អ្នកនយោបាយចាប់អារម្មណ៍ផ្តល់អំណោយឱ្យបេក្ខជនណាដែលប្រលងជាប់បាក់ឌុប
ឆ្នាំនេះ បេក្ខជនដែលត្រូវប្រលងសញ្ញាបត្រមធ្យមសិក្សាទុតិយភូមិនៅតំបន់ខ្លះ អាចធូរសោហ៊ុយថ្លៃធ្វើដំណើរ ដោយសារតែមានសប្បុរសជនជាអ្នកនយោបាយ យកចិត្តទុកដាក់រំលែកបន្ទុករបស់ពួកគេ។ បេក្ខជនណាដែលប្រឡងជាប់សញ្ញាបត្រអាចទទួលបានប្រាក់ផង ហើយអ្នកបាននិទ្ទេសល្អអាចបានទោចក្រយានយន្តថ្មីមួយគ្រឿងផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
សិស្សថ្នាក់ទី១២ នៅស្រុកកោះធំ ខេត្តកណ្តាល នឹងទទួលបានប្រាក់បួនសែនរៀល ពីរដ្ឋមន្ត្រីក្រសួងពាណិជ្ជកម្ម បើពួកគេប្រលងសញ្ញាបត្រមធ្យមសិក្សាទុតិយភូមិឆ្នាំនេះជាប់។ នេះជាការប្រកាសរបស់លោក ស៊ុន ចាន់ថុល ដែលបានសន្យាបន្ថែមទៀតថា បេក្ខជនណាដែលទទួលបាននិទ្ទេសល្អ ក្នុងសម័យប្រលងថ្ងៃទី២៤ និង២៥ ខែសីហា ឆ្នាំ២០១៥ខាងមុននោះ នឹងបានទោចក្រយានយន្តថ្មីមួយគ្រឿងជាង្វាន់«លើកទឹកចិត្ត»។
លោកទេសរដ្ឋមន្ត្រី ស៊ុន ចាន់ថុល បានឱ្យដឹងដូច្នេះ តាមរយៈទំព័រហ្វេសប៊ុកក្រសួងពាណិជ្ជកម្ម ដែលបង្ហាញគណៈប្រតិភូមួយក្រុម ចុះសួរសុខទុក្ខ និងសំណេះសំណាល ជាមួយសិស្សានុសិស្ស៦៩៣នាក់ មកពីវិទ្យាល័យប៊ុនរ៉ានីហ៊ុនសែនព្រែកតាដួង វិទ្យាល័យហ៊ុនសែនកោះធំ វិទ្យាល័យសំពៅពូន និងវិទ្យាល័យកំពង់កុង ក្នុងស្រុកជាប់ព្រំដែនវៀតណាម។ នៅថ្ងៃទី១៤ ខែសីហា ឆ្នាំ២០១៥ លោករដ្ឋមន្ត្រីក្រសួងពាណិជ្ជកម្ម បានផ្តល់ប្រាក់ឱ្យសិស្សម្នាក់ចំនួនពីរម៉ឺនរៀល និងគ្រូម្នាក់បួនម៉ឺនរៀល មុនពេលការប្រឡងចាប់ផ្តើមនៅថ្ងៃចន្ទសប្ដាហ៍ក្រោយ។
ព្រឹត្តិការណ៍បែបនេះរីករាលដាលគួរឱ្យកត់សម្គាល់ ក្នុងចំណោមអ្នកនយោបាយរបស់គណបក្សប្រជាជនកម្ពុជា នារដូវប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៤-២០១៥នេះ។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា យល់ថា នេះជារូបភាពនៃ«ការលើកទឹកចិត្ត» និងជា«ការធ្វើអំណោយសប្បុរសធម៌» ហើយអ្នកផ្តល់«ចង់បានកិត្តិយស មុខមាត់ ការសរសើរ» និង«ការស្រឡាញ់» ពីមហាជន ព្រមទាំងពីសិស្សនិស្សិត។ ទោះបីជាយ៉ាងណាក៏ដោយ លោក ព្រាបកុល ជឿថា ក្នុងការប្រលង ទោះបីជាមិនមានអំណោយក៏សិស្សត្រូវតែខំប្រឹងប្រលងឱ្យជាប់ដែរ ព្រោះវាជា«កាតព្វកិច្ច»របស់សិស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ