តំណាងរាស្ត្របក្សប្រឆាំងនៅតែហៅថា ការកោះហៅរបស់តុលាការថាជារឿងនយោបាយ
នៅថ្ងៃទី២៨ ឧសភានេះ លោកនុត រំដួលតំណាងរាស្ត្រគណបក្សសង្គ្រោះជាតិ ក៏មិនខុសពីតំណាងរាស្ត្រគណបក្សសង្គ្រោះជាតិដទៃទៀតនោះទេ។ មិនខុសព្រោះថា លោកមិនបានចូលទៅកាន់តុលាការតាមការកោះហៅសាជាថ្មីក្នុងសំណុំរឿងរំដោះទីលានប្រជាធិបតេយ្យ។ ប៉ុន្តែតំណាងរាស្ត្របក្សប្រឆាំងនៅតែថា ការកោះហៅគឺជារឿងរបស់តុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
លោកនុត រំដួល គឺជាតំណាងរាស្ត្រចុងក្រោយដែលតុលាការក្រុងភ្នំពេញកោះហៅក្នុងសំណុំរឿងរំដោះទីលានប្រជាធិបតេយ្យ។ ប៉ុន្តែមិនខុសពីតំណាងរាស្ត្រ៦រូបផ្សេងទៀតទេដែលមិនបានចូលទៅតាមការកោះហៅ ឬមិនឆ្លើយសំនួររបស់តុលាការ។ លោក នុត រំដួលនៅតែហៅការកោះហៅរបស់តុលាការនេះថា ជារឿងនយោបាយដដែល។ ជារឿងនយោបាយព្រោះថា ការចោទប្រកាន់ក្នុងសំណុំរំដោះទីលានប្រជាធិបតេយ្យនោះគឺស្ថិតក្នុងអន្តរកាលនៃវិបត្តិនយោបាយនៅកម្ពុជា។
សូមបញ្ជាក់ថាតុលាការក្រុងភ្នំពេញក្នុងរយៈពេលចុងក្រោយនេះ បានកោះហៅមន្ត្រីសមាជិកសភាទាំង៧រូបដែលរងការចោទប្រកាន់ក្នុងសំណុំរឿងរំដោះទីលានប្រជាធិបតេយ្យឱ្យចូលខ្លួនបំភ្លឺសារជាថ្មីម្តងទៀត។ តំណាងរាស្ត្រគណបក្សសង្គ្រោះជាតិ៧រូបដូចជា លោក ហូរ វ៉ាន់ លោករៀល ខេមរិន្ទ លោកឡុងរី លោកម៉ែន សុថារិន្ទ និងលោកស្រីមួរ សុខហួរ ជាដើម ត្រូវបានតុលាការកោះហៅជាបន្តបន្ទាប់គ្នា។ លោកស្រីមួរ សុខហួរ តំណាងរាស្ត្រមណ្ឌលបាត់ដំបង បានចូលខ្លួនមុនគេពីថ្ងៃទី១១ ឧសភា ប៉ុន្តែមិនបានឆ្លើយនឹងសំណួររបស់តុលាការនោះទេ។ ដោយឡែកតំណាងរាស្ត្រផ្សេង មិនបានចូលខ្លួនទៅតាមការកោះហៅទេ។ បើតាមការបញ្ជាក់ពីលោកស្រីមួរ សុខហួរ សំនួរទាំង១២ដែលតុលាការសួរកាលណោះ គឺសុទ្ធសឹងតែពាក់ព័ន្ធនឹងសំណុំរឿងរំដោះទីលានប្រជាធិបតេយ្យប៉ុន្តែ លោកស្រីមិនបានលំអិតបញ្ជាក់ឡើយ។
ព្រះរាជ្យអាជ្ញាអមតុលាការក្រុងភ្នំពេញ លោកកែវ សុជាតិ បានបញ្ជាក់ថា ការមិនចូលខ្លួនរបស់តំណាងរាស្ត្ររបស់បក្សប្រឆាំង និងការមិនឆ្លើយសំនួរគឺជាសិទ្ធរបស់តំណាងរាស្ត្រ។ សូមរំលឹកបន្តិចថា រដ្ឋាភិបាលកម្ពុជាបានចាប់ខ្លួន និងទម្លាក់ការទទួលខុសត្រូវលើតំណាងរាស្ត្រទាំង៧រូប និងសកម្មជនគណបក្សសង្គ្រោះជាតិជាច្រើនរូបផ្សេងទៀតក្នុងសំណុំរឿងរំដោះទីលានប្រជាធិបតេយ្យកាលពីឆ្នាំ២០១៤។ ជាការចាប់ខ្លួនក្នុងវិបត្តិនយោបាយក្រោយការបោះឆ្នោត។ ដូចនេះលោកនុត រំដួល និងតំណាងរាស្ត្រគណបក្សសង្គ្រោះជាតិផ្សេងទៀតបានស្នើឱ្យតុលាការទម្លាក់ការចោទប្រកាន់ និងថាត្រូវដោះស្រាយតាមវប្បធម៌សន្ទនា ប៉ុន្តែប្រមុខរដ្ឋាភិបាលនិងបក្សកាន់អំណាច បដិសេធថារឿងតុលាការ មិនមែនជារឿងនយោបាយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ