បទល្មើសព្រៃឈើ៖ អង្គការសហគមន៍ព្រៃឈើសាទរចំពោះចំណាត់ការរបស់ក្រសួងកសិកម្ម តែបដិសេធចំពោះរបាយការណ៍
អ្នកឃ្លាំមើលបទល្មើសព្រៃឈើនិងអ្នកការពារធនធានធម្មជាតិ មានការលើកទឹកចិត្តចំពោះចំណាត់ការរបស់ក្រសួងកសិកម្ម តែមានជំនឿថា បទល្មើសព្រៃឈើនៅកម្ពុជាមានច្រើនជាងការឃើញរបស់ក្រសួងកសិកម្មទៅទៀត។ ការអះអាងរបស់អង្គការសហគមន៍ព្រៃឈើយ៉ាងដូច្នេះ បានធ្វើឡើងបន្ទាប់ពីក្រសួងកសិកម្មបានបង្ហាញរបាយការណ៍ ស្តីពីសំណុំរឿងបទល្មើសព្រៃឈើ ដែលចំនួនជាង ១០០០ករណី ក្នុងរយៈពេល ៩ខែដើមឆ្នាំ ២០១៦នេះ។ ប៉ុន សោភ័ណ រាយការណ៍៖
ចុះផ្សាយនៅថ្ងៃ៖ កែប្រែថ្ងៃទី៖
នៅចំពោះមុខរបាយការណ៍នេះ លោក សេង សុខហេង ប្រធានអង្កការអភិវឌ្ឍសហគមន៍ ដើម្បីសន្តិភាព និងនិរន្តរភាពបានលើកឡើងថា នេះគឺជារបាយការណ៍ ដែលក្រសួងកសិកម្មខ្លួនឯង បានរកឃើញ។ ប៉ុន្តែបើតាមការសិក្សាស្រាវជ្រាវរបស់អង្កការលោកកន្លងមក រកឃើញថាបទលើ្មសព្រៃឈើមកទល់នឹងពេលនេះមានមិនតិចជាង ៥០០០ករណីនោះទេ។ ពិសេសនៅតាមតំបន់ជួរភ្នំក្រវាញ ដែលបទល្មើសព្រៃឈើនៅតែខ្លាំង ខេត្តរតនគីរី និងមណ្ឌលគីរី ចរាចរឈើនៅតែបន្តមាន ជាបន្តបន្ទាប់ និងតំបន់ព្រៃការពារ ដូចជាព្រៃឡង់ និងព្រៃរកាជាដើម។ តែយ៉ាងណា លោក សុខហេង បានសាទរចំពោះចំណាត់ការរបស់ក្រសួងកសិកម្ម និងសូមឱ្យក្រសួង ធ្វើយ៉ាងណា បង្កើនសកម្មភាពរបស់ខ្លួនបន្ថែមទៀត ឱ្យបានតឹងរ៉ឹង និងម៉ឺងម៉ាត់បំផុត បើមិនដូច្នេះទេ វាពិតជាពិបាកណាស់ក្នុងការទប់ស្កាត់បទល្មើសព្រៃឈើនេះ។
បច្ចុប្បន្ន បើទោះបីជាបទល្មើសព្រៃឈើត្រូវបានរឹតបន្តឹងយ៉ាងណាក្តី ក៏គេនៅតែសង្កេតឃើញថាបទល្មើសនេះនៅតែបន្តកើតមានជាហូរហែ។ ជាក់ស្តែង រយៈពេល ៩ខែដើមឆ្នាំ ២០១៦នេះ សំណុំរឿងបទល្មើសព្រៃឈើមានចំនួន ១១៦៦ករណី ដោយបានបញ្ជូនទៅតុលាការ ៨៧៣ករណី និងពិន័យអន្តរការណ៍ចំនួន ២៩៣ករណី។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។ ចំពោះការឃាត់ខ្លួនជនល្មើស និងដកហូតវត្ថុតាងមានដូចជា ឈើមូល ជ្រុង ៦៦៨២ម៉ែត្រគូប ឈើអារចំនួន ៥៤០៧ម៉ែត្រគូប ឈើក្រាក់ក្រញូងចំនួន ៤២ម៉ែត្រគូប និង ៥២៦គីឡូក្រាម សត្វព្រៃចម្រុះគ្រប់ប្រភេទចំនួន ១១៧២ក្បាល និង ៣០៦៥គីឡូក្រាម អនុផលព្រៃឈើ និងសម្ភារផ្សេងៗមួយចំនួនទៀត ព្រមទាំងដកហូតរណាយន្តបានចំនួន ២៤៩គ្រឿង។
ជាលទ្ធផលសម្រាប់រយៈពេល ៩ខែ ដើមឆ្នាំនេះ ចំណូលពីវិស័យព្រៃឈើ និងវិស័យជលផល មានប្រមាណជាង ៤លាន៥សែន ដុល្លារអាមេរិក។
លោក អ៊ូច ឡេង ប្រធានក្រុមកិច្ចការពិសេសសិទ្ធិមនុស្សកម្ពុជា (CHRTF) និងជាសកម្មជនព្រៃឈើម្នាក់ បានថ្លែងថា«យើងចង់ឃើញមន្ត្រីជំនាញចាត់វិធានការផ្លូវច្បាប់ស្មើគ្នាចំពោះជនទាំងឡាយដែលប្រព្រឹត្តខុសច្បាប់។ ហើយបើនិយាយពីចំណូលវិញ គឺមិនបានស្មើឈ្មួញដឹកឈើយកទៅលក់នៅក្រៅប្រទេសមួយជើងផង»។
គួរបញ្ជាក់ផងដែរថា កាលពីឆ្នាំ ២០១៥ ក្នុងពិធីបិទសន្និបាតក្រសួងកសិកម្ម រុក្ខាប្រមាញ់ និងនេសាទ លោកនាយករដ្ឋមន្ត្រីខ្មែរ បានដាក់បទបញ្ជាដោយផ្ទាល់មាត់ ជំរុញឱ្យអាជ្ញាធរ និងសមត្ថកិច្ចគ្រប់ជាន់ថ្នាក់ និងអ្នកពាក់ព័ន្ធទាំងអស់ ចាត់វិធានការបង្រ្កាបបទល្មើសព្រៃឈើ ដែលកំពុងកើតមានឡើងយ៉ាងក្តៅគគុកនៅប្រទេសកម្ពុជា។ នាឱកាសនោះលោក នាយករដ្ឋមន្ត្រី បញ្ជាក់ថា ការបង្រ្កាបបទល្មើសព្រៃឈើ មិនពិបាកដូចបង្រ្កាបគ្រឿងញៀននោះទេ ដូច្នេះអាជ្ញាធរគ្រប់លំដាប់ថ្នាក់ ត្រូវតែបង្រ្កាបឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ