លទ្ធផលបឋមនៃការបោះឆ្នោត ត្រូវបានគ.ជ.ប. ប្រកាសជាផ្លូវការ នៅលើគេហទំព័រ
លទ្ធផលបឋមនៃការបោះឆ្នោតឃុំ សង្កាត់ ត្រូវបាន គ.ជ.ប ប្រកាសរួចរាល់ហើយ នៅថ្ងៃទី៧ ខែមិថុនា ម្សិលមិញ។ គណបក្សប្រជាជនកម្ពុជា ឈ្នះការគាំទ្រ នៅឃុំ សង្កាត់ចំនួន ១១៦៥ ។ បន្ទាប់មកគឺ គណបក្សសង្គ្រោះជាតិ ឈ្នះការគាំទ្រ នៅឃុំ សង្កាត់ចំនួន ៤៨០។ និងគណបក្សខ្មែររួបរួមជាតិឈ្នះការគាំទ្រ នៅឃុំ សង្កាត់ត្រឹមតែ១ ប៉ុណ្ណោះ។ នេះបើយោងតាមការប្រកាសលទ្ធផលបឋមនៅលើគេហទំព័ររបស់ គ.ជ.ប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ថា សូមសាធារណជនកុំយល់ច្រលំចំពោះការប្រកាសនូវលទ្ធផលបោះឆ្នោតបឋមនេះ។ លទ្ធផលបឋម គឺបង្ហាញត្រឹមសំឡេងឆ្នោត ដែលគណបក្សនីមួយៗ ទទួលបានប៉ុណ្ណោះ ប៉ុន្តែមិនទាន់បង្ហាញពីការបែងចែកចំនួនអាសនៈនៃក្រុមប្រឹក្សាឃុំ-សង្កាត់ ដែលគណបក្សនីមួយៗ ត្រូវទទួលបាននោះទេ។
ហើយចំពោះការប្រកាសលទ្ធផលបឋមនេះទៀតសោត គឺត្រឹមតែអាចធ្វើការផ្សព្វផ្សាយតាមរយៈគេហទំព័ររបស់ គ.ជ.ប ប៉ុណ្ណោះ មិនមានធ្វើជាតារាងដើម្បីបូកសរុបលទ្ធផលដែលគណបក្សនីមួយៗទទួលបាននោះទេ។ អ្នកនាំពាក្យរូបនេះបញ្ជាក់!
ដោយឡែក លោក យ៉ង់ គឹមអេង អ្នកនាំពាក្យបន្ទប់ស្ថានការណ៍រៀបចំការបោះឆ្នោត វិញ បានលើកសរសើរចំពោះកិច្ចខិតខំប្រឹងប្រែងរបស់គ.ជ.ប នៅក្នុងការរៀបចំការបោះឆ្នោត ក្រុមប្រឹក្សា ឃុំ សង្កាត់ អាណត្តិទី៤នេះ។ ពិសេសចំពោះការចុះឈ្មោះ និងការពិនិត្យលទ្ធផល តាមរយៈប្រពន្ធ័កុំព្យូទ័រ។
ប៉ុន្តែលោក ចង់ឱ្យគ.ជ.ប ធ្វើយ៉ាងណាពន្លឿនការប្រកាសលទ្ធផលបោះឆ្នោតទៅតាមពេលវេលាដែលបានកំណត់។ ព្រោះការធ្វើបែបនេះ អាចជៀសវាងការងឿងឆ្ងល់ពីសាធារណជន និង ការយល់ច្រលំ ឬ ខ្វែងគំនិតគ្នាចំពោះអ្នកដែលមាននិន្នាការនយោបាយខុសៗគ្នាផងដែរ។ មួយវិញទៀតលោកថា ការប្រកាសលទ្ធផលបឋមនេះ គួរតែបានសរុបពីចំនួនគណបក្សណា ឈ្នះ ឬ ចាញ់នៅតាមឃុំសង្កាត់នីមួយៗ ហើយប្រកាសឱ្យសាធារណជនបានដឹង មិនមែនផ្សាយតែក្នុងគេហទំព័ររបស់ខ្លួននោះទេ ។
គួរជម្រាបជូនថា ការបោះឆ្នោតក្រុមប្រឹក្សា ឃុំ សង្កាត់អាណត្តិទី៤នេះ មានប្រជាពលរដ្ឋជិត៩០% នៅក្នុងចំណោមប្រជាពលរដ្ឋ ដែលមានឈ្មោះក្នុងបញ្ជីបោះឆ្នោតសរុបជាង៧លាន៨សែននាក់ បានទៅចុះឈ្មោះបោះឆ្នោត។ ចំណែកការប្រកាសលទ្ធផល ធ្វើឡើងជាបីដំណាក់កាល គឺ ការប្រកាសលទ្ធផលបឋម, ការប្រកាសលទ្ធផលបណ្តោះអាសន្ន និង ការប្រកាសលទ្ធផលផ្លូវការដែលនឹងធ្វើឡើងនៅថ្ងៃទី ២៥ មិថុនា ឆ្នាំ២០១៧ ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ