ក្រសួងរ៉ែ និងថាមពល បដិសេធ ការចោទប្រកាន់របស់សកម្មជនអង្គការមាតាធម្មជាតិដែលថា ក្រសួង រំលោភលើការផ្អាកបណ្តោះអាសន្ននៃនាំចេញខ្សាច់។
ក្រសួងរ៉ែ និងថាមពល នៅថ្ងៃសុក្រ ទី ៥ ឧសភានេះ បានចេញលិខិតបំភ្លឺមួយ បដិសេធ ជុំវិញការចោទប្រកាន់របស់សកម្មជនអង្គការមាតាធម្មជាតិដែលថា ក្រសួងបានរំលោភលើការផ្អាកបណ្តោះអាសន្ននៃនាំចេញខ្សាច់។ ការចេញសេចក្តីបំភ្លឺនេះ ធ្វើឡើងបន្ទាប់ពីមានសកម្មជននៃអង្គការមាតាធម្មជាតិបានបង្ហោះវីដេអូនៅលើ Facebook របស់ខ្លួន អំពីសកម្មភាពកប៉ាល់ផ្ទុកខ្សាច់នាំចេញទៅក្រៅប្រទេស កាលពីថ្ងៃទី០១ ខែឧសភា ឆ្នាំ ២០១៧កន្លងទៅថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:២០
ក្រសួងរ៉ែ និងថាមពលបានលើកឡើងថា ការចោទប្រកាន់របស់សកម្មជនអង្គការមាតាធម្មជាតិ គឺជាទង្វើខុសពីការពិត។ ព្រោះនៅក្នុងវីដេអូដែលបង្ហោះនៅថ្ងៃទី ១ ឧសភា ដោយអង្គការមាតាធម្មជាតិនោះគ្មានបញ្ជាក់ទីតាំងពិតប្រាកដ ពេលវេលាដែលថត ឈ្មោះកប៉ាល់ និង ប្រភេទខ្សាច់នោះឡើយ តែគ្រាន់តែបញ្ជាក់ថា ជាកប៉ាល់យក្សចំណុះ ៣ម៉ឺនតោន។ មិនត្រឹមតែប៉ុណ្ណោះ កាលពីថ្ងៃទី ២ ឧសភា ក្រសួងបានចាត់មន្ត្រីមន្ទីរនៃបណ្តាខេត្តជាប់មាត់សមុទ្រទាំងអស់ ត្រួតពិនិត្យមើលតើមានកប៉ាល់ណាដែលកំពុងផ្ទុកខ្សាច់ដែរឬទេ ប៉ុន្តែជាលទ្ធផលគ្មានមានកប៉ាល់ចំណុះ ៣ម៉ឺនតោននោះឡើយ។ ចំណែកពត៌មានដែលបានមកពីភ្នាក់ងារកម្ពុជានាវាចរ “កាំសាប’’ ទៀតសោត ក៏បានបញ្ជាក់ថាកប៉ាល់ដែលចូលមកមានឈ្មោះ Deryoung SunFlower មានចំណុះត្រឹមតែ ៨៦៧៩តោនប៉ុណ្ណោះ កប៉ាល់នោះបានចូលមកដែនសមុទ្រកម្ពុជាក្នុងខេត្តព្រះសីហនុ ហើយមានការអនុញ្ញាតពីកាំសាបដោយភា្ជប់មកជាមួយនូវប្រតិវេទន៍ចេញ-ចូល ច្បាស់លាស់ត្រឹមត្រូវ គឺចូលថ្ងៃទី ២៥ ខែឧសភា វេលាម៉ោង ៩:00 ចេញទៅវិញនៅថ្ងៃទី ១ ខែឧសភា វេលាម៉ោង ១៥:00។ ដូច្នេះថ្ងៃដែលអង្គការមាតាធម្មជាតិបង្ហោះវីដេអូនោះ ជាថ្ងៃដែលកប៉ាល់បានចាកចេញហើយ ។
ទោះជាយ៉ាងនេះក្តី វីដេអូខ្លីរបស់អង្គការមាតាធម្មជាតិ ដែលបានបង្ហោះនៅថ្ងៃទី ១ ខែឧសភាដើមសប្តាហ៍នេះ បានបង្ហាញពីសកម្មភាព ដែលទំនងជាការផ្ទេរខ្សាច់ពីកាណូតមួយចូលទៅក្នុងកប៉ាល់ធំមួយនៅខេត្តព្រះសីហនុ។
វីដេអូដែលត្រូវបានបង្ហោះកាលពីរាត្រីថ្ងៃចន្ទនោះ មានអ្នកចុច Likes ចំនួន ២៦០០០នាក់ និងត្រូវបាន Share ចំនួន ៣៧០០០ ដង គិតត្រឹមព្រឹកថ្ងៃសុក្រនេះ។
នៅក្នុងវីដេអូខ្លីបប្រមាណ ១នាទីកន្លះ, កញ្ញា លីម គីមស័រ ជាសកម្មជនរបស់អង្គការ មាតាធម្មជាតិ បានចោទជាសំនួរថាទៅកាន់រដ្ឋមន្រ្តីក្រសួងធនធានរ៉ែ និងថាមពលថា ៖ តើសេចក្តីប្រកាសរបស់ក្រសួងដែលថាផ្អាកមិនឱ្យនាំចេញខ្សាច់ចេញទៅក្រៅប្រទេសគឺជាឆន្ទះពិតប្រាកដក្នុងការស្វែងរកដំណោះស្រាយជូនសង្គមជាតិ ក៏ដូចជាប្រជាពលរដ្ឋខ្មែរ ឬមួយជាការបន្លំភ្នែកដើម្បីផ្តល់ឱកាសដើម្បីឲ្យបុគ្គលមានអំណាចមួយចំនួន បន្តបំផ្លាញជីវភាពរបស់ប្រជាពលរដ្ឋ ក៏ដូចធនធានធម្មជាតិខ្មែរ? »
គួររំលឹកជូនថា ក្រសួងរ៉ែ និងថាមពល កាលពីចុងឆ្នាំ ២០១៦ បានចេញបម្រាមផ្អាកការបូមខ្សាច់នៅខេត្តកោះកុង និងការនាំចេញខ្សាច់ទៅក្រៅប្រទេសទាំងអស់ ដោយគ្មានកំណត់រយៈពេល។ បម្រាមនេះ កើតឡើងក្រោយពេលបណ្ដាអង្គការសង្គមស៊ីវិល និងប្រព័ន្ធផ្សព្វផ្សាយ រកឃើញខ្សាច់ជាង ៦០លានតោន បានបាត់ពីប្រព័ន្ធទិន្នន័យរបស់រដ្ឋាភិបាលកម្ពុជា នៃការនាំចេញខ្សាច់ទៅប្រទេសសិង្ហបុរី ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ