ស្ថានទូតអាមេរិក លែងផ្ដល់ទិដ្ឋាការដល់មន្ដ្រីគ្រាក់ៗនៃក្រសួងការបរទេសកម្ពុជា
ចាប់ពីថ្ងៃទី១៣កញ្ញានេះតទៅ ស្ថានទូតអាមេរិកលែងផ្ដល់ទិដ្ឋាការប្រភេទមិនមែនអន្តោប្រវេសន៍មួយចំនួន ដល់មន្ដ្រីគ្រាក់ៗនៃក្រសួងការបរទេសខ្មែរទៀតហើយ។ ការដាក់ទណ្ឌកម្មទិដ្ឋាការនេះ ធ្វើឡើងដោយសារតែ កម្ពុជាបដិសេធ មិនព្រមទទួលយកពលរដ្ឋខ្លួនដែលបានប្រព្រឹត្តកំហុសលើទឹកដីអាមេរិកត្រឡប់មកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
មន្ដ្រីនៃក្រសួងការបរទេសកម្ពុជា ដែលមានតួនាទីចាប់ពីថ្នាក់អគ្គនាយក រហូតដល់ថ្នាក់ដឹកនាំកំពូល ព្រមទាំងសមាជិកក្រុមគ្រួសាររបស់ពួកគេ លែងអាចទទួលទិដ្ឋាការប្រភេទមិនមែនអន្តោប្រវេសន៍ពីស្ថានទូតអាមេរិកនៅភ្នំពេញទៀតហើយ។ នេះគឺជាការដាក់ទណ្ឌកម្មទិដ្ឋាការរបស់អាមេរិកចំពោះកម្ពុជា ហើយទណ្ឌកម្មទិដ្ឋាការនេះ មានករណីលើកលែងតិចតួចប៉ុណ្ណោះ។
បើតាមសេចក្ដីប្រកាសព័ត៌មានរបស់ស្ថានទូតអាមេរិក កម្ពុជាទទួលទណ្ឌកម្មទិដ្ឋាការនេះ ដោយសារតែប្រទេសកម្ពុជា មិនព្រមទទួលយកពលរដ្ឋរបស់ខ្លួនដែលប្រព្រឹត្តបទឧក្រិដ្ឋនៅអាមេរិកត្រឡប់មកវិញ។ ទណ្ឌកម្មទិដ្ឋាការនេះ នឹងមានសុពលភាពរហូត ប្រសិនបើកម្ពុជានៅតែប្រកាន់ជំហរដដែល។ ស្ថានទូតអាមេរិកអាចត្រឡប់មកផ្ដល់ទិដ្ឋាការដល់កម្ពុជាវិញ គឺដរាបណាកម្ពុជា កែប្រែជំហរ ហើយព្រមទទួលយកពលរដ្ឋរបស់ខ្លួន។
ជុំវិញការដាក់ទណ្ឌកម្មទិដ្ឋាការរបស់អាមេរិកលើកម្ពុជានេះ ក្រសួងការបរទេសខ្មែរ បានអះអាងថា ខ្លួនកំពុងតែពិនិត្យលើករណីនេះមុននឹងឆ្លើយតបត្រឡប់ទៅអាមេរិកវិញ។ លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានថ្លែងប្រាប់វិទ្យុបារាំងដូច្នេះ នៅល្ងាចថ្ងៃពុធ ទី១៣កញ្ញានេះ។
គួរជម្រាបជូនថា កម្ពុជាមិនមែនជាប្រទេសតែ១ដែលរងទណ្ឌកម្មទិដ្ឋាការពីអាមេរិកទេ។ ប្រទេសអេរីទ្រា ហ្គីណេ និងសៀរ៉ាឡេអូន ក៏ជួបជោគវាសនាដូចគ្នាដែរ ដោយសារតែមិនព្រម ទទួលយកពលរដ្ឋខ្លួនត្រឡប់ចូលប្រទេសវិញ។
ក្នុងសំណុំរឿងទទួលយកពលរដ្ឋត្រឡប់មកវិញនេះ ប្រមុខរដ្ឋាភិបាលកម្ពុជា ធ្លាប់ស្នើសុំអាមេរិក ឲ្យធ្វើវិសោធនកម្មកិច្ចព្រមព្រៀងដែលបានចុះហត្ថលេខារួមគ្នាកាលពីឆ្នាំ២០០២។ លោក ហ៊ុន សែន ចង់ឲ្យពលរដ្ឋខ្មែររស់នៅអាមេរិក ដែលប្រព្រឹត្តិកំហុសហើយទទួលទោសទៅតាមច្បាប់អាមេរិករួចរាល់ អាចរស់នៅអាមេរិកបន្តទៀតដើម្បីជួបជុំក្រុមគ្រួសារ ខណៈដែលរួមរស់ជាមួយគ្នាអស់រយៈពេលជាច្រើនឆ្នាំកន្លងមក។ ការបញ្ជូនពួកគេត្រឡប់មកកម្ពុជាវិញ ត្រូវបានលោកនាយរដ្ឋមន្ដ្រីខ្មែរចាត់ទុកថា ជាការរំលោភសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ