ជំងឺផ្ដាសាយបក្សីមិនទាន់កើតមានជាថ្មីនៅកម្ពុជាទេ តែអាជ្ញាធរចង់ឲ្យពលរដ្ឋប្រយ័ត្ន
ខណៈដែលជំងឺផ្ដាសាយបក្សីប្រភេទ H5N6 និង H7N9 កំពុងរាតត្បាតនៅតំបន់អាស៊ី ក្រសួងសុខាភិបាលបានគូសបញ្ជាក់ថា កម្ពុជានៅមិនទាន់មានករណីនេះនៅឡើយទេ។ មិនទាន់មានក៏ពិតមែន ប៉ុន្តែតាមរយៈសេចក្ដីណែនាំចុះថ្ងៃទី៤មករា ក្រសួងចង់ឲ្យពលរដ្ឋខ្មែរបង្កើនការប្រុងប្រយ័ត្ន ធ្វើយ៉ាងណាការពារខ្លួនពីមេរោគផ្ដាសាយបក្សី។ មេរោគផ្ដាសាយបក្សី ដែលនៅតែបន្តចរាចរ ឆ្លងរាលដាលពីប្រទេសមួយទៅកាន់ប្រទេសមួយទៀត ដោយគ្មានព្រំដែនកំណត់។
ចុះផ្សាយនៅថ្ងៃ៖
ស្តាប់ - ០២:២៦
វីរុសជំងឺផ្ដាសាយបក្សី ប្រភេទ H5N1 ធ្លាប់កើតនៅកម្ពុជាចំនួន៥៦ករណី ចាប់ពីឆ្នាំ២០០៥ ដល់ឆ្នាំ២០១៤ ក្នុងនោះមាន៣៧ករណី បានស្លាប់។ ប៉ុន្តែសម្រាប់ជំងឺផ្ដាសាយបក្សីប្រភេទ H5N6 និង H7N9 ដែលបានរីករាលដាលនៅប្រទេសជប៉ុន កូរ៉េខាងត្បូង និងចិន កាលពីពេលថ្មីៗនេះ នៅមិនទាន់មានវត្តមានលើទឹកដីកម្ពុជានៅឡើយទេ។
បើទោះបីជាយ៉ាងដូច្នេះក៏ដោយ ក្រសួងសុខាភិបាលបានណែនាំឲ្យពលរដ្ឋខ្មែរបង្កើនការប្រុងប្រយ័ត្នក្នុងការការពារខ្លួនកុំឲ្យឆ្លងមេរោគនេះ ជាពិសេសសម្រាប់ពលរដ្ឋខ្មែរដែលចង់ធ្វើដំណើរទៅប្រទេសក្រៅនារដូវបុណ្យចូលឆ្នាំចិន និងបុណ្យចូលឆ្នាំខ្មែរខាងមុខ។ បើអាចធ្វើទៅបាន ក្រសួងសុខាភិបាលចង់ឲ្យពលរដ្ឋចៀសវាងធ្វើដំណើរទៅកាន់ប្រទេស ឬទីកន្លែងដែលមានកើតករណីផ្ដាសាយបក្សី ហើយត្រូវនៅឲ្យឆ្ងាយពីសត្វបក្សីឈឺឬងាប់។ ត្រូវចៀសវាងប៉ះពាល់សត្វបក្សីឬលាមករបស់វា នៅតាមកសិដ្ឋាន សត្តឃាត និងទីផ្សារបក្សីរស់។ ក្នុងករណីដែលបានប៉ះពាល់បសុបក្សី ពលរដ្ឋត្រូវលាងដៃឲ្យបានញឹកញាប់ជាមួយសាប៊ូនិងទឹកស្អាត។
ក្រសួងសុខាភិបាលបញ្ជាក់ថា វីរុសផ្ដាសាយបក្សីចរាចរនៅក្នុងចំណោមបក្សីគ្នាឯង និងឆ្លងមកកាន់មនុស្ស។ ប៉ុន្តែវីរុសនេះមិនមានសមត្ថភាពងាយចម្លងពីមនុស្សទៅមនុស្សនៅឡើយទេ។ ហើយវាមិនអាចឆ្លងបានទេ ប្រសិនបើពលរដ្ឋកាន់ ឬបរិភោគបសុបក្សី ស៊ុត ឬម្ហូបអាហារណាដែលបានចម្អិនត្រឹមត្រូវល្អហើយ។
រោគសញ្ញានៃជំងឺផ្ដាសាយបក្សីរួមមាន៖ គ្រុនក្ដៅលើសពី៣៨,៥អង្សាសេ ក្អក ពិបាកដកដង្ហើម ដែលអាចបណ្ដាលឲ្យស្លាប់បាន។ ផ្ដាសាយបក្សីប្រភេទ H5N1, H7N9 និង H5N6 គ្មានវ៉ាក់សាំងសម្រាប់ការពារទេ។ តែការព្យាបាលអាចធ្វើបានដោយប្រើថ្នាំប្រឆាំងមេរោគគ្រុនផ្ដាសាយ ដែលអាចមានប្រសិទ្ធភាពដោយរួម ជាមួយនឹងការព្យាបាលរោគសញ្ញាផង។ ប្រសិនបើមានករណីសង្ស័យជំងឺផ្ដាសាយបក្សី ក្រសួងអំពាវនាវឲ្យពលរដ្ឋស្វែងរកការព្យាបាលជាបន្ទាន់នៅតាមមន្ទីរពេទ្យសាធារណៈ ហើយត្រូវជម្រាបមន្ដ្រីសុខាភិបាលអំពីប្រវត្តិជំងឺ និងប្រវត្តិនៃការធ្វើដំណើរ ព្រមទាំងប្រវត្តិប៉ះពាល់សត្វបក្សីឈឺឬងាប់ ដើម្បីបានទទួលការព្យាបាលទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ