កង្វះអុកស៊ីសែននិងភ្លើងឆេះព្រៃ ជាហេតុផលនៃការងាប់របស់ត្រី៦៨តោននៅបឹងទន្លេឆ្មាក្នុងខេត្តកំពង់ធំ
ក្រសួងបរិស្ថាន និងអាជ្ញាធរទន្លេសាប ទើបតែបានចេញសេចក្តីប្រកាសនៅថ្ងៃនេះថា មូលហេតុនៃការងាប់របស់ត្រីរាប់សិបតោននៅតំបន់រ៉ាមសារបឹងទន្លេឆ្មា ក្នុងខេត្តកំពង់ធំកន្លងមកនេះ គឺបណ្តាលមកពីកង្វះអ៊ុកស៊ីសែន និង ភ្លើងឆេះព្រៃ។ ប៉ុន្តែយ៉ាងណាក៏ដោយ នេះមិនមែនជាលើកទីមួយនោះទេ។
ចុះផ្សាយនៅថ្ងៃ៖
ស្តាប់ - ០២:៣៣
លទ្ធផលដែលត្រូវបានបង្ហាញតាមរយៈសេចក្តីប្រកាសរួមរបស់ក្រសួងបរិស្ថាន និងអាជ្ញាធរទន្លេសាបនៅថ្ងៃទី៣០មេសា គឺបានធ្វើឡើងបន្ទាប់ពីការចុះអង្កេតដ៏ម៉ត់ចត់របស់ក្រុមអ្នកជំនាញមកពីស្ថាប័នទាំងពីរ ទៅលើមូលហេតុនៃការងាប់របស់ត្រីរាប់សិបតោន នៅក្នុងតំបន់រ៉ាមសារបឹងទន្លេឆ្មា ក្នុងខេត្តកំពង់ធំ។
បើតាមសេចក្តីប្រកាសព័ត៌មានរួមគ្នានេះ ការងាប់របស់ត្រីដែលរហូតមកដល់ពេលនេះ មានចំនួនដល់ទៅ ៦៨តោននោះ គឺបណ្តាលមកពីកង្វះអ៊ុកស៊ីសែន និងបណ្តាលមកពីភ្លើងឆេះព្រៃលិចទឹកដែលស្ថិតនៅជុំវិញតំបន់រ៉ាមសារបឹងទន្លេឆ្មា ក្នុងស្រុកស្ទោងខេត្តកំពង់ធំ។ បើតាមការប្រកាសដដែលនេះ ត្រីដែលងាប់ភាគច្រើន គឺជាប្រភេទត្រីរំអិល ដែលត្រូវការអុកស៊ីសែនខ្ពស់ ដូចជា ត្រីរៀល ត្រីច្រកែង ត្រីកញ្ចុះ និងត្រីតាអោនជាដើម។
នៅក្នុងសេចក្តីប្រកាសនេះបានបញ្ជាក់ថា ជារៀងរាល់ឆ្នាំ នៅក្នុងខែមេសានិងខែឧសភា អាកាសធាតុមានស្ថានភាពក្តៅហួតហែងខ្លាំង និងដោយពុំមានបរិមាណទឹកភ្លៀងធ្លាក់ផងនោះ បានធ្វើឲ្យផ្ទៃទឹកបឹងមួយភាគធំគោករីងរាក់ សម្បូរណ៍ភក់ច្រើន និងការឡើងកំដៅនៃទឹកផងនោះ បានធ្វើឲ្យបរិមាណអុកស៊ីសែននៅក្នុងបឹងមានការថយចុះ។
យ៉ាងណាក៏ដោយ នៅចំពោះមុខនេះ ក្រសួងបរិស្ថាន និងអាជ្ញាធរទន្លេសាប កំពុងសហការជាមួយស្ថាប័នពាក់ព័ន្ធនានា ដើម្បីចុះដាក់វិធានការបឋមនានា ក្នុងនោះ មានការបង្កើតទីជម្រកដោយដាក់ពង្រាយកំប្លោក និងបូមទឹកបញ្ចូលក្នុងបឹងដើម្បីបង្កើនបរិមាណអ៊ុកស៊ីសែនជាដើម។
បើតាមសេចក្តីប្រកាសព័ត៌មានដដែលថា នេះមិនមែនជាលើកទីមួយទេ ដែលមានវត្តមានត្រីងាប់ដ៏ច្រើនបែបនេះ។ ជាក់ស្តែងនៅក្នុងខែមិថុនាឆ្នាំ២០១៤ ត្រីចំនួន៨៩តោនក៏បានងាប់ ហើយនៅខែឧសភាឆ្នាំ២០១៥ ត្រីចំនួន១៧៦តោនក៏បានងាប់ផងដែរ។ យ៉ាងណាក៏ដោយ ក្រសួងបរិស្ថាន និងអាជ្ញាធរទន្លេសាប បានកត់សំគាល់ថា កត្តាប្រែប្រួលអាកាសធាតុ និងគ្រោះរាំងស្ងួតខ្លាំងនៅឆ្នាំ២០១៦នេះបានធ្វើឲ្យប៉ះពាល់យ៉ាងធ្ងន់ធ្ងរទៅដល់ធនធានជលផល នៅតំបន់រ៉ាមសារបឹងទន្លេឆ្មាក្នុងខេត្តកំពង់ធំនេះ។
សូមបញ្ជាក់ដែរថា គ្រោះរាំងស្ងួតនិងការឡើងកំដៅមិនធ្លាប់មាននៅកម្ពុជាដល់ទៅ៤២អង្សាសេនេះ មិនមែនត្រឹមតែធ្វើឲ្យត្រីក្នុងទឹកងាប់នោះទេ ក៏ប៉ុន្តែសត្វព្រៃនិងសត្វស្រុក ទាំងនៅលើគោកនិងលើអាកាសក៏បានងាប់ជាបន្តបន្ទាប់ផងដែរ។ ចំណែកឯមនុស្សវិញ បើទោះបីជាមិនទាន់មានសេចក្តីរាយការណ៍នៃការស្លាប់ដោយសារតែអត់ទឹកមែន ក៏ប៉ុន្តែកម្ពុជាពេលនេះ ក៏កំពុងបើកយុទ្ធនាការចុះចែកទឹកជូនដល់ប្រជាពលរដ្ឋនៅ១៨ខេត្ត ខណៈដែលទឹកបឹងបួរធំតូចកំពុងរីងខះស្ទើតែទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ