ការចតយានយន្តលើផ្លូវសាធារណៈ រួមចំណែកធ្វើឲ្យកកស្ទះចរាចរណ៍
ចុះផ្សាយនៅថ្ងៃ៖
ស្តាប់ - ០៣:៥៤
បញ្ហាកកស្ទះចរាចរណ៍ នៅតែជាបញ្ហាដែលមិនទាន់អាចដោះស្រាយបាននៅឡើយ សម្រាប់រាជធានីភ្នំពេញ បេះដូងនៃព្រះរាជាណាចក្រកម្ពុជា។ មានមូលហេតុសំខាន់ៗមួយចំនួនដែលធ្វើឲ្យចរាចរណ៍កកស្ទះ ប៉ុន្តែកត្តាដែលសំខាន់មួយក្នុងចំណោមនោះ គឺការចតយានយន្តនៅលើផ្លូវសាធារណៈ។
បញ្ហាកកស្ទះចរាចរណ៍ នៅតែជាបញ្ហាដែលមិនទាន់អាចដោះស្រាយបាននៅឡើយ សម្រាប់រាជធានីភ្នំពេញ បេះដូងនៃព្រះរាជាណាចក្រកម្ពុជា។ មានមូលហេតុសំខាន់ៗមួយចំនួនដែលធ្វើឲ្យចរាចរណ៍កកស្ទះ ប៉ុន្តែកត្តាដែលសំខាន់មួយក្នុងចំណោមនោះ គឺការចតយានយន្តនៅលើផ្លូវសាធារណៈ។
បញ្ហាកកស្ទះចរាចរណ៍ បានក្លាយទៅជាជំងឺដ៏រ៉ាំរ៉ៃមួយនៅរាជធានីភ្នំពេញ។ កាលពីពេលមុន ការកកស្ទះចរាចរណ៍កើតឡើងតែនៅក្នុងចន្លោះម៉ោងរវល់ ជាអាថិ៍ ម៉ោង៧ដល់ម៉ោង៩ព្រឹក និងម៉ោង៥ដល់ម៉ោង៧ល្ងាចតែប៉ុណ្ណោះ។ ប៉ុន្តែសព្វថ្ងៃនេះ បញ្ហាកកស្ទះចរាចរណ៍នៅភ្នំពេញមានសភាពកាន់តែអាក្រក់ឡើងៗ។ ពោលគឺ ការកកស្ទះចរាចរណ៍កើតឡើងស្ទើរតែគ្រប់ម៉ោង និងស្ទើរតែរាល់ថ្ងៃតែម្ដង។ មានមូលហេតុច្រើន ដែលរួមចំណែកធ្វើឲ្យរាជធានីភ្នំពេញត្រូវកកស្ទះចរាចរណ៍ជាប្រចាំ។ ប៉ុន្តែមូលហេតុសំខាន់មួយក្នុងចំណោមនោះ គឺ បណ្ដាលមកពីមានការចតយានយន្តនៅលើផ្លូវសាធារណៈ។
នៅគ្រប់ផ្លូវសាធារណៈ មិនថាផ្លូវតូច ផ្លូវធំ ឬផ្លូវដែលមានដាក់ស្លាកហាមចតក៏ដោយ ក៏គេតែងតែសង្កេតឃើញមានយានយន្ត ដោយចំពោះរថយន្ត និងម៉ូតូកង់បី ចតតម្រៀបជាជួរយ៉ាងអាណាធិបតេយ្យ។ អ្នកប្រើប្រាស់ទ្រូងផ្លូវនៅភ្នំពេញ មានទម្លាប់ចតយានយន្តនៅលើផ្លូវសាធារណៈ ដោយគ្មានការក្រែងចិត្តអ្នកដំណើរដទៃទៀតសោះឡើយ។ ពេលខ្លះ ការកកស្ទះបណ្ដាលមកពីម្ចាស់យានយន្តមួយចំនួន ចតយានយន្តនៅត្រង់ផ្លូវកែង ឬពេលខ្លះ គឺចតនៅពាក់កណ្ដាលផ្លូវតែម្ដង។
មែនទែនទៅ ប្រសិនបើគេដាក់ការទទួលខុសត្រូវទៅលើអ្នកប្រើប្រាស់ទ្រូងផ្លូវតែឯងក៏មិនកើត។ ហាង និងភោជនីយដ្ឋានមួយចំនួន មិនមានចំណតយានយន្តផ្ទាល់ខ្លួនទេ។ ហើយជារឿយៗ គេតែងសង្កេតឃើញម្ចាស់អាជីវកម្ម និងភោជនីយដ្ឋានទាំងនោះ បានយកផ្លូវថ្នល់សាធារណៈ ជាចំណតរថយន្តសម្រាប់ភ្ញៀវរបស់ខ្លួន បង្កជា ការរំខានដល់អ្នកប្រើប្រាស់ផ្លូវដទៃទៀត។ នៅតាមភោជនីយដ្ឋានខ្លះ រថយន្តចត២-៣ជួរ សឹងតែពាក់កណ្ដាលផ្លូវទៅហើយ។ ដោយឡែក អាជ្ញាធរមានសមត្ថកិច្ចវិញ ហាក់ដូចជាមិនបានចាត់វិធានការណាមួយជាក់លាក់ នៅចំពោះមុខបញ្ហាអស់ទាំងនេះទេ។
បើនិយាយដល់មូលហេតុដែលធ្វើឲ្យភ្នំពេញជួបបញ្ហាកកស្ទះចរាចរណ៍ មិនមែនបណ្ដាលមកពីការចតយានយន្តនៅលើផ្លូវតែម្យ៉ាងនោះទេ។ មូលហេតុសំខាន់ៗមួយចំនួនទៀត ដែលរួមចំណែកធ្វើឲ្យមានការកកស្ទះចរាចរណ៍នៅភ្នំពេញដែរនោះ មានដូចជា ការមិនគោរពច្បាប់ចរាចរណ៍ ការមិនចេះយោគយល់គ្នាពីសំណាក់អ្នកប្រើប្រាស់ទ្រូងផ្លូវ និងការកើនឡើងនៃចំនួនយានយន្តជាដើម។
បញ្ហាកកស្ទះចរាចរណ៍ អាចមើលទៅមិនមែនជារឿងធ្ងន់ធ្ងរ ប៉ុន្តែមែនទែនទៅ វាកំពុងតែប៉ះពាល់យ៉ាងខ្លាំងដល់អារម្មណ៍ ជាពិសេសគឺការប្រកបរបរចិញ្ចឹមជីវិតប្រចាំថ្ងៃរបស់ប្រជាពលរដ្ឋផងដែរ។ ម្ល៉ោះហើយ អាជ្ញាធរនិងស្ថាប័នពាក់ព័ន្ធទាំងឡាយ មិនអាចមើលរំលងបញ្ហានេះបានឡើយ និងចាំបាច់ត្រូវចាត់វិធានការជាបន្ទាន់ចំពោះការកកស្ទះចរាចរណ៍នេះ ដើម្បីសម្រួលដល់ការធ្វើដំណើរទៅមករបស់ពលរដ្ឋ។
សរុបមកវិញ ការចតយានយន្តលើដងផ្លូវ ជាការពិត គឺបានរួមចំណែកធ្វើឲ្យចរាចរណ៍នៅភ្នំពេញកកស្ទះកាន់តែអាក្រក់ឡើងៗជារៀងរាល់ថ្ងៃ។ ប៉ុន្តែបញ្ហានេះ មិនងាយដោះស្រាយបានឡើង ព្រោះវាត្រូវការការចូលរួមពីអ្នកពាក់ព័ន្ធនៅក្នុងរឿងនេះទាំងអស់។ អ្នកដែលពាក់ព័ន្ធដែលមានជាអាថិ៍ ម្ចាស់អាជីវកម្ម និងភោជនីយដ្ឋាននានាដែលនិយមយកផ្លូវសាធារណៈធ្វើជាចំណតសម្រាប់អតិថិជនខ្លួន ត្រូវតែពិចារណាបញ្ឈប់ការប្រព្រឹត្តនេះជាបន្ទាន់ និងចាំបាច់ត្រូវគិតគូរពីការបង្កើតចំណតយានយន្តឯកជនសម្រាប់អតិថិជនរបស់ខ្លួន។
ចំណែកម្ចាស់យានយន្តទាំងតូចទាំងធំ ក៏គួរកម្ចាត់ចោលភាពអាត្មានិយមរបស់ខ្លួន ដោយងាកមកបណ្ដុះទម្លាប់ក្រែងចិត្តអ្នកប្រើប្រាស់ផ្លូវសាធារណៈដទៃទៀតខ្លះផង។ សូមកុំគិតថា ផ្លូវសាធារណៈជាកម្មសិទ្ធិផ្ដាច់មុខរបស់ខ្លួនឲ្យសោះ។ ការពិចារណាវិនិយោគកន្លែងចតយានយន្តគិតថ្លៃ ក៏ត្រូវបានលើកទឹកចិត្តឲ្យពិចារណាផងដែរ។ ដោយឡែក អាជ្ញាធរមានសមត្ថកិច្ច ទាំងអស់ គួរតែពង្រឹងការអនុវត្តច្បាប់ឲ្យបានម៉ឺងម៉ាត់ជាងនេះ ជាពិសេសការផាកពិន័យផ្សេងៗ ដើម្បីដោះស្រាយបញ្ហាកកស្ទះចរាចរណ៍ដែលភ្នំពេញកំពុងជួបប្រទះសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ