ក្រសួងការបរទេសកម្ពុជា ចាត់ទុកលោក ហុង លីម ជាជនមិនត្រូវបានស្វាគមន៍ (Persona Non Grata)
ការលើកឡើងរបស់លោក ហុង លីម តំណាងរាស្ត្រ រដ្ឋ Victoria នៃប្រទេសអូស្ត្រាលី មិនឆ្លុះបញ្ចាំងពីទស្សនៈរបស់សភាអូស្ត្រាលី និងរដ្ឋាភិបាលអូស្ត្រាលី ចំពោះកម្ពុជានោះទេ។ នេះគឺជាការបញ្ជាក់របស់ស្ថានទូតអូស្ត្រាលីប្រចាំទីក្រុងភ្នំពេញ តាមរយៈសេចក្ដីថ្លែងការណ៍មួយ ចុះថ្ងៃពុធ ទី១០ សីហានេះ។ ការគូសបញ្ជាក់របស់ស្ថានទូតអូស្ត្រាលីដូច្នេះ ធ្វើឡើងបន្ទាប់ពីលោក ហុង លឹម បានប្រៀបប្រដូចរបបនៅកម្ពុជាថា ជារបបតិរច្ឆាន នៅក្នុងពេលផ្តល់បទសំភាសន៍ជាមួយវិទ្យុអាស៊ីសេរី នៅថ្ងៃទី០៤ ខែសីហា កន្លងទៅ។ ក្រសួងការបរទេសកម្ពុជា បានថ្កោលទោស និងចាត់ទុកសម្ដីរបស់លោក ហុង លីម ដូច្នេះថា ជាការនិយាយបង្ខូចកិត្តិយស ដែលខុសពីការពិតទាំងស្រុងនៅកម្ពុជា។ តាមរយៈសេចក្ដីប្រកាសចុះថ្ងៃពុធនេះដែរ ក្រសួងការបរទេសកម្ពុជា បានសម្រេចចាត់ទុកលោក ហុង លីម ថា ជាជនមិនត្រូវបានស្វាគមន៍ Persona Non Grata សម្រាប់កម្ពុជាទៀតផង។ ប៉ុន សោភ័ណ ជូនព័ត៌មាន៖
ចុះផ្សាយនៅថ្ងៃ៖
ស្តាប់ - ០១:២២
ស្ថានទូតអូស្ត្រាលី ប្រចាំទីក្រុងភ្នំពេញ នៅថ្ងៃពុធនេះ បានចេញសេចក្ដីថ្លែងការណ៍មួយ ដោយបញ្ជាក់ថា ការលើកឡើងរបស់លោក ហុង លីម មិនមែនឆ្លុះបញ្ចាំងពីទស្សនៈរបស់សភាអូស្ត្រាលី និងរដ្ឋាភិបាលអូស្ត្រាលី ចំពោះកម្ពុជានោះទេ។ យ៉ាងណាក៏ដោយ ស្ថានទូតអូស្ត្រាលី ពន្យល់ថា ការបញ្ចេញមតិ ឬទស្សនៈខុសគ្នា នៅលើការជជែកពិភាក្សាសាធារណៈ គឺជាប្រពៃណីដ៏រឹងមាំមួយរបស់អូស្ត្រាលី ហើយវាក៏ជាធាតុសំខាន់មួយនៅក្នុងរបបប្រជាធិបតេយ្យផងដែរ។ ស្ថានទូតអូស្ត្រាលី អះអាងជាចុងក្រោយអំពីទំនាក់ទំនងដ៏រឹងមាំនិងឋិតឋេរមួយជាមួយកម្ពុជា ហើយរំពឹងថា ទំនាក់ទំនងនេះ នឹងបន្តទៅមុខទៀត។
ការបញ្ជាក់របស់ស្ថានទូតអូស្តា្រលីនេះ ធ្វើឡើងបន្ទាប់ពីក្រសួងការបរទេសកម្ពុជាបានចេញសេចក្តីថ្លែងការណ៍ធ្ងន់ៗនៅថ្ងៃទី១០ សីហានេះ ដោយសម្តែងការរំជួលចិត្ត និងថ្កោលទោសចំពោះការប្រើប្រាស់ពាក្យពេចន៍របស់លោក ហុង លីម ដែលបានចាត់ទុកកម្ពុជាដូច «តិរច្ឆាន»។ សេចក្តីប្រកាសរបស់អ្នកនាំពាក្យ បញ្ជាក់ថា បុគ្គល ហុង លីម ជា«ជនមិនត្រូវបានស្វាគមន៍» ឬ ពែសោណា ណាន់ក្រាតា (Persona Non Grata)។ សម្រាប់កម្ពុជា ពោលគឺ លោក ហុង លីម សមាជិកសភា នៅរដ្ឋVictoria ដែលមានដើមកំណើតខ្មែរ នឹងមិនត្រូវបានអនុញ្ញាតឲ្យចូលក្នុងប្រទេសកម្ពុជាឡើយ។
គួររំលឹកថា សេចក្តីថ្លែងការណ៍ទាំងពីរនេះ បានធ្វើឡើងបន្ទាប់ពីលោក ហុង លឹម បានប្រៀបប្រដូចរបបនៅកម្ពុជាថា ជារបបតិរច្ឆាន នៅក្នុងពេលផ្តល់បទសំភាសន៍ជាមួយ វិទ្យុអាស៊ីសេរី នៅថ្ងៃទី០៤ ខែសីហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ