គជប ណែនាំពីការលើកស្លាកសញ្ញាគណបក្សនយោបាយក្នុងអំឡុងពេលឃោសនាបោះឆ្នោតក្រុមប្រឹក្សាឃុំសង្កាត់
គណៈកមា្មធិការជាតិរៀបចំការបោះឆ្នោត (គជប) កាលពីថ្ងៃទី ១២ ឧសភា បានចេញសេចក្តីណែនាំមួយស្តីពីការលើកស្លាកសញ្ញារបស់គណបក្សនយោបាយក្នុងអំឡុងពេលឃោសនាបោះឆ្នោតសម្រាប់ការបោះឆ្នោតក្រុមប្រឹក្សាឃុំសង្កាត់ ដែលនឹងឈានចូលមកដល់នាពេលដ៏ខ្លីខាងមុខនេះ។ បើតាមគជប ការលើកសញ្ញាគណបក្សនយោបាយក្នុងពេលឃោសនា ក្នុងពេលឃោសនាបោះឆ្នោត ត្រូវបានបែងចែកជាបីប្រភេទដូចជា៖ ការលើកសញ្ញាគណបក្សនយោបាយនៅទីស្នាក់ការអចិន្រ្តៃយ៍ ការលើកស្លាកសញ្ញាគណបក្សនៅទីលំនៅឋានឯកជន ឬទីកន្លែងឯកជន និង ការលើកសញ្ញាគណបក្សនៅទីកន្លែងសាធារណៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
គជប បានបង្គាប់ឲ្យគណបក្សនយោបាយទាំង ១២ ដែលបានចុះបញ្ជីបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី ៤ ឆ្នាំ ២០១៧ អនុវត្តឲ្យបានត្រឹមត្រូវ ដោយឈរលើគោលការណ៍ស្មើភាព និងលំដាប់មុនក្រោយ ក្នុងការលើកស្លាកសញ្ញាគណបក្សនយោបាយក្នុងអំឡុងពេលឃោសនាបោះឆ្នោត ចាប់ពីថ្ងៃទី ២០ ខែ ឧសភា ដល់ថ្ងៃទី ២ ខែមិថុនា។
បើតាមសេចក្តីណែនាំ ការលើកស្លាកសញ្ញាគណបក្សនយោបាយនៅទីកន្លែងសាធារណៈ ក្នុងអំឡុងពេលឃោសនាបោះឆ្នោតត្រូវមានការសម្របសម្រួលជាមួយអាជ្ញាធរដែនដី ដោយឈរលើគោលការណ៍ស្មើភាពលំដាប់មុន ក្រោយ។ ខណៈដែលការលើកសញ្ញាគណបក្សនយោបាយនៅលំនៅឋានឯកជន ឬទីកន្លែងឯកជន ត្រូវធ្វើឡើងដោយមានការយល់ព្រមពីម្ចាស់កន្លែងនោះ។
ទន្ទឹមនឹងនេះ សម្រាប់ស្លាកសញ្ញាគណបក្សនយោបាយ ដែលស្ថិតនៅក្នុងរង្វង់ ១០០ ម៉ែត្រ ពីការិយាល័យបោះឆ្នោត ត្រូវយកចេញយ៉ាងយូរបំផុតនៅថ្ងៃបញ្ចប់ការឃោសនាបោះឆ្នោត លើកលែងតែស្លាកសញ្ញាដែលមាននៅទីស្នាក់ការអចិន្រ្តៃយ៍របស់គណបក្សនយោបាយដែលត្រូវគ្រប់ឬបិទបាំង។
គជប បន្ថែមទៀតថា គណបក្សនយោបាយ ត្រូវប្រមូលមកវិញទាំងអស់ពីគ្រប់កន្លែងសាធារណៈក្នុង រយៈពេល ១៥ ថ្ងៃ បន្ទាប់ពីថ្ងៃបោះឆ្នោត នូវស្លាកសញ្ញាគណបក្សនយោបាយនិងសម្ភារឃោសនាបោះឆ្នោតដែលបានលើក ឬ បិទនៅទីសាធារណៈក្នុងអំឡុងពេលឃោសនាបោះឆ្នោត។
ព្រមជាមួយគ្នានេះ គជប ក៏បានអំពាវនាវឲ្យអាជ្ញាធរដែនដី និងគណបក្សនយោបាយ ចូលរួមសហការគ្នាដើម្បីឲ្យការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី ៤ នេះ ប្រព្រឹត្តិទៅដោយសន្តិសុខ សណ្តាប់ធ្នាប់សាធារណៈ និងសោភ័ណភាពសាធារណៈ។
សូមជម្រាបជូនថា ប្រទេសកម្ពុជានឹងរៀបចំការបោះឆ្នោតជ្រើសរើស ក្រុមប្រឹក្សា ឃុំ សង្កាត់ អាណតិ្តទី៤ នៅថ្ងៃទី៤ ខែមិថុនាខាងមុខ ដោយមានគណបក្សនយោបាយចំនួន ១២គណបក្សនឹងចូលរួមប្រកួតប្រជែងដណ្តើមបេក្ខភាពមេឃុំ ជាង ៩ នាក់ នៅក្នុងឃុំ-សង្កាត់ចំនួន ១,៦៤៦ ទូទាំង ២៥រាជធានី-ខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ