គម្រោងទូរទស្សន៍ព្រះអាទិត្យរកប្រាក់បានប្រហែល៤៥ម៉ឺនដុល្លារហើយ
គិតត្រឹមថ្ងៃម្សិលមិញ គណបក្សសង្គ្រោះជាតិទទួលបានប្រាក់ជំនួយពីអ្នកគាំទ្រចំនួនប្រមាណជា៤សែន៥ម៉ឺនដុល្លារហើយ សម្រាប់ទ្រទ្រង់គម្រោងបង្កើតទូរទស្សន៍ព្រះអាទិត្យរបស់ខ្លួន។ នេះបើយោងតាមអ្នកនាំពាក្យរបស់គណបក្សនេះ ដែលឱ្យដឹងបន្ថែមទៀតថា ការបញ្ជាទិញដី និងការតម្លើងអង់តែន ត្រូវចាប់ផ្តើមធ្វើនៅក្នុងខែសីហានេះតែម្តង។
ចុះផ្សាយនៅថ្ងៃ៖
ស្តាប់ - ០១:៥២
មូលនិធិសម្រាប់ទ្រទ្រង់គម្រោងទូរទស្សន៍ព្រះអាទិត្យរបស់គណបក្សសង្គ្រោះជាតិ កើនដល់ប្រហែល៤៥ម៉ឺនដុល្លារហើយ គិតចាប់ពីថ្ងៃទី២៧ ខែមិថុនា ដែលជាថ្ងៃប្រកាសទទួលប្រាក់ជំនួយដំបូង រហូតដល់ថ្ងៃទី០១ ខែសីហា ឆ្នាំ២០១៥ម្សិលមិញ។ នេះបើយោងតាមលោក យ៉ែម បុញ្ញឫទ្ធិ ដែលជាអ្នកនាំពាក្យរបស់គណបក្សសង្គ្រោះជាតិ។
លោក យ៉ែម បុញ្ញឫទ្ធិ បានបញ្ជាក់ទៀតថា គណបក្សសង្គ្រោះជាតិនឹងបញ្ជាទិញដី ព្រមទាំងតម្លើងអង់តែន នៅក្នុងខែសីហានេះតែម្តង ដើម្បីអាចចាប់ផ្តើមផ្សាយជំហានទី១ ឱ្យបានមុនដំណាច់ឆ្នាំ២០១៥ សម្រាប់ទីក្រុងភ្នំពេញ និងតំបន់ជុំវិញទីក្រុងភ្នំពេញ។ ចំពោះខេត្តក្រុងនានា គណបក្សនេះនឹងពង្រីកការផ្សាយជាបន្តបន្ទាប់ទៀត នៅពេលក្រោយ។
របាយការណ៍ប្រចាំថ្ងៃនៃការប្រមូលវិភាគទាន និងទុនវិនិយោគចុងក្រោយ ដែលអ្នកទទួលខុសត្រូវក្នុងគណបក្សសង្គ្រោះជាតិ បានផ្សាយឱ្យដឹងជាសាធារណៈ គឺត្រឹមថ្ងៃទី១៤ ខែកក្កដា ឆ្នាំ២០១៥ប៉ុណ្ណោះ។ ការណ៍នេះធ្វើឱ្យអ្នកតាមដានរឿងនេះ ឆ្ងល់ និងចង់ដឹងជាខ្លាំង អំពីចំនួនទឹកប្រាក់ដែលគណបក្សសង្គ្រោះជាតិទទួលបាន ជារៀងរាល់ថ្ងៃពីសប្បុរសជន។
គម្រោងបង្កើតទូរទស្សន៍ ស្ថិតក្រោមឥទ្ធិពលរបស់គណបក្សសង្គ្រោះជាតិដែលជាគណបក្សនៅក្រៅរដ្ឋាភិបាលមួយនេះ ត្រូវការមូលធនចាំបាច់ជាង៣លានដុល្លារអាមេរិក ហើយបច្ចុប្បន្នសមាជិករបស់គណបក្សប្រឆាំង កំពុងអង្គាសប្រាក់បង្គ្រប់ ទាំងនៅទូទាំងប្រទេស ទាំងនៅក្រៅប្រទេស។
កាលពីថ្ងៃទី២៧ ខែវិច្ឆិកា ឆ្នាំ២០១៤ ក្រសួងព័ត៌មានកម្ពុជាបានសម្រេចផ្តល់អាជ្ញាប័ណ្ណឱ្យគណបក្សសង្គ្រោះជាតិ តាមរយៈក្រុមហ៊ុនឯកជន បន្ទាប់ពីមានការទាមទារយ៉ាងស្វិតស្វាញ។ សេចក្តីសម្រេចនោះនឹងអនុញ្ញាតឱ្យគណបក្សប្រឆាំងធំជាងគេនៅកម្ពុជា មានស្ថានីយទូរទស្សន៍ដំបូងបំផុត ដែលមានកម្លាំងផ្សាយ១០គីឡូវ៉ាត់ នៅរាជធានីភ្នំពេញ និង១គីឡូវ៉ាត់ នៅតាមបណ្ដាខេត្តក្រុងផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ