លោកសម រង្ស៊ី ចេញទៅបារាំងខណៈព័ត៌មានពីជំនួបជាមួយសម្តេចក្រុមព្រះនៅជាអាថ៌កំបាំង
លោកសម រង្សី ប្រធានគណបក្សសង្គ្រោះជាតិ បានចាកចេញពីប្រទេសកម្ពុជាទៅកាន់ប្រទេសបារាំងដោយស្ងៀមស្ងាត់កាលពីយប់ថ្ងៃចន្ទម្សិលមិញ។ ការចាកចេញរបស់ប្រមុខបក្សប្រឆាំងកម្ពុជានៅពេលនេះ គឺបានធ្វើឡើង បន្ទាប់ពីមានលេចឮព័ត៌មានថា លោកនិងសម្តេចក្រុមព្រះ ប្រធានគណបក្សហ្វ៊ុនស៊ីនប៉ិច គ្រោងជួបគ្នានៅទីនោះនៅក្នុងខែតុលានេះ ដើម្បីជជែកគ្នាពីការបង្រួបបង្រួមគណបក្សទាំងពីរ។ ប៉ុន្តែព័ត៌មាននេះស្ថិតក្នុងអាថ៌កំបាំងនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
នៅម៉ោងប្រមាណជិត៩យប់ថ្ងៃចន្ទទី១២ តុលា ដែលជាថ្ងៃភ្ជុំបិណ្ឌ លោកសម រង្ស៊ី និង ភរិយារបស់លោកបានចាកចេញពីប្រទេសកម្ពុជាទៅកាន់ប្រទេសបារាំង។ លោកយ៉ែម ប៉ុញ្ញរិទ្ធ អ្នកនាំពាក្យសង្គ្រោះជាតិ បានបញ្ជាក់ថា លោកសម រង្ស៊ី នឹងចំណាយពេលនៅទីនោះប្រមាណពីបីទៅបួនសប្តាហ៍ ដើម្បីជួបជាមួយសកម្មជន និងអ្នកគាំទ្រគណបក្សសង្គ្រោះជាតិ និង បំពេញបេសកម្មមួយចំនួនទៀតនៅអឺរ៉ុប។
ការចាកចេញរបស់ប្រមុខគណបក្សប្រឆាំងកម្ពុជានៅពេលនេះ គឺបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលេចឮព័ត៌មានមួយកាលពីចុងសប្តាហ៍មុនថា លោកសម រង្ស៊ី គ្រោងជួបជាមួយសម្តេចក្រុមព្រះនរោត្តម រណឫទិ្ធ ព្រះប្រធានគណបក្សហ្វ៊ុនស៊ិនប៉ិចនៅប្រទេសបារាំងនៅក្នុងខែតុលានេះ។ ជំនួបនោះធ្វើឡើងក្នុងគោលបំណង ដើម្បីពិភាក្សាស្វែករកការបង្រួបបង្រួមរវាងគណបក្សទាំងពីរ។
ជុំវិញព័ត៌មាននេះ លោកញឹក ប៊ុនឆៃ អនុប្រធានគណបក្សហ្វ៊ុន ស៊ិនប៉ិច បានថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអង្គារនេះថា មកដល់ពេលនេះ លោកមិនទាន់ទទួលបានព័ត៌មានបែបណាមួយទេអំពីជំនួបនោះពីសម្តេចក្រុមព្រះ។
ចំណែកលោកយ៉ែម បុញ្ញរិទ្ធ អ្នកនាំពាក្យគណបក្សសង្គ្រោះជាតិវិញ មិនបានបញ្ជាក់ឲ្យបានដាច់ណាត់ទេ ថាតើនឹងមានជំនួបនោះដែរឫយ៉ាងណា ដោយលោកអះអាងថា ពុំទទួលបានព័ត៌មានច្បាស់លាស់។ អ្នកនាំពាក្យរូបនេះគ្រាន់តែគូសបញ្ជាក់ថា នៅខែតុលានេះលោកសម រង្ស៊ី មានវត្តមាននៅបារាំង ហើយប្រមុខរដ្ឋាភិបាលកម្ពុជានឹងអញ្ជើញទៅនោះដែរនៅចុងខែ។ ក៏ប៉ុន្តែលោកមិនដឹងទេថា តើសម្តេចក្រុមព្រះយាងទៅទីនោះដែរឫអត់។ បើតាមលោកញឹម ប៊ុនឆៃ នៅពេលនេះ សម្តេចក្រុមព្រះកំពុងស្ថិតនៅក្នុងប្រទេសថៃ។
យ៉ាងណាក៏ដោយ លោកយ៉ែម ប៉ុញ្ញឫទ្ធិ បានសង្កត់ធ្ងន់ថា ការរួបរួមគ្នា គឺស្ថិតនៅលើគោលការណ៍ជាក់លាក់មួយ ហើយប្រសិនបើមានការចូលរូមអនុវត្តគោលការណ៍នោះឲ្យពិតប្រាកដជាមួយគ្នា នោះការរួបរួមរវាងអ្នកប្រជាធិបតេយ្យ និង អ្នករាជានិយម មិនមានអ្វីជាបញ្ហាចោទនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ