លោក សម រង្ស៊ី បន្ទន់ឥរិយាបថលើរឿងព្រំដែនតែស្នើឲ្យដោះលែងសកម្មជនដែលកំពុងជាប់ឃុំ
ប្រធានគណបក្សប្រឆាំងលោក សម រង្ស៊ី បានបង្ហាញគោលជំហរទន់ភ្លន់លើសំណើរួមគ្នារវាង ប្រមុខរដ្ឋាភិបាលកម្ពុជា និងវៀតណាម ក្នុងការអញ្ជើញអ្នកជំនាញការខាងផែនទីបារាំង ជួយផ្ទេរខ្នាតផែនទីពី១លើ១០០ពាន់ទៅ១លើ៥០ពាន់។ លោក សម រង្ស៊ី បានលើកឡើងថា ការផ្ទេរខ្នាតផែនទី គឺងាយស្រួលក្នុងការពិនិត្យលើដីជាក់ស្តែង ប៉ុន្តែលោកមិនគាំទ្រការកែរប្រែរដ្ឋធម្មនុញ្ញកម្ពុជាមាត្រា២នោះទេ។ ជាមួយនឹងជំហរបែបនេះ លោក សម រង្ស៊ី ក៏បានទទួចឲ្យរដ្ឋាភិបាលកម្ពុជាដោះលែងអ្នកជំនាញខាងកិច្ចការព្រំដែនរបស់លោក ហើយសុំឲ្យរដ្ឋាភិបាលប្រើប្រាស់ពួកគេនៅក្នុងកិច្ចការងារព្រំដែននេះ។ ប៉ុន្តែអ្នកនាំពាក្យគណបក្សប្រជាជនកម្ពុជា បានលើកឡើងថា ទោះបីជាលោក សម រង្ស៊ី បង្ហាញការគាំទ្រមិនស្មោះត្រង់ក្តី ក៏លោកត្រូវតែគាំទ្រដែរ។
ចុះផ្សាយនៅថ្ងៃ៖
ស្តាប់ - ០២:៤៥
លោក សម រង្ស៊ី ប្រធានគណបក្សប្រឆាំងដែលតែងតែរិះគន់លើការបោះបង្គោលព្រំដែនកម្ពុជា-វៀតណាម និងធ្លាប់រងការកាត់ទោសឲ្យជាប់ពន្ធនាគារ២ឆ្នាំ ដោយសារការដកតម្រុយបង្គោលព្រំដែននៅស្រុកចន្ទ្រាខេត្តស្វាយរៀងកាលពីឆ្នាំ២០១០នោះ បានបង្ហាញជំហរគាំទ្រលើសំណើរបស់ប្រមុខរដ្ឋាភិបាលកម្ពុជានិងវៀតណាម ក្នុងការអញ្ជើញអ្នកជំនាញខាងផែនទីបារាំងឲ្យជួយផ្ទេខ្នាតផែនទីពី១/១០០.០០០ ទៅ ១/៥០.០០០ វិញ។
លោក សម រង្ស៊ី ដែលកំពុងរស់នៅដោយនិរទេសខ្លួននៅក្រៅប្រទេសបានសរសេរនៅលើបណ្តាញទំនាក់ទំនងសង្គម Facebookកាលពីរសៀលថ្ងៃទី២៨វិច្ឆិកាថា ការផ្ទេខ្នាតផែនទីពី១/១០០.០០០ ទៅ១/៥០.០០០ នឹងជួយដល់ដំណើរការបោះបង្គោលព្រំដែនកាន់តែច្បាស់លាស់ថែមទៀតពិសេសមានការជួយពីអ្នកជំនាញការបារាំង ដែលលោកកាន់តែជឿជាក់។ ប៉ុន្តែប្រធានគណបក្សប្រឆាំងរូបនេះ មិនគាំទ្រការកែររដ្ឋធម្មនុញ្ញនៃព្រះរាជាណាចក្រកម្ពុជាមាត្រា២ ដែលបានចែងថា៖ "បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត ១/១០០.០០០ ដែលធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩"។
គួរំលឹកជូនថា ប្រមុខរដ្ឋាភិបាលកម្ពុជានិងវៀតណាម កាលពីថ្ងៃទី២២វិច្ឆិកាបានព្រមព្រៀងគ្នា ដោយធ្វើលិខិតរួមគ្នាទៅកាន់ប្រធានាធិបតីបារាំង ដើម្បីបញ្ជូនអ្នកជំនាញផែនទីជួយផ្ទេខ្នាតផែនទីពី១/១០០.០០០ ទៅ ១/៥០.០០០ សម្រាប់សម្រួលការបោះបង្គ្រោលព្រំដែន ដែលនៅប្រទាញប្រទង់គ្នានៅតំបន់រស៊ើបមួយចំនួន ខណៈដែលអ្នកជំនញ និងជាអ្នកសិក្សាពីព្រំដែនកម្ពុជា បានអះអាងថា កម្ពុជានិងវៀតណាមបានដើរដល់ចំណុចចរចាគ្នាលែងបាន។
តាមរយៈការកត់សំគាល់ចំនួន៧ចំណុច លោក សម រង្ស៊ី បានគាំទ្រឲ្យភាគីកម្ពុជា-វៀតណាម អញ្ជើញអ្នកជំនាញបារាំងមកជួយ ដោយលោកជឿជាក់ថា ក្នុងកាលៈទេសៈបច្ចុប្បន្ន ជំនួយបច្ចេកទេសពីប្រទេសបារាំង មិនអាចធ្វើឲ្យប្រទេសកម្ពុជាទទួលការបង់ខាតអ្វីទេ។ ផ្ទុយទៅវិញ អន្តរាគមន៍ពីប្រទេសបារាំងនឹងធ្វើឲ្យសហគមន៍អន្តរជាតិចាប់អារម្មណ៍ពីបញ្ហាព្រំដែនរវាងប្រទេសកម្ពុជានិងប្រទេសវៀតណាម ហើយនឹងជួយផ្តល់យុត្តិធម៌ឲ្យប្រទេសកម្ពុជាផង។
ជាមួយនឹងជំហរបែបនេះ លោក សម រង្ស៊ី ក៏បានស្នើឲ្យរដ្ឋាភិបាលកម្ពុជា ដោះលែងសមាជិកព្រឹទ្ធសភាលោក ហុង សុខហួរ និងលោក អ៊ុំ សំអាន ដែលកំពុងជាប់ពន្ធនាគា ដោយសាតែបានលើកពីបញ្ហាផែនទី ហើយថារដ្ឋាភិបាលគួរតែយកពួកគេមកជួយធ្វើការដើម្បីបម្រើផលប្រយោជន៍ប្រទេសជាតិទាំងអស់គ្នា។ ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា បានចាត់ទុកថា ការលើកឡើងរបស់លោក សម រង្ស៊ីនេះ គ្រាន់តែជាការឆ្លៀតឱកាសតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ