ពលរដ្ឋសហគមន៍ផ្លូវរថភ្លើង ស្នើ ADBប្រចាំហ្វីលីពីន អន្តរាគមលើ ADBប្រចាំកម្ពុជា រឿងគម្រោងផ្លូវដែកនៅភ្នំពេញ
នៅព្រឹកថ្ងៃទី ១១ឧសភានេះ ប្រជាពលរដ្ឋសហគមន៍ផ្លូវរថភ្លើង ក្នុងរាជធានីភ្នំពេញ បានប្រមូលផ្តុំគ្នា នៅមុខស្ថានទូតហ្វីលីពីនប្រចាំកម្ពុជា ដើម្បីធ្វើសន្និសីទកាសែតមួយ។ ជាសន្និសីទកាសែត ក្នុងគោលដៅ ស្នើសុំឲ្យធនាគារអភិវឌ្ឍន៍អាស៊ី ប្រចាំប្រទេសហ្វីលីពីន ជួយអន្តរាគមមកលើធនាគារអភិវឌ្ឍន៍អាស៊ីប្រចាំនៅកម្ពុជា ដើម្បីផ្តល់ព័ត៌មានលម្អិត ពីគម្រោងអភិវឌ្ឍផ្លូវដែក ដល់ប្រជាសហគមន៍ផ្លូវដែក ក្នុងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
សន្និសីទកាសែត នៅមុខស្ថានទូតហ្វីលីពីនរបស់ប្រជាពលរដ្ឋសហគមន៍ផ្លូវរថភ្លើង នៅថ្ងៃចន្ទនេះ គឺក្នុងគោលបំណងធំៗចំនួនពីរ ដោយស្នើសុំឲ្យធនាគារអភិវឌ្ឍន៍អាស៊ី ហៅកាត់ថា ADB ប្រចាំនៅប្រទេសហ្វីលីពីន ជួយអន្តាគមន៍មកលើ ADB ប្រចាំនៅកម្ពុជា ដើម្បីផ្តល់ព័ត៌មានលម្អិតទាក់ទងនឹងគម្រោងអភិវឌ្ឍផ្លូវដែក ដល់ពលរដ្ឋសហគមន៍ផ្លូវដែក ក្នុងរាជធានីភ្នំពេញ។ គម្រោងអភិវឌ្ឍផ្លូវដែក ដែលប្រជាពលរដ្ឋក្នុងសហគមន៍នេះ តែងអះអាងថា មិនទាន់មានការផ្តល់ព័ត៌មានពីការផ្តល់ប្រាក់កម្ចី ដល់រដ្ឋាភិបាលកម្ពុជាច្បាស់លាស់។
តាមសេចក្តីថ្លែងការណ៍របស់ប្រជាសហគមន៍ផ្លូវដែកនោះ គឺ ADB ប្រាកដជាមានឯកសារ និងព័ត៌មានលម្អិតពីគម្រោងអភិវឌ្ឍន៍ផ្លូវដែកនៅកម្ពុជា ទាំងមូល និងបានសិក្សាយ៉ាងល្អិតល្អន់ មុននឹងអនុម័តផ្តល់ប្រាក់កម្ចី ឬប្រាក់គាំទ្រផ្សេងៗ ដល់រដ្ឋាភិបាលកម្ពុជា។ ប្រជាពលរដ្ឋ យល់ថា ADB ជាស្ថាប័នអន្តរជាតិ ត្រូវមានតម្លាភាព និងស្មារតីទទួលខុសត្រូវខ្ពស់ ចំពោះគ្រួសារដែល ទទួលរងផលប៉ះពាល់ដោយផ្ទាល់ និងដោយប្រយោលពីគម្រោងគាំទ្ររបស់ខ្លួន។
គោលបំណងទី២ គឺប្រជាពលរដ្ឋសហគមន៍ផ្លូវដែក នៅតែរក្សាជំហរទាមទារឲ្យមានកិច្ចប្រជុំជាត្រីភាគី ដែលមានតំណាងសហគមន៍ចំនួន ៨នាក់ តំណាងក្រុមហ៊ុនថូលរូយ៉ាល់ ក្រុមហ៊ុនរូយ៉ាល់គ្រុប ដែលមានសិទ្ធិអំណាចពេញលេញ ក្នុងការឆ្លើយនឹងសំណួររបស់ពលរដ្ឋ និងភាគីតំណាង ADB ប្រចាំនៅកម្ពុជា។ ហើយនៅក្នុងការជួបប្រជុំនោះ ប្រជាសហគមន៍ ក៏ទាមទារឲ្យមានការធ្វើកំណត់ហេតុប្រជុំដែលមានការទទួលស្គាល់ពីគ្រប់ភាគី និងការថ្លែងជាសាធារណៈជាមួយអ្នកសារព័ត៌មាន ក្រោយពេលបញ្ចប់កិច្ចប្រជុំ។
សូមបញ្ជាក់ថា ប្រជាពលរដ្ឋសហគមន៍ផ្លូវដែក បានព្យាយាមជាច្រើនលើកច្រើនសារ ក្នុងការទាមទារយកព័ត៌មានលម្អិត ពីគម្រោងអភិវឌ្ឍន៍ផ្លូវដែកនៅកម្ពុជា តាំងពីខែសីហា ឆ្នាំ ២០១៤ ក៏ប៉ុន្តែប្រជាពលរដ្ឋទាំងនោះ បានអះអាងថាពួកគេតែងតែទទួលបានការពន្យាពេល ហើយមិនមានការផ្តល់ព័ត៌មានជាក់លាក់ណាមួយដល់ពួកគេនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ