ដោយមានតង់ជិត៣០ គឺបោះតង់លើទីតាំងនៅលើដីរបស់លោក លី គឹមហុងនិងលោក ខឹម វាសនា ដែលជាប់ដីទំនាស់តែម្តង។ ទន្ទឹមនេះ ម្តុំដីទំនាស់ ប្រមាណជា២គីឡូម៉ែត្រ គឺកំពុងតែមានប៉ូលីសមួយចំនួន នៅឈរចាំយាមនៅទីនោះនៅឡើយ។
ជុំវិញរឿងទំនាស់នេះ អភិបាលខេត្តកំពត បានសរសេរលិខិតស្នើសុំអន្តរាគមន៍ពីរដ្ឋមន្ត្រីមន្ត្រីក្រសួងមហាផ្ទៃ ដើម្បីដោះស្រាយបញ្ហា ក៏ប៉ុន្តែអ្នកនាំពាក្យក្រសួងមហាផ្ទៃ លោក ខៀវ សុភ័ក្រ ប្រាប់វិទ្យុRFI នៅថ្ងៃនេះថា លោកនៅតែមិនទាន់បានទទួលលិខិតនោះនៅឡើយទេ។
គួររម្លឹកជូនថា នៅថ្ងៃទី៥កុម្ភៈកន្លងទៅនេះ ក្រុមអ្នកគាំទ្របក្ស LDP ជាង៨រយនាក់ បានទៅតវ៉ាដោយធ្វើបាតុកម្មអហិង្សា នៅមុខស្នងការដ្ឋានខេត្តកំពត ដើម្បីទាមទារឲ្យដោះលែងអ្នកទាំង១៣នាក់។ គឺមួយថ្ងៃបន្ទាប់ពីអ្នកទាំង១៣ត្រូវបានចាប់ខ្លួនដោយគ្មានដីកា។
អាជ្ញាធរនិងព្រះរាជអាជ្ញា អះអាងថាជាបទល្មើសជាក់ស្តែង។ ប៉ុន្តែចំពោះប្រមុខបក្ស LDP គឺគ្មានប្រព្រឹត្តបទល្មើសអ្វីទេ ដ្បិតថា អ្នកខ្លះគ្រាន់តែឈរមើល ក៏ត្រូវគេចាប់ដែរ ហើយតាមដើរចាប់ រហូតដល់ក្នុងផ្ទះទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ