លោកសម រង្ស៊ី សង្ឃឹមថានឹងអាចវិលចូលស្រុកវិញនៅមុនការបោះឆ្នោតឃុំ-សង្កាត់
ថ្លែងទៅកាន់អ្នកគាំទ្ររបស់ខ្លួននៅក្រុងតាខ្មៅខេត្តកណ្តាល កាលពីចុងសប្តាហ៍កន្លងទៅ លោកសម រង្ស៊ី ដែលនៅឯក្រៅប្រទេស បានបង្ហាញសេចក្តីសង្ឃឹមយ៉ាងមុតមាំថា លោកនឹងអាចវិលត្រឡប់មកកាន់កម្ពុជាវិញនៅមុនការបោះឆ្នោតឃុំ-សង្កាត់ ឆ្នាំ ២០១៧។ ការវិលត្រឡប់មកវិញនេះ គឺដោយសារតែមានការជួយជ្រោមជ្រែងពីសហគមន៍អន្តរជាតិ ពិសេសសហរដ្ឋអាមេរិក។ ប៉ុន្តែមន្ត្រីរដ្ឋាភិបាល និង មន្ត្រីសង្គមស៊ីវិល និយាយថា ក្តីសង្ឃឹមនេះហាក់នៅឆ្ងាយដូចជើងមេឃ។
ចុះផ្សាយនៅថ្ងៃ៖
ស្តាប់ - ០១:៤៧
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានលើកឡើងថា ការដែលលោក សម រង្ស៊ីស្នើសុំឲ្យសហគមន៍អន្តរជាតិ ជាពិសេសសហរដ្ឋអាមេរិក ជួយជ្រោមជ្រែងលោកឲ្យបានវិលត្រឡប់ចូលស្រុកវិញ ដោយមិនមានទោសពៃនោះ គឺជាទង្វើរំលោភអធិបតេយ្យរបស់កម្ពុជា ជាពិសេសប្រព័ន្ធយុត្តិធម៌កម្ពុជា។
អ្នកនាំពាក្យរូបនេះ បន្តទៀតថា នៅក្នុងកិច្ចប្រជុំកំពូលសហរដ្ឋអាមេរិក និងអាស៊ាន ដែលនឹងប្រព្រឹត្តិទៅនៅពាក់កណ្តាលខែកុម្ភៈនេះ សហរដ្ឋអាមេរិកមិនមានរបៀបវារៈប្រជុំដាច់ដោយឡែកជាមួយកម្ពុជានោះទេ។ ហើយប្រសិនបើករណីរបស់ លោកសម រង្ស៊ីត្រូវបានលើកឡើងក្នុងពេលណាមួយនោះ វាគ្រាន់តែជាការគួរសមតែប៉ុណ្ណោះ ។ ឯកម្ពុជាមានសិទ្ធិគ្រប់គ្រាន់ក្នុងការរក្សាគោលជំហររបស់ខ្លួន។
លោក ផៃ ស៊ីផាន រំលឹកដែរថា ការដែលលោក សម រង្ស៊ី អាចវិលចូលស្រុកវិញបានកាលពីឆ្នាំ ២០១៣នោះ គឺដោយសារតែហប្ញទ័យករុណារបស់ព្រះមហាក្សត្រ និង ទឹកចិត្តសណ្តោសរបស់លោកនាយករដ្ឋមន្ត្រី មិនមែនដោយសារអន្តរាគមន៍របស់អាមេរិក ឬ សហគមន៍អន្តរជាតិនោះទេ។
ដូចគ្នានេះដែរ លោក អ៊ូ វិរៈ នាយកវិទ្យាស្ថានវេទិកាអនាគតកម្ពុជា មើលឃើញថា លទ្ធភាពវិលចូលស្រុកវិញរបស់លោកសម រង្ស៊ី នៅពេលនេះ គឺតិចតួចស្តួចស្តើងណាស់។ លោកថា បើទោះបីជាមានសហគមន៍អន្តរជាតិខ្លះចង់ជួយលោក សម រង្ស៊ី ដើម្បីពង្រឹងការអនុវត្តលទ្ធិប្រជាធិបតេយ្យនៅកម្ពុជាក៏ដោយ ក៏គេមិន អាចដាក់គំនាបលើរដ្ឋាភិបាលកម្ពុជាបានដែរ។
ម្យ៉ាងវិញទៀត ការវិលចូលស្រុកវិញរបស់លោក សម រង្ស៊ី នឹងក្លាយជាឧបសគ្គរបស់បក្សកាន់អំណាច ។ ដូច្នេះបក្សកាន់អំណាច មិនអាចធ្វេសប្រហែសដូចកាលពីឆ្នាំ ២០១៣ នោះទៀតទេ។
សូមរំលឹកថា ក្នុងរយៈពេលកន្លងមក លោកនាយករដ្ឋមន្ត្រី ហ៊ុន សែន ធ្លាប់បានចុះហត្ថលេខាលើលិខិតលើកលែងទោសឲ្យ លោក សម រង្ស៊ី ចំនួនពីរលើករួចមកហើយ។ ប៉ុន្តែនៅចុងឆ្នាំ២០១៥កន្លងមកនេះ លោកនាយករដ្ឋមន្ត្រី ហ៊ុន សែន បានលើកឡើងថា លោកនឹងកាត់ដៃស្តាំចោល បើលោកចុះហត្ថលេខាលើលិខិតស្នើសុំលើកលែងទោសឲ្យ លោក សម រង្ស៊ី ម្តងទៀតនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ