រដ្ឋសភាប្រជុំអនុម័តសេចក្ដីព្រាងច្បាប់៣ ដោយគ្មានស្រមោលតំណាងរាស្ត្របក្សប្រឆាំង
ដូចការគ្រោងទុក នៅព្រឹកថ្ងៃចន្ទ ទី៣០វិច្ឆិកានេះ រដ្ឋសភាកម្ពុជាបានបើកកិច្ចប្រជុំពេញអង្គរបស់ខ្លួន ដើម្បីពិភាក្សាអនុម័តសេចក្ដីព្រាងច្បាប់ថវិកាជាតិឆ្នាំ២០១៦ សេចក្ដីព្រាងច្បាប់ស្ដីពីស្ថិតិ និងសេចក្ដីព្រាងច្បាប់ស្ដីពីទូរគមនាគមន៍។ ជាការកត់សម្គាល់ កិច្ចប្រជុំពេញអង្គរដ្ឋសភានៅព្រឹកថ្ងៃចន្ទនេះ ធ្វើឡើងដោយគ្មានស្រមលោកតំណាងរាស្ត្របក្សប្រឆាំងចូលរួមឡើយ។ គឺមានតែវត្តមានតំណាងរាស្ត្រ៦៦រូប មកពីបក្សកាន់អំណាចប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១៩
តំណាងរាស្ត្រមកពីគណបក្សសង្គ្រោះជាតិទាំង៥៥រូប នៅថ្ងៃចន្ទនេះ បានសម្រេចមិនចូលរួមកិច្ចប្រជុំពេញអង្គរបស់រដ្ឋសភាទេ។ លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បញ្ជាក់ប្រាប់វិទ្យុបារាំងអន្ដរជាតិនៅថ្ងៃចន្ទនេះថា មានមូលហេតុ៣សំខាន់ ដែលតំណាងរាស្ត្រគណបក្សប្រឆាំងសម្រេចមិនចូលប្រជុំសភានៅថ្ងៃនេះ។
មូលហេតុទី១៖ ពាក់ព័ន្ធនឹងការវាយប្រហារលើតំណាងរាស្ត្រចំនួនពីររូបរបស់គណបក្សសង្គ្រោះជាតិ ដោយមិនទាន់ស្រាវជ្រាវរកអ្នកពាក់ព័ន្ធផ្សេងទៀតនៅឡើយ។
មូលហេតុទី២៖ ពាក់ព័ន្ធនឹងការដកលោក កឹម សុខា ប្រធានស្ដីទីគណបក្សសង្គ្រោះជាតិចេញពីតំណែងអនុប្រធានទី១នៃរដ្ឋសភា។
និងមូលហេតុទី៣៖ បណ្ដាលមកពីការដកអភ័យឯកសិទ្ធិ និងបុព្វសិទ្ធិសមាជិកសភា ពីលោក សម រង្ស៊ី ប្រធានគណបក្សសង្គ្រោះជាតិ និងជាប្រធានក្រុមតំណាងរាស្ត្រភាគតិចនៃរដ្ឋសភា។ នេះបើតាមលោក យ៉ែម បុញ្ញឫទ្ធិ។
អ្នកនាំពាក្យរូបនេះបន្តថា គណបក្សសង្រ្គោះជាតិចង់ឲ្យមានការជួបជជែកគ្នារវាងថ្នាក់ដឹកនាំបក្សជាប់ឆ្នោតទាំងពីរ ដើម្បីដោះស្រាយបញ្ហាដែលបានកើតឡើងកន្លងមក និងដើម្បីឲ្យរដ្ឋសភា មានដំណើរការល្អប្រសើរឡើងវិញ ស្របតាមលក្ខណៈប្រជាធិបតេយ្យសេរីពហុបក្ស។
គួរជម្រាបជូនថា នៅព្រឹកថ្ងៃចន្ទ ទី៣០វិច្ឆិកានេះ រដ្ឋសភាកម្ពុជាបានបើកកិច្ចប្រជុំពេញអង្គរបស់ខ្លួន ដើម្បីពិនិត្យ ពិភាក្សា និងអនុម័តសេចក្ដីព្រាងច្បាប់ស្ដីពីស្ថិតិ សេចក្ដីព្រាងច្បាប់ស្ដីពីទូរគមនាគមន៍ និងសេចក្ដីព្រាងច្បាប់ស្ដីពីថវិកាជាតិឆ្នាំ២០១៦។
តាមរយៈសំណេរលើបណ្ដាញសង្គមផ្ទាល់ខ្លួននៅព្រឹកថ្ងៃចន្ទនេះ លោកនាយករដ្ឋមន្ដ្រី ហ៊ុន សែន សង្ឃឹមថា រដ្ឋសភានឹងអនុម័តច្បាប់ថវិកាជាតិឆ្នាំ២០១៦ ដើម្បីបើកផ្លូវឲ្យរដ្ឋាភិបាល ដឹកនាំចាត់ចែងការងារលើគ្រប់វិស័យ ដូចជាការតម្លើងបៀវត្សជូនមន្ដ្រីរាជការ កងកម្លាំងប្រដាប់អាវុធ មន្ដ្រីជាប់កិច្ចសន្យា និងនិវត្តន៍ជន។ លោក ហ៊ុន សែន បញ្ជាក់ទៀតថា ច្បាប់ថវិកាជាតិឆ្នាំ២០១៦ ក៏នឹងលុបចោលផងដែរនូវពន្ធតាមរបបម៉ៅការ ដើម្បីសម្រួលដល់អាជីវករ ដែលលក់ដូរបន្តិចបន្តួច។
គួរជម្រាបថា សេចក្តីព្រាងច្បាប់ស្តីពីថវិកាជាតិសម្រាប់ឆ្នាំ២០១៦ មានទំហំទឹកប្រាក់ជាង ១៧ទ្រីលានរៀល (១៧.៤៦២.៤៧៧ លានរៀល) ឬជាង ៤ប៊ីលាន២រយលានដុល្លារអាមេរិក កើនលើសឆ្នាំមុនប្រមាណ១៦ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ