តុលាការចេញដីការចាប់ខ្លួន លោក សម រង្ស៊ី និងមន្ដ្រីអតីតបក្សប្រឆាំង៨នាក់ទៀត ពីបទ «ប៉ុនប៉ងធ្វើរដ្ឋប្រហារ»
តុលាការកម្ពុជា នៅថ្ងៃព្រហស្បតិ៍ ទី០៣តុលាម្សិលមិញ បានចេញដីកាឲ្យចាប់ខ្លួនលោក សម រង្ស៊ី និងថ្នាក់ដឹកនាំអតីតគណបក្សប្រឆាំង៨រូបទៀត ក្នុងនោះរួមមានទាំងភរិយារបស់លោក សម រង្ស៊ី ម្នាក់ផង។ ដីកាចាប់ខ្លួននេះ ធ្វើឡើងក្រោមបទចោទ «ឧបឃាត» ឬ «ការប៉ុនប៉ងធ្វើរដ្ឋប្រហារ» តាមរយៈផែនការនៃការវិលត្រលប់មកកម្ពុជាវិញរបស់លោក សម រង្ស៊ី នៅថ្ងៃទី ០៩ វិច្ឆិកា ខាងមុខ។ ប៉ុន្តែលោក សម រង្ស៊ី បានចាត់ទុកការចោទប្រកាន់នេះថា គ្រាន់ជាលេស ដើម្បីរារាំងមាតុភូមិនិវត្តន៍របស់លោកដោយសន្តិវិធីតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២៧
ដីកាចាប់ខ្លួនលោក សម រង្ស៊ី និងថ្នាក់ដឹកនាំអតីតគណបក្សប្រឆាំងទាំង៨រូប ត្រូវបានបញ្ជូនទៅកាន់ស្ថាប័នមានសមត្ថកិច្ចរួចហើយ ដើម្បីអនុវត្តទៅតាមច្បាប់ និងនីតិវិធីជាធរមាន។ នេះបើតាមការគូសបញ្ជាក់របស់អ្នកនាំពាក្យសាលាដំបូងរាជធានីភ្នំពេញ តាមរយៈសេចក្តីប្រកាសព័ត៌មានមួយ កាលពីយប់ ថ្ងៃទី ០៣ តុលា។
តាមរយៈសេចក្តីប្រកាសព័ត៌មាននេះ លោក សម រង្ស៊ី និងអតីតថ្នាក់ដឹកនាំគណបក្សប្រឆាំងទាំង៨រូបទៀត ក្នុងនោះរួមមាន លោក អេង ឆៃអ៊ាង, លោកស្រី មូរ សុខហួរ, លោក អ៊ូ ច័ន្ទឫទ្ធិ, លោក ហូរ វ៉ាន់, លោក ឡុង រី, លោក ម៉ែន សុថាវរិន្ទ្រ លោក នុត រំដួល និងរួមទាំងលោកស្រី ជូឡុង សូមួរ៉ា ភរិយារបស់លោក សម រង្ស៊ី ម្នាក់ផង ត្រូវបានអយ្យការអមសាលាដំបូងរាជធានីភ្នំពេញចោទប្រកាន់នៅក្នុងសំណុំរឿងព្រហ្មទណ្ឌលេខ ៦៥៣៦ ចុះថ្ងៃទី ១៩ កញ្ញា ឆ្នាំ២០១៩ ពីបទ «ឧបឃាត» តាមមាត្រា ២៧ និងមាត្រា ៤៥១ នៃក្រមព្រហ្មទណ្ឌកម្ពុជា។ ជាបទចោទពាក់ព័ន្ធនឹងអង្គហេតុនៃ «ការប៉ុនប៉ងធ្វើរដ្ឋប្រហារ» ផ្តួលរំលំរដ្ឋាភិបាលកម្ពុជា ក្រោមឧបាយកលជា «ផែនការនៃការវិលត្រលប់មកកម្ពុជាវិញរបស់លោក សម រង្ស៊ី» ដោយមានការអំពាវនាវ និងប្រើថវិកាប៉ុនប៉ងបង្កើតកងកម្លាំងឧទ្ទាមប្រដាប់អាវុធខុសច្បាប់ ដើម្បីចូលរួមអនុវត្តផែនការនេះ។ នេះបើតាមសេចក្តីប្រកាសព័ត៌មាន។
យ៉ាងណាក្តី លោក សម រង្ស៊ី ដែលកំពុងរស់នៅដោយនិរទេសខ្លួននៅក្រៅប្រទេស បានសរសេរតាមបណ្តាញសង្គមហ្វេសបុកកាលពីថ្ងៃទី ០៣ តុលា ដោយបានចាត់ទុកការចោទប្រកាន់នេះថា គ្រាន់ជាលេសរបស់លោកនាយករដ្ឋមន្ត្រី ហ៊ុន សែន ដើម្បីរារាំងមាតុភូមិនិវត្តន៍របស់លោកដោយសន្តិវិធីតែប៉ុណ្ណោះ។ លោក សម រង្ស៊ី បានបកស្រាយថា មាតុភូមិនិវត្តន៍របស់លោក នៅថ្ងៃ ០៩ វិច្ឆិកាខាងមុខនេះ គឺមិនមែនជារដ្ឋប្រហារទេ តែជាការបំផុស “អំណាចប្រជាពលរដ្ឋ” នៅកម្ពុជា ដូចព្រឹត្តិការណ៍ដែលបានកើតឡើងនៅប្រទេសហ្វីលីពីនក្នុងឆ្នាំ១៩៨៦អីចឹងដែរ។
គួរកត់សំគាល់ថា ដីកាចាប់ខ្លួនលោក សម រង្ស៊ី និងថ្នាក់ដឹកនាំអតីតគណបក្សប្រឆាំងទាំង៨រូបនេះ បានធ្វើឡើងក្រោយពីការព្រមានខ្លាំងៗរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ០២ តុលា ដោយលោកនឹងមិនអត់ឱនឲ្យឡើយ ចំពោះជនទាំងឡាយណាដែលចូលរួមក្នុងយុទ្ធនាការ «លើកម្រាមដៃ៩» ដែលជាការគាំទ្រផែនការវិលត្រលប់របស់លោក សម រង្ស៊ី។ ។ បន្ថែមលើនេះ ប្រមុខរដ្ឋាភិបាលកម្ពុជាលោក ហ៊ុន សែន បានអះអាងថា ដីកាចាប់ខ្លួនលោក សម រង្ស៊ី និងថ្នាក់ដឹកនាំអតីតគណបក្សប្រឆាំងទាំង៨រូប ត្រូវបានបញ្ជូនទៅកាន់ប្រទេសជាសមាជិកអាស៊ានរួចហើយ។ សូមបញ្ជាក់ថា នេះគឺជាសំណុំរឿងថ្មីចុងក្រោយបំផុត ក្នុងចំណោមសំណុំរឿងជាច្រើន ដែលប្រឆាំងនឹងអតីតប្រធានគណបក្សប្រឆាំង លោក សម រង្ស៊ី ចាប់តាំងពីតុលាការកំពូលបានរំលាយគណបក្សប្រឆាំង កាលពីខែវិច្ឆិកា ឆ្នាំ២០១៧មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ