កម្ដៅនយោបាយ និងយុទ្ធសាស្ត្រចាប់ដៃជាន់ជើង
ចុះផ្សាយនៅថ្ងៃ៖
ស្តាប់ - ០៤:២៧
ដំណើរមាតុភូមិនិវត្តរបស់លោក សម រង្ស៊ី កាលពីម្សិលមិញ ត្រូវបានគេរំពឹងថា អាចជាគន្លឹះឈានទៅដោះស្រាយបញ្ហានយោបាយនៅកម្ពុជា ដែលកំពុងតែឡើងកម្ដៅយ៉ាងខ្លាំង នៅមួយរយៈចុងក្រោយនេះ។ យ៉ាងណាក៏ដោយ ក្ដីសង្ឃឹមនេះ កើតឡើងទន្ទឹមនឹងភាពអស់សង្ឃឹម។ អស់សង្ឃឹមព្រោះដំណោះស្រាយនយោបាយគ្រានេះ ប្រហែលជាមិនអាចធានាឲ្យបានយូរអង្វែងទេ ប្រសិនបើបក្សប្រជាជននិងសង្គ្រោះជាតិ នៅតែប្រកាន់យកនយោបាយចាប់ដៃជាន់ជើងដូចសព្វថ្ងៃ។
វិបត្តិនយោបាយនៅកម្ពុជា មានភាពស្មុគស្មាញនិងធ្ងន់ធ្ងរណាស់ នៅអាណត្តិទី៥នេះ។ កម្ដៅនយោបាយបានកើនឡើងយ៉ាងខ្លាំង ក្រោយការបោះឆ្នោតឆ្នាំ២០១៣ និងបន្តរហូតដល់ពាក់កណ្ដាលឆ្នាំ២០១៤។ បក្សប្រឆាំងមិនទទួលស្គាល់លទ្ធផលបោះឆ្នោត ហើយចោទបក្សកាន់អំណាចថា លួចបន្លំសន្លឹកឆ្នោត។ បាតុកម្មតវ៉ាជំទាស់កើតឡើងជាបន្តបន្ទាប់ ជំរុញឲ្យមានការរាប់សន្លឹកឆ្នោតឡើងវិញនៅការិយាល័យបោះឆ្នោតមួយចំនួន។
វិបត្តិនយោបាយបានកើនកម្ដៅដល់កម្រិតកំពូល នៅពេលបក្សកាន់អំណាចប្រើកម្លាំង បង្ខំឲ្យបក្សប្រឆាំងបញ្ចប់ការតវ៉ាតាមដងផ្លូវ។ ប៉ុន្តែការតវ៉ាតាមដងផ្លូវរបស់បក្សសង្គ្រោះជាតិមិនបានបញ្ចប់ទាំងស្រុងទេ គឺរហូតមានការប៉ះទង្គិចគ្នាជាថ្មីទៀត នៅថ្ងៃទី១៥កក្កដា ឆ្នាំ២០១៤ ក្នុងយុទ្ធនាការរំដោះទីលានប្រជាធិបតេយ្យ។ យុទ្ធនាការកាលណោះ បានផ្ដល់ឱកាសឲ្យរដ្ឋាភិបាលនៃបក្សប្រជាជន ចាប់ខ្លួនតំណាងរាស្ត្រនិងសកម្មជនបក្សប្រឆាំងដាក់ពន្ធនាគារថែមទៀតផង។
ដោយសារព្រឹត្តិការណ៍នេះ បក្សជាប់ឆ្នោតទាំងពីរបានជួបចរចាគ្នា ហើយសម្រេចព្រមព្រៀងគ្នាបញ្ចប់ភាពជាប់គាំងខាងនយោបាយ នៅថ្ងៃទី២២កក្កដាឆ្នាំ២០១៤។ តាំងពីថ្ងៃទី២២កក្កដានោះមក កម្ដៅនយោបាយបានធ្លាក់ចុះវិញបន្តិច នៅពេលតំណាងរាស្ត្រនិងសកម្មជនបក្សប្រឆាំង ត្រូវបានដោះលែង។
ចុងក្រោយនេះ ការចាប់ខ្លួនសកម្មជននិងសមាជិកព្រឹទ្ធសភាពីបក្សជំទាស់ ព្រមទាំងបញ្ហាចម្រូងចម្រាស់រឿងព្រំដែន បានធ្វើឲ្យវិបត្តិនយោបាយពុះកញ្ជ្រោលជាថ្មី។ រហូតមកទល់ពេលនេះ មិនទាន់មានទេ ដំណោះស្រាយ។ ប៉ុន្តែបក្សជាប់ឆ្នោតទាំងពីរចោទប្រកាន់គ្នាទៅវិញទៅមកថា ប្រើប្រាស់នយោបាយចាប់ដៃជាន់ជើង។ នយោបាយចាប់ដៃជាន់ជើង ដែលបានធ្វើឲ្យរាត្រីទឹកឃ្មុំរបស់បក្សទាំងពីរ ប្រែជារាត្រីទឹកខ្មេះ។
ដំបូងនិយាយពីគណបក្សប្រជាជនកម្ពុជា។ ថ្មីៗនេះ ប្រធានបក្សកាន់អំណាច លោក ហ៊ុន សែន បានបង្ហើបពីការសង្ស័យរបស់ខ្លួនចំពោះភាពស្មោះត្រង់របស់គណបក្សសង្គ្រោះជាតិ។ ការសង្ស័យនេះ កើតឡើងព្រោះតែតំណាងរាស្ត្របក្សប្រឆាំង អុកឡុករដ្ឋាភិបាលបក្សកាន់អំណាចយ៉ាងខ្លាំងក្នុងរឿងព្រំដែន ជាពិសេសគឺបដិសេធដាច់ណាត់ការធ្វើវិសោធនកម្មមាត្រា២នៃរដ្ឋធម្មនុញ្ញ ខណៈដែលប្រមុខបក្សប្រឆាំង មានជំហផ្ទុយពីតំណាងរាស្ត្ររបស់ខ្លួន។ បើតាមលោកនាយករដ្ឋមន្ដ្រី លោក សម រង្ស៊ី បានផ្ញើសារមករូបលោក ក្នុងន័យស្នើឲ្យពិនិត្យលទ្ធភាពនៃការធ្វើវិសោធនកម្មមាត្រា២ នៃរដ្ឋធម្មនុញ្ញ។ លោកនាយករដ្ឋមន្ដ្រីថា វាជាការសង្ស័យណាស់ រឿងចាប់ដៃជាន់ជើងនោះ។
និយាយពីគណបក្សសង្គ្រោះជាតិ។ សង្គ្រោះជាតិ រងគ្រោះដោយនយោបាយចាប់ដៃជាន់ជើង ឬនយោបាយលាក់កាំបិតស្នៀតពីក្រោយខ្នងរបស់បក្សកាន់អំណាចជាថ្មីម្ដងទៀត នៅពេលមានការចាប់ខ្លួនសកម្មជនរបស់ខ្លួន និងសមាជិកព្រឹទ្ធសភាពីគណបក្សសមរង្ស៊ី។ ថ្វីត្បិតតែបក្សកាន់អំណាចអះអាងថា ការចាប់ខ្លួននេះធ្វើឡើងតាមនីតិវិធីតុលាការក៏ដោយ ប៉ុន្តែបើផ្អែកតាមបទពិសោធកន្លងមក បញ្ហាដូច្នេះ អាចនឹងបញ្ចប់ដោយវប្បធម៌សន្ទនា ព្រមទាំងកិច្ចព្រមព្រៀងនយោបាយ ដែលផ្ដល់ប្រយោជន៍ឲ្យបក្សកាន់អំណាច ជាងបក្សប្រឆាំង។
ជាការពិត ថ្វីត្បិតតែវប្បធម៌សន្ទនាហាក់ដូចជារីកចម្រើនទៅមុខបន្តិចក្ដី ក៏ប៉ុន្តែនយោបាយចាប់ដៃជាន់ជើងនៅតែកើតឡើងជាបន្តបន្ទាប់ ដូចទឹករលក។ កន្លងមក នៅក្នុងអំឡុងពេលចរចា ជំនួបប្រជុំរវាងអ្នកនយោបាយ កើតឡើងទន្ទឹមនឹងការគម្រាមចាប់ដាក់គុក។
សកម្មភាពអស់ទាំងនេះសរបង្ហាញឲ្យឃើញយ៉ាងច្បាស់ពីនយោបាយចាប់ដៃជាន់ជើង ដែលកើតចេញពីការមិនទុកចិត្តគ្នារវាងអ្នកនយោបាយ។ ទម្លាប់នេះ បើនៅតែបន្តទៅមុខទៀត វាអាចធ្វើឲ្យជាតិប្រេះឆា មិនអាចចូលគ្នាចុះដូចទឹកនិងប្រេង។
ជំងឺមិនទុកចិត្ត មិនមែនថាមិនអាចព្យាបាលបានទេ ប៉ុន្តែវាត្រូវការការស្ម័គ្រចិត្តពីអ្នកជំងឺខ្លួនឯង។ នយោបាយចាប់ដៃជាន់ជើង ក៏ដូចគ្នាដែរ។ ដើម្បីឈានទៅព្យាបាលទម្លាប់នយោបាយដ៏ចាស់គំរិលនេះ អ្នកនយោបាយត្រូវតែពង្រឹងទំនុកចិត្ត តាមរយៈការពង្រីកវប្បធម៌នយោបាយស្មោះត្រង់ និងទុកចិត្តគ្នាទៅវិញទៅមក។ ព្រោះបើគ្មានភាពស្មោះត្រង់ និងការទុកចិត្តទេ វិបត្តិនយោបាយនៅតែកើតឡើងជាដរាប គ្មានឡើយដំណោះស្រាយនយោបាយដាច់ស្រេចនិងយូរអង្វែង។ ជាការពិត ការងារនេះជារឿងពិបាក ប៉ុន្តែមិនមែនមិនអាចទៅរួចសោះនោះទេ។ វាគ្រាន់តែត្រូវការពេលវេលា និងកិច្ចខិតខំប្រឹងប្រែងច្រើនតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ