ព្រះសង្ឃចូលរួមឃោសនាបោះឆ្នោតខុសដែរឬទេ?
ចុះផ្សាយនៅថ្ងៃ៖
ស្តាប់ - ០៣:៥២
យុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់នៅកម្ពុជា បានឈានចូលដល់ថ្ងៃទី៧ហើយ គិតត្រឹមថ្ងៃសុក្រនេះ។ ក្នុងអំឡុងពេលនេះ សាធារណជនទូទៅបានសម្ដែងក្ដីងឿងឆ្ងល់ នៅពេលសង្កេតឃើញថា មានព្រះសង្ឃ ចូលរួមនៅក្នុងក្បួនឃោសនាបោះឆ្នោតនោះដែរ។ ក្រៅពីសម្ដែងចម្ងល់ មតិទូទៅចោទសួរថាតើការចូលរួមរបស់ព្រះសង្ឃ នៅក្នុងការឃោសនាបោះឆ្នោតដូច្នេះ ខុសដែរឬទេ?
ព្រះសង្ឃ គឺជាបព្វជិត ជាក្រុមបុគ្គលដែលបួសចូលកាន់ភេទជាសមណៈ នៅក្នុងព្រះពុទ្ធសាសនា។ ជាទូទៅ ភេទជាសង្ឃនេះ គឺខុសពីគ្រហស្ថធម្មតា។ ខុសព្រោះសម្រាប់ព្រះសង្ឃគឺជាអ្នកទទួលយកការប្រៀនប្រដៅរបស់ព្រះពុទ្ធ ហើយយកទៅប្រតិបត្តិតាមឲ្យបានតឹងរ៉ឹង និងប្រសើរថ្លៃថ្លាជាងគ្រហស្ថ។ គឺដោយសារតែភាពមិនធម្មតានេះហើយដែលធ្វើឲ្យមតិទូទៅចោទសួរពីភាពត្រឹមត្រូវ និងស្របច្បាប់នៃការចូលរួមរបស់ព្រះសង្ឃនៅក្នុងការងារនយោបាយ ពិសេសគឺការចូលរួមឃោសនាបោះឆ្នោតតែម្ដង។
នៅក្នុងយុទ្ធនាការឃោសនាបោះឆ្នោតថ្មីៗនេះ គេកត់សម្គាល់ឃើញថា មានព្រះសង្ឃចូលរួមនៅក្នុងក្បួនឃោសនា ដោយមានកាន់ស្លាកសញ្ញាគណបក្ស ពាក់មួក និងស្រែកជ័យឃោសជាមួយសកម្មជនគណបក្សផ្សេងទៀត។
សម្រាប់ពុទ្ធសាសនិកជនប្រកាន់តឹងមួយចំនួន ព្រះសង្ឃមិនគួរចូលរួមឃោសនាបោះឆ្នោតដូច្នេះទេ។ មិនគួរ ព្រោះសម្រាប់ពួកគេ ព្រះសង្ឃ ជាអ្នកផ្សព្វផ្សាយសាសនា ដែលគួរតែជាបុគ្គលដែលអព្យាក្រឹត មិនលម្អៀង ឬប្រកាន់បក្ខពួក។ ម្យ៉ាង ការចូលរួមនៅក្នុងវិស័យនយោបាយរបស់ព្រះសង្ឃ ជួយឃោសនាឲ្យគណបក្សណាមួយ អាចជះឥទ្ធិពលអវិជ្ជមាន ប៉ះពាល់ដល់សាសនា និងបង្កើតជាការបែកបាក់នៅក្នុងចំណោមពុទ្ធបរិស័ទ និងព្រះសង្ឃដូចគ្នា។ ឬបើពុំដូច្នោះ ជំនឿរបស់ពុទ្ធបរិស័ទលើព្រះពុទ្ធសាសនា អាចនឹងថមថយ ដោយពួកគេយល់ថា ព្រះសង្ឃ បម្រើនយោបាយ ច្រើនជាងបម្រើសាសនា។
ប៉ុន្តែបើគេក្រឡេកមើលក្នុងទិដ្ឋភាពច្បាប់ ទាំងរដ្ឋធម្មនុញ្ញដែលជាច្បាប់កំពូល និងច្បាប់បោះឆ្នោតផង មិនបានហាមឃាត់មិនឲ្យព្រះសង្ឃចូលរួមឃោសនាបោះឆ្នោតទេ។ បើតាមរដ្ឋធម្មនុញ្ញ ប្រជាពលរដ្ឋខ្មែរគ្រប់រូប ក្នុងនោះមានទាំងព្រះសង្ឃផង មានសិទ្ធិចូលរួមយ៉ាងសកម្មក្នុងជីវភាពនយោបាយ។ ចំណែកនៅក្នុងច្បាប់បោះឆ្នោតវិញ ការហាមឃាត់មិនឲ្យចូលរួមឃោសនាបោះឆ្នោត មានតែសម្រាប់ជនបរទេស មន្ដ្រីអង្គការសង្គមស៊ីវិល ក៏ដូចជាមន្ដ្រីរាជការស៊ីវិល អាជ្ញាធរដែនដី មន្ដ្រីតុលាការ និងប៉ូលីសទាហានដែលកំពុងបំពេញភារកិច្ចប៉ុណ្ណោះ។
ការចូលរួមឃោសនាបោះឆ្នោតរបស់ព្រះសង្ឃ មែនទែនទៅ គឺជាប្រធានបទនៃការជជែកពិភាក្សាដ៏ក្ដៅគគុកជាច្រើនអាណត្តិមកហើយ។ ថ្វីដ្បិតតែការចូលរួមឃោសនាបោះឆ្នោតរបស់ព្រះសង្ឃមិនខុសច្បាប់ក៏ដោយ ក៏មតិទូទៅ ពិសេសក្នុងចំណោមព្រះសង្ឃគ្នាឯងតែម្ដង នៅតែវែកញែកមិនអស់មិនហើយ អំពីភាពសមគួរនៃទង្វើនេះ។
កន្លងមក សម្ដេចសង្ឃទាំងពីរគណៈ បានស្នើឲ្យព្រឹទ្ធសភា រដ្ឋសភា និងរដ្ឋាភិបាល បង្កើតច្បាប់ដើម្បីដាក់ព្រះសង្ឃជាបុគ្គលអព្យាក្រឹត ដោយមិនអនុញ្ញាតឲ្យព្រះសង្ឃចូលប្រឡូកក្នុងសកម្មភាពនយោបាយ ឬឃោសនាគាំទ្រគណបក្សនយោបាយណាមួយឡើយ។ នៅក្នុងមហាសន្និបាតសង្ឃនាពេលកន្លងទៅ សម្ដេចសង្ឃ បួរ គ្រី បានបញ្ជាក់ថា អព្យាក្រឹតភាពរបស់ព្រះសង្ឃ សំខាន់ណាស់ ដើម្បីឲ្យព្រះសង្ឃខ្មែរគ្រប់អង្គបំពេញកាតព្វកិច្ចជាស្រែបុណ្យដ៏ប្រសើរ ដើម្បីញ៉ាំងសទ្ធាជ្រះថ្លានៃព្រះពុទ្ធសាសនា ដែលជាសាសនារបស់រដ្ឋ។
ដូច្នេះ សរុបមកវិញ នៅក្នុងចំណោទអំពីភាពត្រឹមត្រូវនិងស្របច្បាប់នៃការចូលរួមរបស់ព្រះសង្ឃនៅក្នុងការឃោសនាបោះឆ្នោត គេមានចម្លើយពីរ។ តាមផ្លូវច្បាប់ និងសម្រាប់អ្នកប្រជាធិបតេយ្យនិយម ព្រះសង្ឃគឺជាបុគ្គលដែលមានសិទ្ធិគ្រប់គ្រាន់ដូចពលរដ្ឋខ្មែរដទៃទៀតដែរ ហើយអាចចូលរួមឃោសនាបោះឆ្នោតជាមួយគណបក្សនយោបាយដែលខ្លួនស្រឡាញ់ពេញចិត្ត។ ប៉ុន្តែសម្រាប់ពុទ្ធបរិស័ទប្រកាន់តឹង ការចូលរួមក្នុងយុទ្ធនាការឃោសនាបោះឆ្នោត មិនមែនជាសកម្មភាពដែលព្រះសង្ឃ គួរប្រតិបត្តិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ