កម្ពុជា-បោះឆ្នោត

គ.ជ.ប សម្ពោធមជ្ឈមណ្ឌលផ្ដល់ព័ត៌មានចុះឈ្មោះបោះឆ្នោតនៅផ្សារទំនើបអ៊ីអន

គណៈកម្មការជាតិរៀបចំការបោះឆ្នោត (គ.ជ.ប) នៅថ្ងៃទី៣០សីហានេះ បានសម្ពោធដាក់ឲ្យប្រើប្រាស់មជ្ឈមណ្ឌលផ្ដល់ព័ត៌មានស្ដីពីការចុះឈ្មោះបោះឆ្នោតនៅក្នុងផ្សារទំនើបអ៊ីអន ក្រុងភ្នំពេញ។ បើតាមមន្ដ្រីអ្នកនាំពាក្យ គ.ជ.ប ប្រជាពលរដ្ឋទូទៅដែលអញ្ជើញទៅផ្សារទំនើបអ៊ីអន អាចសាកសួរព័ត៌មានអំពីការចុះឈ្មោះបោះឆ្នោតនៅមជ្ឈមណ្ឌលនេះបាន។ គ.ជ.ប ក៏មានគម្រោងបង្កើតមជ្ឈមណ្ឌលផ្ដល់ព័ត៌មានដូចគ្នានេះនៅតាមសាកលវិទ្យាល័យនានាផងដែរ។អត្ថបទដោយ៖ យ៉ា រសាត់

ចុះផ្សាយនៅថ្ងៃ៖ 30/08/2017 - 08:46

ផ្សាយពាណិជ្ជកម្ម

លោក ហង្ស ពុទ្ធា អ្នកនាំពាក្យគណៈកម្មការជាតិរៀបចំការបោះឆ្នោតបានប្រាប់វិទ្យុបារាំងអន្ដរជាតិថា មជ្ឈមណ្ឌលដំបូងគេនៅក្នុងផ្សារទំនើបមួយនេះ បង្កើតឡើងសម្រាប់ផ្ដល់ព័ត៌មានអំពីការចុះឈ្មោះបោះឆ្នោតជូនប្រជាពលរដ្ឋទូទៅដែលបានទៅកម្សាន្ដ និងអាជីវករក្នុងផ្សារទំនើបនោះ។ លោកបន្ដថា នៅតាមបណ្ដាសាកលវិទ្យាល័យនានា ក៏ គ.ជ.ប គ្រោងនឹងបង្កើតមជ្ឈមណ្ឌលផ្ដល់ព័ត៌មានអំពីការចុះឈ្មោះបោះឆ្នោតដល់និស្សិតផងដែរ។

បើតាមមន្ដ្រីអ្នកនាំពាក្យដដែល រហូតមកដល់ពេលនេះ គ.ជ.ប បានរៀបចំការិយាល័យចុះឈ្មោះបោះឆ្នោតចំនួន ១៦៤៦ ទូទាំងប្រទេសរួចរាល់ហើយ។ រីឯមន្ដ្រីគ.ជ.ប ជាង៣០០០នាក់ បំរើការនៅក្នុងការិយាល័យទាំងនោះ ក៏ត្រូវបានបណ្ដុះបណ្ដាលចប់សព្វគ្រប់ហើយដែរ ដើម្បីត្រៀមចាប់ផ្ដើមចុះឈ្មោះបោះឆ្នោតនៅថ្ងៃទី ០១ កញ្ញា ខាងមុខនេះ។ លោកថា ការិយាល័យទាំងនោះ នឹងបើកដំណើរការចុះឈ្មោះជារៀងរាល់ថ្ងៃ ចាប់ពីថ្ងៃទី១ កញ្ញា ដល់ ថ្ងៃទី០៩ វិច្ឆិកា ឆ្នាំ២០១៧។ បើតាមលោក ហង្ស ពុទ្ធា ក្នុងរយៈពេល ១០ ថ្ងៃ មន្ដ្រី គ.ជ.ប ត្រូវបានអនុញ្ញាតឲ្យឈប់សម្រាកមួយថ្ងៃ។

លោក ហង្ស ពុទ្ធា បន្ថែមថា ដើម្បីអាចចុះឈ្មោះបោះឆ្នោតបាន ប្រជាពលរដ្ឋត្រូវមានអាយុចាប់ពី១៨ឆ្នាំឡើងទៅ ជាអ្នកដែលមិនបានបោះឆ្នោតឃុំសង្កាត់ កាលពីឆ្នាំ២០១៦។ លោកបញ្ជាក់ថា ប្រជាពលរដ្ឋទាំងនោះត្រូវយកអត្ដសញ្ញាណប័ណ្ណ ឬឯកសារបញ្ជាក់ពីសញ្ជាតិ ទៅជាមួយ ដើម្បីស្នើសុំចុះឈ្មោះ។ លោកថា អ្នកដែលមានឈ្មោះបោះឆ្នោតហើយក្ដី ក៏អាចទៅពិនិត្យឈ្មោះ ឬសុំកែឈ្មោះឡើងវិញបានដែរ នៅក្នុងការិយាល័យចុះឈ្មោះបោះឆ្នោតទាំងនោះ។

សូមបញ្ជាក់ថានៅក្នុងកិច្ចប្រជុំធ្វើបច្ចុប្បន្នភាពបញ្ជីឈ្មោះនិងការចុះឈ្មោះបោះឆ្នោតឆ្នាំ២០១៧ គ.ជ.ប បានប៉ាន់ប្រមាណថា មានពលរដ្ឋខ្មែរចំនួនជាង១,៤លាននាក់ ដែលត្រូវចុះឈ្មោះបោះឆ្នោតថ្មី។ ក្នុងចំណោមពលរដ្ឋខ្មែរ ១៥,៨លាននាក់ មានអ្នកគ្រប់អាយុចាប់ពី១៨ឆ្នាំឡើងទៅអាចបោះឆ្នោតបាន គិតដល់ថ្ងៃបោះឆ្នោតចំនួន ជាង ៩,៧លាននាក់។ រីឯការបោះឆ្នោតជ្រើសរើសតំណាងរាស្ត្រនីតិកាលទី៦វិញនឹងប្រព្រឹត្តិទៅនៅថ្ងៃទី២៩ខែកក្កដាឆ្នាំ២០១៨ខាងមុខ៕