លោក រស់ សាលីន៖« គ្មានការបែកធ្លាយវិញ្ញាសាប្រឡងបាក់ឌុបឆ្នាំនេះជាដាច់ខាត»
ក្រសួងអប់រំ យុវជន និងកីឡា អះអាងថា ការប្រឡងសញ្ញាប័ត្រមធ្យមសិក្សាទុតិយភូមិឬបាក់ឌុបឆ្នាំ ២០១៥ ដែលប្រព្រឹត្តទៅនៅថ្ងៃទី ២៤ ខែ សីហា ខាងមុខនេះ នឹងមិនមានការបែកធ្លាយវិញ្ញាសាប្រឡងជាដាច់ខាត។ នេះបើតាមការឲ្យដឹងពី លោក រស់ សាលីន អ្នកនាំពាក្យក្រសួងអប់រំយុវជន និងកីឡា នៅរសៀលថ្ងៃទី ២៧ កក្កដា នេះ។
ចុះផ្សាយនៅថ្ងៃ៖
ស្តាប់ - ០១:២៧
ថ្លែងចំពោះមុខអ្នកសារព័ត៌មាន នៅក្នុង«សន្និសីទសារពត៌មានស្តីពីការរៀបចំការប្រឡងសញ្ញាប័ត្រមធ្យមសិក្សាទុតិយភូមិចំណេះទូទៅ និង បំពេញវិជ្ជា» លោក រស់ សាលីន អ្នកនាំពាក្យក្រសួងអប់រំយុវជននិងកីឡា បានបង្ហាញពីជំនឿយ៉ាងមុតមាំរបស់ក្រសួង ក្នុងការធ្វើឲ្យមានតម្លាភាពក្នុងការប្រឡង ពោលគឺឲ្យមិនឲ្យមានការលេចធ្លាយវិញ្ញាសានានា ក្នុងការប្រឡងបាក់ឌុបឆ្នាំនេះទេ។ មិនឲ្យមានការបែកធ្លាយ ដោយសារតែមានការអនុវត្តច្បាប់និងបទបញ្ញាត្តិតឹងរឹង ចំពោះអ្នកដែលប្រព្រឹត្តខុស ដោយក្នុងនោះក្រសួង បានលើកយកច្បាប់ចំនួន៤ ដូចជា ច្បាប់អប់រំ ច្បាប់ព្រហ្មទណ្ឌ ច្បាប់ស្តីពីការប្រឆាំងអំពើពុករលួយ និងលក្ខខន្តិកៈមន្រ្តីរាជការស៊ីវិល។
អ្នកនាំពាក្យរូបនេះ បានបន្ថែមថា ការប្រឡងឆ្នាំនេះ នឹងធានាបាននូវសុចរិតភាព យុត្តិធម៌ និង តម្លាភាព ដោយសារមានការចូលរួមសហការពីសំណាក់ស្ថាប័នពាក់ព័ន្ធ ដូចជា អង្គភាពប្រឆាំងអំពើពុករលួយ ក្រសួងមហាផ្ទៃ ព្រមទាំងអ្នកអង្កេតការណ៍ប្រមាណ៣ ពាន់នាក់ផងដែរ។
ក្រៅពីនេះ លោក រស់ សាលីន បានសង្កត់ធ្ងន់ថា ដើម្បីធានាបាននូវគុណភាពអប់រំ ក្រសួងនឹងធ្វើការរឹតបន្តឹង មិនឲ្យមានការយកចូលនូវសំណៅឯកសារ ទូរស័ព្ទដៃ ឧបករណ៍អេឡិចត្រូនិចនានា ព្រមទាំងម៉ាស៊ីនគិតលេខផងដែរ។
ទោះបីជាក្រសួងធ្វើការរឹតបន្តឹងសម្រាប់ការប្រឡងក្នុងឆ្នាំនេះ ក៏ដោយ ប៉ុន្តែ ក្រសួងអប់រំ នឹងនៅតែមានសុទិដ្ឋិនិយមថា ចំនួនបេក្ខជនជាប់បាក់ឌុបនឹងកើនឡើង បើប្រៀបធៀបនឹងសម័យប្រឡងបាក់ឌុប ឆ្នាំ២០១៤។
គួរជម្រាបជូនថា សម្រាប់ការប្រឡងឆ្នាំនេះ ក្រសួងអប់រំគ្រោងនឹងចំណាយថវិកា ៣ លានដុល្លារ ដោយមានគណៈមេប្រយោគចូលរួម ប្រមាណ ៥ ពាន់នាក់ ស្របពេលបេក្ខជនដែលចូលរួមប្រឡង ចំនួន ៨៨៤៨៨ នាក់៕
អត្តបទដោយ៖ សួន សុគន្ធពិដោរ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ