រថភ្លើងដឹកអ្នកដំណើរភ្នំពេញ-ព្រះសីហនុ មិនទាន់កំណត់ពេលដំណើរការទេ
មកទល់នឹងថ្ងៃនេះ ខ្សែរថភ្លើងដឹកអ្នកដំណើរពីភ្នំពេញទៅខេត្តព្រះសីហនុ ដែលគេរំពឹងថានឹងត្រូវដាក់អោយដំណើរការនៅដើមឆ្នាំ២០១៦ នៅមិនទាន់មានសកម្មភាពនៅឡើយទេ។ មិនទាន់មានសកម្មភាព ព្រោះក្រុមហ៊ុនកំពុងសិក្សាលំអិតទៅលើគម្រោងនេះនៅឡើយ។
ចុះផ្សាយនៅថ្ងៃ៖
លោក ទិត សំអឿន ប្រធានផ្នែកពាណិជ្ជកម្ម របស់ក្រុមហ៊ុន រ៉ូយ៉ាល់ រ៉េលវេ (Royal Railway) បានអោយដឹងថា ក្រុមហ៊ុនមិនទាន់កំណត់ពេលវេលាច្បាស់លាស់ ដើម្បដាក់អោយរថភ្លើងដំណើរការនៅឡើយទេ ព្រោះក្រុមហ៊ុនកំពុងតែធ្វើការសិក្សាផ្ទៃក្នុងនៅឡើយ។ ក្នុងការសិក្សានេះ រួមមាន ថ្លៃឈ្នួលសម្រាប់អ្នកដំណើរម្នាក់ៗ កាលវិភាគនៃការធ្វើដំណើរ ចំនួនទូររថភ្លើងដែលដាក់អោយរត់នៅលើផ្លូវដែក និងចំនួនអ្នកដំណើរនៅលើរថភ្លើងជាដើម។ លោកបន្តថា ក្រុមហ៊ុននឹងធ្វើការផ្សព្វផ្សាយ អំពីកាលបរិច្ឆេទច្បាស់លាស់ទាក់ទងនឹងការដាក់អោយដំណើរការនូវរថភ្លើងដឹកអ្នកដំណើរពីភ្នំពេញទៅខេត្តព្រះសីហនុ នៅពេលដែលក្រុមហ៊ុនធ្វើការសិក្សារួចរាល់។
សូមរំលឹកថា កាលពីដើមខែមករា ឆ្នាំ២០១៦ ក្រុមហ៊ុនរ៉ូយ៉ាល់រ៉េលវេ បានសាកល្បងដាក់អោយដំណើរការនូវរថភ្លើងដឹកអ្នកដំណើរចំនួន៣ទូរ ពីរាជាយស្ម័យយានភ្នំពេញទៅដល់ស្ថានីយរថភ្លើងអូដឹម ក្នុងគោលបំណងដឹកអ្នកដំណើរពីភ្នំពេញទៅខេត្តព្រះសីហនុ។
លោក RUSSEL TIZON មន្ត្រីផ្នែកសេវាកម្មអតិថិជនរបស់ក្រុមហ៊ុនរ៉ូយ៉ាល់រ៉េលវេ បានប្រាប់អ្នកសារព័ត៌មានក្នុងស្រុកថា ការចេញដំណើរពីភ្នំពេញទៅកាន់ខេត្តព្រះសីហនុ និងពីខេត្តព្រះសីហនុមកកាន់ភ្នំពេញត្រូវប្រើរយៈពេល ៨ម៉ោង និងមានចម្ងាយផ្លូវ ២៦០គីឡូម៉ែត្រ ហើយបើកក្នុងល្បឿន ៣៥គីឡូម៉ែត្រក្នុង ១ម៉ោង។ លោកថាការបើកដំណើរការឡើងវិញនេះនូវការដឹកអ្នកដំណើរនេះ គឺផ្តោតសំខាន់លើភ្ញៀវទេសចរ និងដើម្បីកាត់បន្ថយការកកស្ទះចរាចរតាមផ្លូវជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ