អ្នកស្រី រ៉ូណា ស្មីត នៅតែព្រួយបារម្ភពីស្ថានភាពក្នុងមជ្ឈមណ្ឌលព្រៃស្ពឺ
នៅព្រឹកថ្ងៃពុធនេះ អ្នកស្រី រ៉ូណា ស្មីត អ្នករាយការណ៍ពិសេស នៃអង្គការសហប្រជាជាតិ បានជួបជាមួយនឹងរដ្ឋមន្ត្រីក្រសួងសង្គមកិច្ច។ អ្នកស្រី រ៉ូណា ស្មីត បានសម្តែងការព្រួយបារម្ភពីស្ថានភាព និងការបំបិទសិទ្ធក្រុមគ្រួសារ ព្រមទាំងមន្ត្រីសង្គមស៊ីវិល មិនឲ្យចូលទៅសួរសុខទុក្ខអ្នកជាប់ឃុំ ក្នុងមជ្ឈមណ្ឌលព្រៃស្ពឺ។ ប៉ុន្តែរដ្ឋមន្ត្រីក្រសួងសង្គមកិច្ច លោក វង្ស សូត បានឆ្លើយតបថា ស្ថានភាពនៅទីនោះ ល្អប្រសើរជាងមុន ហើយគេអាចចូលសួរសុខទុក្ខមនុស្សនៅទីនោះ ២៤ម៉ោងលើ២៤ម៉ោង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ក្នុងដំណើរទស្សនកិច្ចឈ្វេងយល់ពីសិទ្ធិមនុស្សនៅកម្ពុជា ក្នុងថ្ងៃទី៣នេះ អ្នករាយការណ៍ពិសេសរបស់អង្គការសហប្រជាជាតិ អ្នកស្រី រ៉ូណា ស្មីត បានលើកឡើងពីការព្រួយបារម្ភពីបំបិទសិទ្ធិ ហាមឃាត់មិនឲ្យក្រុមគ្រួសារ និងមន្ត្រីរបស់អង្គការសង្គមស៊ីវិល មិនឲ្យចូលទៅសួរសុខទុក្ខអ្នកជាប់ឃុំ ឬអ្នកស្នាក់នៅ ក្នុងមជ្ឈមណ្ឌលសុំចតរាជធានីភ្នំពេញ ឬហៅថាមជ្ឈមណ្ឌលព្រៃស្ពឺ។
ជាការឆ្លើយតប រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង្ស សូត បានឆ្លើយតបថា ស្ថានភាពនៅទីនោះ ល្អប្រសើរជាងមុនច្រើន ដោយសារតែការកសាងហេដ្ឋារចនាសម្ព័ន្ធក្នុងមណ្ឌល, បង្កើនអគារស្នាក់នៅបន្ថែមទៀត ព្រមទាំងផ្តល់ការថែទាំវេជ្ជសាស្ត្រជាដើម។ លើសពីនេះ គេអាចចូលសួរសុខទុក្ខមនុស្សនៅទីនោះ បាន២៤ម៉ោងលើ២៤ម៉ោង។
ចំណែកអ្នកនាំពាក្យរដ្ឋមន្ត្រីក្រសួងសង្គមកិច្ច បានប្រាប់វិទ្យុបារាំងបន្ថែមថា ក្នុងជំនួបនោះ ក៏បានលើកឡើងពីវិស័យពិការភាព ដែលមានការវិវត្តតាមរយៈការជ្រើសរើសជនពិការឲ្យចូលធ្វើការ ហើយក្រសួងក៏បានពង្រឹងការផ្តល់ប្រាក់រង្វាន់សម្រាប់ជនពិការ ក្នុងមុខជំនាញផ្សេងៗ ពិសេសនៅក្នុងការប្រកួតកីឡាសម្រាប់ជនពិការជាដើម។
តាមប្រភពដដែល ចំពោះកុមារ និងជនអនាថា ពិសេសអនីតិជន ដែលមានទំនាស់នឹងច្បាប់ គឺជំរុញឲ្យបំបែកកុមារដែលនៅក្នុងពន្ធនាគារ ទៅដាក់នៅមណ្ឌលកែប្រែដាច់ដោយឡែក ហើយក្រសួងកំពុងកសាងមណ្ឌលថ្មីនេះ។
ជុំវិញការស្មុំកូនអន្តរប្រទេស ក្រសួងសង្គមកិច្ចបានគូសបញ្ជាក់ប្រាប់អ្នកស្រី រ៉ូណា ស្មីត ថា មានចំនួនថយចុះ ហើយក្រសួងយកទឹកចិត្តក្នុងការរកអាណាព្យាបាលទទួលសុំចិញ្ចឹមកូននៅក្នុងស្រុកឲ្យអស់លទ្ធភាព មុននឹងអនុញ្ញាតឲ្យស្មុំកូនអន្តរប្រទេស។
សូមជម្រាបដែរថា កាលពីថ្ងៃអង្គារកន្លងទៅ អ្នកស្រី រ៉ូណា ស្មីត បានជួបជាមួយអភិបាលក្រុងភ្នំពេញ និងគណៈកម្មាធិការសិទ្ធិមនុស្សកម្ពុជា ព្រមទាំងក្រសួងយុត្តិធម៌។ ក្នុងឱកាសនេះ អ្នកស្រីបានលើកឡើងពីស្ថានភាពសិទ្ធិទូទៅនៅកម្ពុជា និងពិសេសការវាយដំទៅលើមន្ត្រីសិទ្ធិមនុស្ស កាលពីថ្ងៃចន្ទ គឺចំពេលនៃថ្ងៃផ្តើមធ្វើទស្សនកិច្ចរបស់អ្នកស្រី។
ចំណែកនៅពេលជួបជាមួយរដ្ឋមន្ត្រីក្រសួងយុត្តិធម៌ អ្នកស្រី ស្មីត បានរម្លឹកពីបញ្ហាកកស្ទះចំនួនអ្នកទោសក្នុងពន្ធនាគារ។ អ្នកស្រីស្នើឲ្យមានតម្លាភាពសេវាយុត្តិធម៌ និងការអនុវត្តទោសសហគមន៍ ដោយឲ្យអ្នកទោសស្រាលទៅជួយធ្វើការងារសង្គម។ លើសពីនេះ អ្នកស្រីប្រឆាំងនឹងការពពោះជំនួស ហើយអ្នកស្រីគាំទ្រឲ្យមានច្បាប់ទប់ស្កាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ