ក្រសួងដែនដីចាប់ផ្តើមស្វែងរកដំណោះស្រាយជម្លោះដីធ្លី ដែលអូសបន្លាយជាង១០ឆ្នាំ ស្ថិតនៅខេត្តកោះកុង
ដូចការគ្រោងទុក ក្រុមការងារក្រសួងរៀបចំដែនដី នគររូបនីយកម្ម និងសំណង់ បានចុះទៅកាន់ខេត្តកោះកុង កាលពីថ្ងៃទី១៨ ខែសីហាម្សិលមិញនេះ ដើម្បីស្វែងរកដំណោះស្រាយដីធ្លីជូនប្រជាពលរដ្ឋ។ ជម្លោះដីធ្លី ដែលបានអូសបន្លាយអស់រយៈពេលជាង១០ឆ្នាំមកហើយ រវាងប្រជាពលរដ្ឋ ៧៣៨គ្រួសារ និងក្រុមហ៊ុនស្ករអំពៅចំនួនពីរនៅខេត្តកោះកុង។ មន្រ្តីសិទ្ធិមនុស្សប្រចាំខេត្តកោះកុង បានសាទរចំពោះជំហានដ៏វិជ្ជមាននេះ ប៉ុន្តែបានបង្ហាញក្តីសង្ឃឹមតិចតួចនៅឡើយ។
ចុះផ្សាយនៅថ្ងៃ៖
ស្តាប់ - ០២:១៥
ដំណើរចុះទៅកាន់ខេត្តកោះកុងរបស់ក្រុមការងារក្រសួងរៀបចំដែនដី នគររូបនីយកម្ម និងសំណង់ កាលពីថ្ងៃទី ១៨ សីហា គឺជាដំណាក់កាលដំបូងនៃការស្រង់ព័ត៌មាន និងទិន្នន័យ នៃជម្លោះដីធ្លីនេះប៉ុណ្ណោះ។ ចំណែកដំណោះស្រាយជាក់ស្តែង នៅមិនទាន់លេចចេញជារូបរាងនៅឡើយទេ។ ក៏ប៉ុន្តែ លោក អ៊ីន គង់ចិត្រ មន្រ្តីស៊ើបអង្កេតរបស់អង្គការសិទ្ធិមនុស្សលីកាដូប្រចាំខេត្តកោះកុង និងតំណាងប្រជាពលរដ្ឋ អ្នកស្រី ផាវ ញើង បានចាត់ទុកថា គឺជាដំណើរវិជ្ជមានមួយ ដែលឈានទៅរកដំណោះស្រាយលើជម្លោះដីធ្លីរបស់ប្រជាពលរដ្ឋ ៧៣៨គ្រួសារ ជាមួយក្រុមហ៊ុនស្ករអំពៅ Koh Kong Sugar និង Koh Kong Plantation ដែលបានអូសបន្លាយអស់រយៈពេល១០ឆ្នាំមកហើយ។
បើតាមប្រភពព័ត៌មានពីខេត្តកោះកុងបានឲ្យដឹងថា ក្រុមការងារក្រសួងរៀបចំដែនដី នគររូបនីយកម្ម និងសំណង់ ដឹកនាំដោយលោក ទេព ធន រដ្ឋលេខាធិការនិងជាប្រធានក្រុមការងារដោះស្រាយវិវាទដីធ្លី បានចាប់ផ្តើមស្រង់ព័ត៌មាន និងទិន្នន័យ របស់ប្រជាពលរដ្ឋតាំងពីថ្ងៃទី១៨ខែសីហា នឹងបន្តធ្វើនៅថ្ងៃនេះទៀត មុនពេលក្រុមការងារនេះ ទៅជួបជាមួយភាគីក្រុមហ៊ុន និងអាជ្ញាធរដែនដី។
គួររំលឹកជូនថា ដំណើរចុះទៅកាន់ខេត្តកោះកុងរបស់ក្រុមការងារក្រសួងដែនដីនៅពេលនេះ គឺឆ្លើយតបទៅនឹងការសន្យាស្វែងរកដំណោះស្រាយជូនប្រជាពលរដ្ឋ បន្ទាប់ពីប្រជាពលរដ្ឋ១៤៧គ្រួសារ បានឡើងមកតវ៉ានៅទីក្រុងភ្នំពេញ កាលពីថ្ងៃទី៤ សីហា។ កាលណោះ តំណាងពលរដ្ឋសហគមន៍មានទំនាស់ដីធ្លី ក្នុងស្រុកស្រែអំបិល និងស្រុកបុទុមសាគរចំនួន ១៤៧ គ្រួសារ បានដាក់ញត្តិទៅក្រសួងដែនដី នគរូបនីយកម្ម និងសំណង់, សហភាពអឺរ៉ុប, រដ្ឋសភា និងក្រសួងកសិកម្មផង ដើម្បីទាមទារកាត់ដីចំនួន ៧៨២.១៦ ហិកតា ពីក្រុមហ៊ុន Koh Kong Sugar និង Koh Kong Plantation ជូនប្រជាពលរដ្ឋ ដែលធ្លាប់ប្រើប្រាស់ជាក់ស្តែងនោះវិញ។
សូមបញ្ជាក់ថា ជម្លោះដីធ្លីរបស់ប្រជាពលរដ្ឋ១៤៧គ្រួសារ គឺស្ថិតនៅក្នុងចំណោមប្រជាពលរដ្ឋ ៧៣៨គ្រួសារ មកពីស្រុកស្រែអំបិល និងស្រុកបុទុមសាគរនៃខេត្តកោះកុង បានកើតឡើងតាំងពីខែសីហាឆ្នាំ២០០៦មក ពោលគឺបន្ទាប់ពីក្រសួងកសិកម្ម រុក្ខាប្រមាញ់និងនេសាទ បានសម្រេចប្រគល់ដីសម្បទានសេដ្ឋកិច្ចជាង៧០០ហិចតាទៅឲ្យក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ មុនពេលលោកផ្ទេរសិទ្ធទៅឲ្យក្រុមហ៊ុនស្ករអំពៅមកពីប្រទេសថៃនៅឆ្នាំ២០០៩។ ជាង១០ឆ្នាំមកនេះ ប្រជាពលរដ្ឋក្នុងស្រុកទាំងពីរនៃខេត្តកោះកុង បានប្រឈមនឹងការចាប់ខ្លួន និងការចោទប្រកាន់តាមផ្លូវតុលាការ នៅក្នុងសកម្មភាពតវ៉ាដើម្បីស្វែងរកដំណោះស្រាយនេះ។
សូមបញ្ជាក់ដែរថា បន្ទាប់ពីស្រង់ព័ត៌មាន និងទិន្នន័យរបស់ប្រជាពលរដ្ឋចប់ ក្រុមការងារនេះ នឹងរាយការណ៍ទៅកាន់រដ្ឋមន្រ្តីក្រសួងរៀបចំដែនដី លោក ជា សុផារា ដើម្បីចេញសេចក្តីសម្រេចមួយឈានទៅបញ្ចប់ជម្លោះដីធ្លីដ៏រ៉ាំរ៉ៃមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ