លោករ៉ាត់ រដ្ឋមុនី អាចប្រឈមនឹងទោសជាប់ពន្ធនាគារយ៉ាងតិច១ឆ្នាំ បើសិនតុលាការរកឃើញកំហុស
លោករ៉ាត់ រដ្ឋមុនី ដែលបានចូលរួមផលិតភាពយន្តឯកសារស្តីពីការលក់កូនស្រីជាមួយទូរទស្សន៍រុស្ស៊ី ត្រូវបានតុលាការក្រុងភ្នំពេញសម្រេចឃុំខ្លួនបណ្តោះអាសន្ននៅក្នុងពន្ធនាគារកាលពីល្ងាចមិញនេះ។ តុលាការបានចោទប្រកាន់លោកពីបទញុះញង់ឲ្យមានការរើសអើងតាមមាត្រា៤៩៦នៃក្រមព្រហ្មទណ្ឌ។ តាមមាត្រាច្បាប់នេះ លោករ៉ាត់ រដ្ឋមុនី អាចប្រឈមនឹងការជាប់ពន្ធនាគារយ៉ាងតិចមួយឆ្នាំ បើសិនតុលាការរកឃើញថាលោកបានប្រព្រឹត្តកំហុសមែននោះ។
ចុះផ្សាយនៅថ្ងៃ៖
ស្តាប់ - ០១:៥៩
ប្រធានសហព័ន្ធសហជីពកម្មករសំណង់កម្ពុជា លោករ៉ាត់ រដ្ឋមុនី អាចប្រឈមនឹងទោសជាប់ពន្ធនាគារពី១ ឆ្នាំទៅ៣ឆ្នាំនិងពិន័យជាទឹកប្រាក់ពី២លានរៀលទៅ៦លានរៀល ប្រសិនបើតុលាការកម្ពុជារកឃើញថាលោកបានប្រព្រឹត្តបទល្មើសញុះញង់ឲ្យមានការរើសអើង។ បទល្មើសញុះញង់ឲ្យមានការរើសអើងនេះ ត្រូវបានចោទប្រកាន់ឡើង បន្ទាប់ពីលោករ៉ាត់ រដ្ឋមុនី បានចូលរួមផលិតខ្សែភាពយន្តឯកសារ“ម្តាយខ្ញុំ លក់ខ្ញុំ” ជាមួយទូរទស្សន៍RT របស់រុស្ស៊ី។ ជាខ្សែភាពយន្តឯកសារដែលអាជ្ញាធរខ្មែរអះអាងថា ធ្វើឲ្យប៉ះពាល់ដល់មុខមាត់របស់កម្ពុជា។
លោករ៉ាត់ រដ្ឋមុនី ត្រូវបានអាជ្ញាធរកម្ពុជាទៅនាំខ្លួនពីប្រទេសថៃមកកាន់ប្រទេសកម្ពុជាកាលពីរសៀលថ្ងៃទី១២ ធ្នូ ក្រោយពីលោកត្រូវបានអាជ្ញាធរថៃចាប់ និងឃុំខ្លួនអស់រយៈពេល៥ថ្ងៃនៅមណ្ឌលឃុំខ្លួនជនអន្តោរប្រវេសន៍ក្នុងទីក្រុងបាងកក ប្រទេសថៃ។ កាលពីថ្ងៃព្រហស្បតិ៍ លោកត្រូវបានចៅក្រមស៊ើបសួរនៃសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ននៅក្នុងពន្ធនាគារ ដើម្បីបន្តនីតិវិធីស៊ើបអង្កេត។
អ្នកស្រីឡុង គឹមហ៊ាង ភរិយារបស់លោករ៉ាត់ រដ្ឋមុនី បានប្រាប់បណ្តាញសារព័ត៌មានថា អ្នកស្រីមិនអាចទទួលបានទេនូវការចោទប្រកាន់មកលើប្តីអ្នកស្រីបែបនេះ ព្រោះថាប្តីរបស់អ្នកស្រីមិនបានធ្វើអ្វីខុសនោះឡើយ។ ជាមួយគ្នានេះ អ្នកស្រីក៏គ្រោងនឹងធ្វើបាតុកម្ម ដើម្បីទាមទាររកយុត្តិធម៌សម្រាប់ប្តីអ្នកស្រីផងដែរ។ បន្ថែមលើនេះ អ្នកស្រីឡុង គឹមហ៊ាង ក៏បានស្នើឲ្យអាជ្ញាធរកម្ពុជាគួរតែកោះហៅតំណាងទូរទស្សន៍RT ដើម្បីមកបញ្ជាក់ជុំវិញការផលិតភាពយន្តឯកសារទាក់ទងនឹងការជួញដូរផ្លូវភេទនេះ។
នាយកផលិតខ្សែភាពយន្តឯកសារ“ម្តាយខ្ញុំ លក់ខ្ញុំ” លោក Pavel Burnatov បានសម្តែងនូវការផ្អើលចំពោះការប្រតិកម្មរបស់រដ្ឋាភិបាលកម្ពុជាមកលើខ្សែភាពយន្តឯកសាររបស់លោក។ ចំណែកទូរទស្សន៍RT (Russia Today) វិញ បានសម្តែងនូវការព្រួយបារម្ភយ៉ាងខ្លាំងចំពោះការឃុំខ្លួនលោករ៉ាត់ រដ្ឋមុនី ។ RT បានបញ្ជាក់ប្រាប់កាសែតខ្មែរថាមន៍កាលពីថ្ងៃអង្គារថា ខ្លួនកំពុងតែធ្វើគ្រប់យ៉ាងដែលអាចធ្វើទៅបាន ដើម្បីជួយដោះស្រាយបញ្ហានេះដែលក្នុងនោះ រួមមានទាំងតាមរយៈផ្លូវទូតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ