រដ្ឋសភាតែងតាំងអ្នកនាំពាក្យរដ្ឋបាល១រូប និងអ្នកនាំពាក្យតំណាងគណបក្សទាំងពីរ មួយរូបៗ
រដ្ឋសភាបានបង្កើតជាផ្លូវការនូវអ្នកនាំពាក្យចំនួនបីរូប ដែលមួយរូបជាអគ្គលេខាធិការរដ្ឋសភា មាននាទីនាំពាក្យលើកិច្ចការរដ្ឋបាលរបស់រដ្ឋសភា។ រីឯអ្នកនាំពាក្យពីររូបទៀតម្នាក់មកពីគណបក្សកាន់អំណាច និងម្នាក់ទៀតមកពីគណបក្សប្រឆាំងគឺជាអ្នកនាំពាក្យតំណាងឲ្យសម្លេងភាគច្រើន និងសម្លេងភាគតិច ទាក់ទងទៅនឹងកិច្ចការរបស់គណបក្សខ្លួនផង នៅក្នុងរដ្ឋសភា។
ចុះផ្សាយនៅថ្ងៃ៖
ស្តាប់ - ០១:៥១
ការតែងតាំងនេះបានធ្វើឡើងបន្ទាប់មានការស្រុះស្រួលគ្នារវាងគណបក្សដែលមានអាសនៈទាំងពីរនៅក្នុងរដ្ឋសភា តាមរយៈការកែប្រែបទបញ្ជាផ្ទៃក្នុង។
នៅក្នុងសេចក្តីសម្រេច ដែលមានចុះហត្ថលេខាដោយលោក ហេង សំរិន ប្រធានរដ្ឋសភាជាតិនៅថ្ងៃចន្ទទី២៣វិច្ឆិកា បង្ហាញថា អ្នកនាំពាក្យនៅរដ្ឋសភាជាតិនីតិកាលទី៥ មានរហូតដល់ទៅ៣រូប ក្នុងនោះមានអគ្គលេខាធិការរដ្ឋសភា តំណាងរាស្ត្រ១រូបមកពីគណបក្សប្រជាជនកម្ពុជានិងតំណាងរាស្ត្រមួយរូបទៀតមកពីគណបក្សសង្គ្រោះជាតិ ជាអ្នកនាំពាក្យគណបក្សរៀងៗខ្លួន។
ដោយឡែកពាក់ព័ន្ធនឹងតួនាទីវិញ ប្រការ២នៃសេចក្តីសម្រេចនេះបញ្ជាក់ថាអ្នកនាំពាក្យរដ្ឋសភាមានភារៈកិច្ចជម្រាបជូនសាធារណជនអំពីព័ត៌មាននានាពាក់ព័ន្ធនឹងរដ្ឋសភាកម្ពុជា។រីឯអ្នកនាំពាក្យរបស់គណបក្សមានភារកិច្ចផ្សព្វផ្សាយនិងធ្វើការបំភ្លឺជូនសាធារណជនអំពីគោលនយោបាយនិងគោលជំហររបស់គណបក្សនយោបាយរៀងៗខ្លួន។
លោក អេង ឆៃអ៊ាង អ្នកនាំពាក្យគណបក្សសង្គ្រោះជាតិ បានថ្លែងគាំទ្រដល់ការបង្កើតឲ្យមានរបៀបរបបនៅក្នុងរដ្ឋសភាដូច្នេះ ដោយលោកអត្ថាធិប្បាយថាកាលពីលើកមុនអ្នកនាំពាក្យរដ្ឋសភា មានលោក ឈាង វុន តំណាងរាស្ត្រមកពីគណបក្សកាន់អំណាចនោះ មិនអាចជាតំណាងឲ្យជំហររបស់គណបក្សទាំងអស់នៅក្នុងរដ្ឋសភាបានទេ។
ដូចគ្នាដែរ អតីតអ្នកនាំពាក្យរដ្ឋសភាលោកឈាង វុន បានសម្តែងនូវការសាទរ ដែរចំពោះការបែងចែកភារកិច្ចឲ្យដាច់ស្រឡះនៅពេលនេះ។ លោកលើកឡើងថាកន្លងមកការងារអ្នកនាំពាក្យរដ្ឋសភាទាំងមូលមិនមែនជាការងាយស្រួលនោះទេ។ ទោះយ៉ាងនេះក្តីលោកតែងជំនះគ្រប់ឧបសគ្គ ក្នុងនាមជាអ្នកនាំពាក្យរដ្ឋសភាកន្លងមក។
សូមបញ្ជាក់ថារហូតមកទល់ពេលនេះ ទាំងគណបក្សសង្គ្រោះជាតិ ទាំងគណបក្សប្រជាជនកម្ពុជានៅមិនទាន់សម្រេចការតែងតាំងតំណាងរាស្ត្ររូបណាមួយនៅឡើយដើម្បីនិយាយតំណាងឲ្យបក្សរបស់ខ្លួននៅក្នុងរដ្ឋសភាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ