ក្រោយរងទណ្ឌកម្មទិដ្ឋាការ កម្ពុជាបន្ទន់ជំហរព្រមទទួលពលរដ្ឋខ្មែរពីអាមេរិកវិញ
លោក ប្រាក់ សុខុន រដ្ឋមន្ដ្រីក្រសួងការបរទេសកម្ពុជា នៅព្រឹកថ្ងៃព្រហស្បតិ៍នេះ បានលើកឡើងថា កម្ពុជាព្រមទទួលយកពលរដ្ឋខ្មែរដែលប្រព្រឹត្តបទឧក្រិដ្ឋពីអាមេរិក ឲ្យពួកគេមករស់នៅស្រុកខ្មែរវិញ។ ជំហររបស់លោករដ្ឋមន្ដ្រីដូច្នេះ ធ្វើឡើងក្រោយពេលដែលសហរដ្ឋអាមេរិកបានដាក់ទណ្ឌកម្មទិដ្ឋាការខ្លះលើមន្ដ្រីការទូតជាន់ខ្ពស់ខ្មែរកាលពីម្សិលមិញ។
ចុះផ្សាយនៅថ្ងៃ៖
ស្តាប់ - ០២:១១
ថ្លែងនៅក្នុងបាឋកថា នាសាលាភូមិន្ទរដ្ឋបាល លោកប្រាក់ សុខុន បានសម្ដែងការសោកស្ដាយចំពោះការដាក់ទណ្ឌកម្មទិដ្ឋាការខ្លះពីសំណាក់អាមេរិក លើមន្ដ្រីការទូតជាន់ខ្ពស់កម្ពុជា។ អាមេរិកពន្យល់ពីការដាក់ទណ្ឌកម្មនោះថា គឺដោយសារតែកម្ពុជា មិនព្រមទទួលយកពលរដ្ឋរបស់ខ្លួនដែលប្រព្រឹត្តបទឧក្រិដ្ឋលើទឹកដីអាមេរិក ឲ្យមករស់នៅកម្ពុជាវិញ។
សម្រាប់លោក ប្រាក់ សុខុន កម្ពុជាមើលឃើញថា ការបញ្ជូនពលរដ្ឋខ្មែរដែលប្រព្រឹត្តល្មើសតែបានទទួលទោសរួចរាល់ឲ្យមករស់នៅកម្ពុជា គឺជាទង្វើអមនុស្សធម៌។ អមនុស្សធម៌ព្រោះពលរដ្ឋខ្មែរដែលត្រូវបញ្ជូនមកវិញនោះ បានធំធាត់ដឹងក្ដីនៅអាមេរិក មានគ្រួសារ មិត្តភក្តិបងប្អូននៅអាមេរិក។ ពួកគេមិនបានយល់ដឹង និងមិនអាចរស់នៅស្រុកខ្មែរតែឯងបានឡើយ។ នេះបើតាមលោក ប្រាក់ សុខុន។
លោករដ្ឋមន្ដ្រីបន្តថា កម្ពុជា មិនបានបដិសេធមិនទទួលយកពលរដ្ឋខ្មែរពីអាមេរិកវិញទេ។ កម្ពុជា គ្រាន់តែស្នើទៅអាមេរិកឲ្យធ្វើវិសោធនកម្មកិច្ចព្រមព្រៀងឆ្នាំ២០០២ ដោយទទួលយកពលរដ្ឋខ្មែរពីអាមេរិកវិញតាមគោលការណ៍ស្ម័គ្រចិត្តតែប៉ុណ្ណោះ។
យ៉ាងណាក៏ដោយ នៅពេលដែលអាមេរិកទាត់ចោលសំណើរបស់កម្ពុជា លោក ប្រាក់ សុខុន អះអាងថា កម្ពុជាមិនអាចធ្វើអ្វីបានទេ ក្រៅតែពីបន្តទទួលយកពលរដ្ឋខ្លួនពីអាមេរិក បើទោះបីជាការបញ្ជូនពីអាមេរិកមកនោះធ្វើដោយបង្ខំក៏ដោយ។ ប្រមុខការទូតកម្ពុជាសង្កត់ធ្ងន់ថា ចំពោះមុខនេះ កម្ពុជាព្រមទទួលយកពលរដ្ឋខ្មែរដែលប្រព្រឹត្តបទឧក្រិដ្ឋពីអាមេរិក ឲ្យពួកគេមករស់នៅស្រុកខ្មែរវិញ។ តែលោកសង្ឃឹមថា ទៅថ្ងៃមុខ នៅពេលដែលអាមេរិកទន់ចិត្តបន្តិច កម្ពុជានិងអាមេរិកអាចត្រឡប់មកជជែកគ្នាឡើងវិញ ដើម្បីដោះស្រាយបញ្ហានេះ តាមគោលការណ៍មនុស្សធម៌ និងមេត្តាធម៌។
សូមជម្រាបជូនថា ចាប់តាំងពីចុះកិច្ចព្រមព្រៀងរួមគ្នានៅឆ្នាំ២០០២ អាមេរិកបានបញ្ជូនពលរដ្ឋខ្មែរដែលបានអនុវត្តទោសរួច មកកម្ពុជាវិញ ចំនួនជាង៥០០នាក់។ ក្នុងចំណោមនោះ ពលរដ្ឋខ្មែរអាមេរិកាំងប្រមាណ២០នាក់បានស្លាប់បាត់បង់ជីវិត ភាគច្រើនដោយជំងឺ និង៤នាក់ទៀតស្លាប់ដោយការធ្វើអត្តឃាត ដោយសារតែមិនអាចធ្វើសមាហរណកម្មរស់នៅក្នុងសង្គមកម្ពុជាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ