សមត្ថកិច្ចថា នឹងស្រាវជ្រាវ និងស៊ើបអង្កេតរកឱ្យឃើញមេខ្លោងគ្រឿងញៀននៅមជ្ឈមណ្ឌលរ៉ុក
គិតមកដល់ព្រឹកថ្ងៃចន្ទ ទី២៥ កុម្ភៈនេះ អាជ្ញាធរមានសមត្ថកិច្ច កំពុងតែបន្តសួរចម្លើយលើមនុស្សជាង៣០០នាក់ដែលត្រូវបានឃាត់ខ្លួនពាក់ព័ន្ធបញ្ហាគ្រឿងញៀននៅក្នុងមជ្ឈមណ្ឌលរ៉ុក។ អាជ្ញាធរបានអះអាងថា អ្វីៗកំពុងស្ថិតក្នុងការស៊ើបអង្កេតស្រាវជ្រាវ ដើម្បីរកឱ្យឃើញមេខ្លោងគ្រឿងញៀននៅក្នុងមជ្ឈមណ្ឌលរ៉ុកនេះ យកទៅផ្តន្ទាទោសតាមច្បាប់។
ចុះផ្សាយនៅថ្ងៃ៖
លោកម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀនបានអះអាងប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះថា អាជ្ញាធរនឹងបន្ថែមពេលវេលា២៤ម៉ោងទៀត ដើម្បីបន្តសាកសួររកចម្លើយលើជនសង្ស័យពាក់ព័ន្ធគ្រឿងញឿនជាង៣០០នាក់ក្នុងគោលបំណងរកឱ្យឃើញនូវមេខ្លោងគ្រឿងញៀននៅក្នុងមជ្ឈមណ្ឌលរ៉ុក។ លោកថា តុលាការក៏បានឯកភាពនឹងអាជ្ញាធរហើយដែរក្នុងការបន្ថែមពេលវេលាសាកសួរនេះ។ យ៉ាងណាក៏ដោយ មកទល់នឹងពេលនេះ អាជ្ញាធរនៅមិនទាន់រកឃើញប្រភពនៃការចែកចាយគ្រឿងញៀន និងមេខ្លោងនៅឡើយទេ។
គួរបញ្ជាក់ថា កងកម្លាំងនគរបាលរាជធានីភ្នំពេញកាលពីយប់ថ្ងៃទី២២ កុម្ភៈកន្លងទៅ បានឆ្មក់ចូលទៅចាប់ឃាត់ខ្លួនមនុស្សប្រុស ស្រី ដែលភាគច្រើនជាយុវជនចំនួនជាង៣០០នាក់នៅក្នុងមជ្ឈមណ្ឌលកម្សាន្តរ៉ុកសង្ស័យពាក់ព័ន្ធនឹងបទល្មើសគ្រឿងញៀន។ ក្នុងនោះ ក៏មានជនជាតិចិនចំនួន១៤នាក់ផងដែរ។ បន្ទាប់ពីឃាត់ខ្លួន សមត្ថកិច្ចបានដកហូតនូវសារធាតុញៀនប្រមាណ ៥០ គីឡូក្រាម និងកាំភ្លើងខ្លីមួយដើម។ ក្រោយប្រតិបត្តិការនេះមួយថ្ងៃ សមត្ថកិច្ចក៏បានសម្រេចបិទមជ្ឈមណ្ឌលរ៉ុក ដើម្បីផ្ដល់លទ្ធភាពឱ្យអាជ្ញាធរ និង តុលាការបន្តនីតិវិធីស្រាវជ្រាវរកប្រភពនៃការនាំចូលគ្រឿងញៀននិងក្រុមជនល្មើស។
ក្រុមជនសង្ស័យទាំងជាង៣០០នាក់ កំពុងស្ថិតនៅស្នងការនគរបាលរាជធានីភ្នំពេញនៅឡើយគិតត្រឹមថ្ងៃនេះ ដើម្បីបន្តសាកសួរចម្លើយ និងស្រាវជ្រាវវែករកមុខមេខ្លោង។ បើតាមលោកម៉ក់ ជីតូ អាជ្ញាធរបានញែកក្រុមជនសង្ស័យទាំងនេះជាបីក្រុម គឺក្រុមមិនជាប់ពាក់ព័ន្ធគ្រឿងញៀន នឹងត្រូវធ្វើការអប់រំណែនាំនិងឱ្យវិលត្រឡប់ទៅផ្ទះវិញ។ រីឯក្រុមប្រើប្រាស់គ្រឿងញៀននឹងបញ្ជូនទៅកាន់មណ្ឌលបន្សាបគ្រឿងញៀន ចំណែកក្រុមចែកចាយគ្រឿងញៀន នឹងត្រូវកសាងសំណុំរឿងបញ្ជូនទៅកាន់តុលាការ។ ប៉ុន្តែនៅពេលនេះ លោកថា មិនទាន់សរុបបាននៅឡើយទេ ថាតើអ្នកណាខ្លះជាអ្នកចែកចាយ អ្នកប្រើប្រាស់ និងអ្នកមិនជាប់ពាក់ព័ន្ធ។
ដោយឡែក ទាក់ទងនឹងវិធានការច្បាប់ទៅលើម្ចាស់មជ្ឈមណ្ឌលកម្សាន្តរ៉ុកវិញ លោកម៉ក់ ជីតូ មិនអាចបញ្ជាក់ឱ្យបានច្បាស់លាស់នោះទេ ដោយលោកអះអាងថា កំពុងកសាងសំណុំរឿងទៅកាន់តុលាការសាលាដំបូងរាជធានីភ្នំពេញ ហើយរឿងឃាត់ខ្លួនយ៉ាងណាយ៉ាងណីនោះ គឺរង់ចាំមើលលទ្ធផលនៃការកសាងសំណុំរឿងនេះសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ