បន្ទាប់ពីបុរសខ្លាំងចេញបញ្ជា ក្រសួងបានណែនំាដល់មន្ត្រីពាក់ព័ន្ធឲ្យចាត់វិធានការជាបន្ទាន់ចំពោះសំណង់ខុសច្បាប់
ក្រសួងរៀបចំដែនដី នគរូបនីយកម្ម និងសំណង់ នៅថ្ងៃអង្គារទី ១០វិច្ឆិកា ម្សិលមិញនេះ បានចេញលិខិតជាសាធារណៈមួយ ណែនាំឲ្យអភិបាល នៃគណៈអភិបាលរាជធានី ខេត្តចាត់វិធានការជាបន្ទាន់ទប់ស្កាត់ និងរុះរើសំណង់ខុសច្បាប់ ដែលរំលោភលើដីសាធារណៈនៅតាមបណ្តារាជធានីខេត្ត។ សេចក្តីណែនាំនេះត្រូវបានធ្វើឡើង បន្ទាប់ពីលោកនាយករដ្ឋមន្ត្រីកម្ពុជា ហ៊ុន សែន បានបញ្ជាឲ្យក្រុមហ៊ុន NAGA រុះរើសំណង់របស់ខ្លួនចេញ បន្ទាប់ពីលោកពិនិត្យឃើញដោយផ្ទាល់ថាសំណង់នេះ សាងសង់ឡើងខុសច្បាប់។
ចុះផ្សាយនៅថ្ងៃ៖
ស្តាប់ - ០២:០៦
សេចក្តីណែនាំរបស់ក្រសួងរៀបចំដែនដី នគរូបនីយកម្ម និងសំណង់ ដែលមានចុះហត្ថលេខាដោយលោកទេសរដ្ឋមន្ត្រី អ៊ឹម ឈុនលឹម បានតម្រូវឲ្យអភិបាលនៃគណៈអភិបាលរាជធានី ខេត្ត និងជាប្រធានគណៈបញ្ជាការឯកភាពរាជធានី ខេត្ត ត្រូវចាត់វិធានការ ទី១ ផ្សព្វផ្សាយឲ្យបានទូលំទូលាយដល់ប្រជាពលរដ្ឋ និងធុរជនឲ្យបានជ្រួតជ្រាប និងចូលរួមអនុវត្តវិធានការកែតម្រូវសំណង់ខុសច្បាប់។ ទី២ កំណត់អត្តសញ្ញាណសំណង់ដែលសាងសង់រំលោភលើដីសាធារណៈ ដូចជា ដីចំណីផ្លូវសាធារណៈ សួនច្បារសាធារណៈ និងទីតាំងសាធារណៈផ្សេងទៀតក្នុងដែនសមត្ថកិច្ចរបស់ខ្លួន ដោយចាប់ផ្តើមពីទីតាំងដែលមានកំណត់ទំហំដីចំណីផ្លូវសាធារណៈច្បាស់លាស់រួចហើយ និងចាត់វិធានការតឹងរឹងឲ្យម្ចាស់សំណង់ធ្វើការរុះរើ ឬកែតម្រូវជាបន្ទាន់។ និងទី៣ ទប់ស្កាត់ឲ្យខាងតែបានរាល់ការសាងសង់សំណង់ខុសច្បាប់រំលោភលើដីសាធារណៈ តទៅមុខទៀត។
លោកឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់ប្រាប់វិទ្យុបារាំងថា ជាការពិតគឺមានសំណង់ខុសច្បាប់ជាច្រើនដែលត្រូវបានសាងសង់ឡើង។ ប៉ុន្តែរដ្ឋាភិបាលក៏ដូចជាសាលារាជធានីភ្នំពេញ ក៏បានចាត់ទុកបញ្ហានេះ ជាបញ្ហាអាទិភាពដើម្បីដោះស្រាយ និងកែលម្អសោភ័ណភាពនៅក្នុងទីក្រុង។ លោកបានបន្តថា សាលារាជធានីរង់ចាំទទួលរាល់បទបញ្ជាពីថ្នាក់លើជាតិ ដើម្បីអនុវត្តនូវតួនាទីរបស់ខ្លួន ហើយថាបញ្ហានេះក៏ត្រូវបានកំពុងដោះស្រាយដែរ។
គួររំលឹកជូនថា កាលពីថ្ងៃទី ៥វិច្ឆិកា កន្លងទៅនេះ លោកនាយករដ្ឋមន្ត្រីហ៊ុន សែនបានចុះទៅពិនិត្យមើលដោយផ្ទាល់ ការដ្ឋានសំណង់របស់ក្រុមហ៊ុន NAGA ដែលបានសង់ខុសច្បាប់អនុញ្ញាត ក៏ដូចជាការប៉ះពាល់ ដល់សោភ័ណភាពរាជធានីភ្នំពេញ។ លោក ហ៊ុន សែន ក៏បានណែនាំឲ្យអាជ្ញាធរ មានសមត្ថកិច្ច និងជំនាញពាក់ព័ន្ធទាំងអស់ពិភាក្សា និងមានវិធានការកែលម្អ ជាបន្ទាន់ នូវសំណង់អគាររបស់ក្រុមហ៊ុន NAGA World ដើម្បីធ្វើយ៉ាងណាឲ្យរក្សាបាននូវលំហសាធារណៈ សម្រាប់ប្រជាពលរដ្ឋទៅកំសាន្តនៅសួនសម្តេចហ៊ុន សែន។ ហើយភា្លមៗសាលារាជធានីភ្នំពេញ និងក្រសួងរៀបចំដែនដី នគររូបនីយកម្មនិងសំណង់ ក៏បានជួបប្រជុំគ្នាដើម្បីសម្រេចជាបន្ទាន់នៅរសៀលថ្ងៃនោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ