អ្នកការពារសិទិ្ធមនុស្ស បានក្លាយជាជនរងគ្រោះ ក្នុងស្ថានភាពនយោបាយផុយស្រួយនៅកម្ពុជា
អង្គការសម្ព័នខ្មែរជំរឿន និងការពារសិទ្ធិមនុស្ស (លីកាដូ) បានចេញផ្សាយរបាយការណ៍ថ្មី នៅថ្ងៃទី៣ កក្កដានេះ ដោយបានលើកឡើងពីស្ថានភាពសិទ្ធិមនុស្សនៅកម្ពុជា ក្នុងស្ថានភាពនយោបាយផុយស្រួយនេះ។ នៅក្នុងរបាយការណ៍ដែលមានចំណងជើងថា “ហានិភ័យនៃសំឡេងរិះគន់៖ ការរំលោភបំពានទៅលើអ្នកការពារសិទ្ធិមនុស្ស” លីកាដូបានកត់សំគាល់ថា អ្នកការពារសិទិ្ធមនុស្ស រួមទាំងបុគ្គលឯករាជ្យ និងបុគ្គលសំខាន់ៗមួយចំនួនទៀត បានក្លាយជាជនរងគ្រោះក្នុងចំណោមជនរងគ្រោះដទៃទៀត ក្នុងរយៈពេលពីរឆ្នាំចុងក្រោយនេះ ។ លីកាដូ បានលើកឡើងថា និន្នាការនេះនឹងបន្ត រហូតទៅដល់ការបោះឆ្នោតជាតិឆ្នាំក្រោយ។
ចុះផ្សាយនៅថ្ងៃ៖
ចាប់តាំងពីឆ្នាំ២០១៥មក អ្នកតំណាងសហគមន៍ជាច្រើន រួមមាន មេដឹកនាំសហជីព និងសកម្មជនបរិស្ថាន បានទទួលរងនូវការចោទប្រកាន់ដែលមិនមានមូលដ្ឋានច្បាប់នោះទេ។ នេះបើយោងតាមរបាយការណ៍កម្រាស់៣ទំព័រ របស់អង្គការសិទ្ធិមនុស្ស លីកាដូ ចេញផ្សាយនៅថ្ងៃទី ៣ កក្កដានេះ។ លើសពីនេះ របាយការណ៍ដែលមានចំណងជើងថា “ហានិភ័យនៃសំឡេងរិះគន់៖ ការរំលោភបំពានទៅលើអ្នកការពារសិទ្ធិមនុស្ស” បានកត់សំគាល់ដែរថា ចាប់តាំងពីខែកក្កដា ឆ្នាំ២០១៦ អ្នកការពារសិទិ្ធមនុស្សបានទទួលរងនូវបទពិសោធន៍យ៉ាងជូរចត់ថែមទៀត សម្រាប់ការបញ្ចេញគំនិតរិះគន់របស់ពួកគេ។ តួយ៉ាង អ្នកវិភាគនយោបាយ លោកបណ្ឌិត កែម ឡី ត្រូវបានគេលួចបាញ់ប្រហារទាំងកណ្តាលថ្ងៃ ហើយក្រោយមក ទោះជាជនសង្ស័យចំបងត្រូវបានតុលាការផ្តន្ទាទោសបន្ទាប់ពីបើកសវនាការអស់រយៈពេលបួនម៉ោងក៏ដោយ ក៏រហូតមកដល់សព្វថ្ងៃ នៅមិនទាន់មានការស៊ើបអង្កេតដែលគួរឲ្យជឿទុកចិត្តណាមួយ ត្រូវបានធ្វើឡើងទៅលើឃាតកម្មនេះនៅឡើយទេ។
នៅក្នុងរបាយការណ៍សង្ខេបចុងក្រោយបំផុតនេះ អង្គការសិទ្ធិមនុស្ស លីកាដូ បានលើកឡើងនូវការបំភិតបំភ័យជាច្រើន ដែលអ្នកការពារសិទិ្ធមនុស្សកំពុងប្រឈមមុខនៅក្នុងសង្គមកម្ពុជាសព្វថ្ងៃ។ តួយ៉ាង អ្នកតំណាងសហគមន៍ ដែលបានទទួលពានរង្វាន់អន្តរជាតិ អ្នកស្រី ទេព វន្នី បានទទួលរងនូវការចោទប្រកាន់តាមរយៈប្រព័ន្ធតុលាការជាច្រើនករណី។ ចំណែកបុគ្គលិកសមាគមការពារសិទ្ធិមនុស្សអាដហុក៤នាក់ និងអគ្គលេខាធិការរង គ.ជ.ប លោក នី ចរិយា ដែលត្រូវបានតុលាការដោះលែងឲ្យនៅក្រៅឃុំបណ្តោះអាសន្នកាលពីសប្តាហ៍មុនពីបទសូកប៉ាន់សាក្សីនោះ បានបង្ហាញយ៉ាងច្បាស់ពីការព្យាយាមរបស់អាជ្ញាធរ ដើម្បីបំបិទសំឡេងរិះគន់ស្របច្បាប់លើភាពមិនប្រក្រតីនៃនីតិវិធីតុលាការ។
អ្នកស្រី ណាលី ពីឡូក នាយិការងផ្នែកតស៊ូមតិនៃអង្គការលីកាដូ ដែលត្រូវបានស្រង់សំដី នៅក្នុងរបាយការណ៍នេះបានហៅការដោះលែងនោះថា ជាជំហានវិជ្ជមានមួយ ប៉ុន្តែអ្នកទាំងនោះនៅតែប្រឈមមុខនឹងបទចោទ ខណៈអ្នកការពារសិទិ្ធមនុស្សដទៃទៀតនៅតែបន្តនៅក្នុងពន្ធនាគារនៅឡើយ។ លោកស្រីថា អ្នកការពារសិទិ្ធមនុស្សដែលកំពុងជាប់ពន្ធនាគារ និងកំពុងទទួលរងការធ្វើទុក្ខបុកម្នេញដោយគ្រាន់តែក្រោកឈរ និងនិយាយរិះគន់អំពីភាពអយុត្តិធម៌ មិនគួរត្រូវជាប់ក្នុងពន្ធនាគារទាល់តែសោះ ហើយបទចោទប្រកាន់ទាំងអស់លើអ្នកទាំងនោះគួរត្រូវបានទម្លាក់ចោល”។
យ៉ាងណាក៏ដោយ របាយការណ៍នេះបានលើកឡើងថា ទោះបីជាករណីជាច្រើន ដែលត្រូវបានលើកឡើងនៅក្នុងរបាយការណ៍នេះ នៅមិនទាន់គ្រប់គ្រាន់ពេញលេញក្តី តែទិន្នន័យទាំងនេះ អាចផ្តល់នូវរូបភាពមួយផ្នែក ដែលបង្ហាញពីអំពើរំលោភបំពានជាច្រើន ដែលតែងតែកើតមកលើអ្នកការពារសិទិ្ធមនុស្សនៅកម្ពុជាអស់រយៈពេលជាងពីរឆ្នាំចុងក្រោយមកនេះ និងបានព្រមានថា និន្នាការនេះ នឹងបន្តកើតឡើងទៀត រហូតដល់ការបោះឆ្នោតជាតិនៅឆ្នាំ២០១៨ខាងមុខ។ ប៉ុន្តែ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានច្រានចោលចំពោះរបាយការណ៍នេះ និងបានចាត់ទុកថា ជារបាយការណ៍មិនឆ្លុះបញ្ចាំងការពិត នឹងមានបំណងធ្វើឲ្យប៉ះពាល់ដល់បរិយាកាសនៅមុនការបោះឆ្នោតជាតិនៅឆ្នាំ២០១៨ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ