ពលរដ្ឋជាង១ពាន់នាក់ ប្រារព្ធទិវាចងកំហឹង២០ឧសភា នៅជើងឯក
ថ្ងៃទី២០ខែឧសភានេះ គឺជាទិវាចងកំហឹង និងរំលឹកវិញ្ញាណក្ខន្ធជនរងគ្រោះដែលបានស្លាប់នៅក្នុងរបបប្រល័យពូជសាសន៍ខ្មែរក្រហម។ នៅឆ្នាំ២០១៥នេះ មន្ដ្រីរាជការ អាជ្ញាធរដែនដី ប្រជាពលរដ្ឋ និងសិស្សនិស្សិត សរុបជាង១ពាន់នាក់ បានជួបជុំប្រារព្ធទិវាចងកំហឹង ២០ ឧសភានេះ នៅសារមន្ទីរប្រល័យពូជសាសន៍ជើងឯក ក្រោមអធិបតីភាព លោក ប៉ា សុជាតិវង្ស អភិបាលរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ដូចរៀងរាល់ឆ្នាំដែរ ទិវាចងកំហឹងចំពោះរបបខ្មែរក្រហម ត្រូវបានប្រារព្ធឡើងនៅព្រឹកថ្ងៃទី២០ខែឧសភានេះ នៅមជ្ឈមណ្ឌលប្រល័យពូជសាសន៍ជើងឯក ស្ថិតក្នុងខណ្ឌដង្កោ ក្រោមអធិបតីភាព លោក ប៉ា សុជាតិវង្ស អភិបាលរាជធានីភ្នំពេញ។ កម្មវិធីសាសនា ដូចជាពិធីរាប់បាត្រ បង្សុកូលប្រគេនព្រះសង្ឃ ត្រូវបានរៀបចំឡើង ដើម្បីឧទ្ទិសកុសលជូនដល់ដួងវិញ្ញាណក្ខន្ធរបស់ជនរងគ្រោះនៅក្នុងរបបខ្មែរក្រហមទាំងអស់។
ក្រៅពីនេះ ក៏មានដែរ ការថ្លែងសារពីវិយោគកថារបស់ប្រជាពលរដ្ឋរងគ្រោះ នៅក្នុងរបបខ្មែរក្រហម។ ចំណែកការសម្ដែងសិល្បៈ ពីឈុតឆាកធ្វើទារុណកម្ម កាប់សម្លាប់ជាច្រើន នៅក្នុងរបបវាលពិឃាត ៣ឆ្នាំ៨ខែ២០ថ្ងៃ ក៏ត្រូវបានរៀបចំឲ្យមានដូចរៀងរាល់ឆ្នាំផងដែរ។
គួរជម្រាបជូនថា ទិវាចងកំហឹង ថ្ងៃទី២០ឧសភា ត្រូវបានអនុម័តដោយរដ្ឋសភា ក្នុងឆ្នាំ១៩៨៣ ក្នុងគោលបំណងចងចាំមិនភ្លេច នូវសោកនាដកម្មដ៏ខ្លោចផ្សានៅក្នុងរបបខ្មែរក្រហម។ របបខ្មែរក្រហម ដែលបានធ្វើឲ្យប្រជាពលរដ្ឋខ្មែរជិត២លាននាក់ ស្លាប់បាត់បង់ជីវិត នៅក្នុងរយៈពេល ៣ឆ្នាំ ៨ខែ និង២០ថ្ងៃ។
ទោះជាយ៉ាងណាក៏ដោយ ទិវាចងកំហឹងនេះ បានចាប់ផ្ដើមសាបរលាបបន្តិចម្ដងៗ ចាប់តាំងពីឆ្នាំ១៩៩២រហូតមកទល់នឹងពេលនេះ។ ការប្រារព្ធទិវាចងកំហឹង២០ឧសភានេះ ត្រូវបានរៀបចំឡើងជារៀងរាល់ឆ្នាំក៏ពិតមែន ប៉ុន្តែការរៀបចំធ្វើឡើងក្នុងរូបភាពតូច និងស្ងៀមស្ងាត់ នៅក្នុងរង្វង់គណបក្សប្រជាជនកម្ពុជាតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ