លោកហ៊ុន សែន ផ្ញើសារឱ្យបក្សប្រឆាំងគោរពច្បាប់
លោកនាយករដ្ឋមន្ត្រីហ៊ុន សែន នៅព្រឹកថ្ងៃសុក្រទី ២៤ មិថុនានេះ បានទៅបង់ប្រាក់ពិន័យចំនួន១ម៉ឺន៥ពាន់រៀលនៅសាលាសង្កាត់ចតុមុខបន្ទាប់ពីលោកបានជិះមូតូមិនបានពាក់មួកសុវត្ថិភាព។ ប៉ុន្តែនៅក្នុងនោះលោកក៏បានថ្លែងបែបឌឺដងឱ្យទៅគណបក្សសង្គ្រោះជាតិផងដែរ។ មិនត្រឹមតែប៉ុណ្ណោះលោក បានអំពាវនាវឱ្យមនុស្សទាំងអស់រួមទាំងអ្នកមានទ្រព្យ និងអំណាចត្រូវគោរពច្បាប់។
ចុះផ្សាយនៅថ្ងៃ៖
ស្តាប់ - ០២:២៧
លោកនាយករដ្ឋមន្ត្រីហ៊ុន សែន បានផ្ញើសារដោយប្រយោលដល់គណបក្សសង្គ្រោះជាតិត្រូវតែគោរពច្បាប់ និងមិនត្រូវប្រែក្លាយទៅជានយោបាយ និងពឹងពាក់បរទេសមកគាបសង្កត់កម្ពុជា។ លោកនាយករដ្ឋមន្ត្រីបានសង្កត់ធ្ងន់ថា«អ្នកខុសទាំងឡាយផ្សេងទៀត មិនត្រូវយកហេតុផលនៃការអនុវត្តច្បាប់ដោយសមត្ថកិច្ចទៅជារឿងនយោបាយ ហើយទៅពឹងពាក់បរទេសមកគាបសង្កត់កម្ពុជា ដែលអនុវត្តច្បាប់ ហើយជនបរទេសទាំងឡាយក៏មិនត្រូវលូកលាន់ការអនុវត្តច្បាប់របស់កម្ពុជាផងដែរ»។ លោកបន្តទៀតថា៖ «អភ័យឯកសិទ្ធិសភា ឬអង្គរក្សការពារមិនអាចជួយការពារកំហុសលោកបានទេ ហើយកាន់តែមិនអាចទៅយកអ្នកគាំទ្រលោករាប់លាននាក់ មកជួយការពារប្រឆាំង នឹងការអនុវត្តច្បាប់ដោយកម្លាំងមានសមត្ថកិច្ចបានដែរ ទោះដោយការផ្តិតមេដៃ ឬញត្តិ ឬការហែក្បួនបាតុកម្ម»។ លោកសង្កត់ធ្ងន់ទៀតថា លោកមិនអាចប្រើអំណាចជានាយករដ្ឋមន្ត្រីមករារាំងការអនុវត្តច្បាប់។
ការលើកឡើងនេះ គឺអំឡុងពេលលោកបានចូលទៅបង់ប្រាក់ពិន័យនៅសង្កាត់ចតុមុខក្នុងរាជធានីភ្នំពេញ បន្ទាប់ពីលោកបានជិះម៉ូតូមិនពាក់មួកសុវត្ថិភាពកាលពីថ្ងៃសៅរ៍ សប្តាហ៍មុន នៅខេត្តកោះកុង។ ការថ្លែងសារបែបឌឺដងផ្លែផ្កាឱ្យគណបក្សសង្គ្រោះជាតិនេះគឺ ខណៈគណបក្សសង្គ្រោះជាតិកំពុងប្រមូលផ្តុំអ្នកគាំទ្ររបស់ខ្លួនជិត១ខែមកហើយ នៅទីស្នាក់ការកណ្តាលគណបក្សក្នុងសង្កាត់ចាក់អង្រែលើ។ ជាការប្រមូលផ្តុំ ដើម្បីប្រឆាំងទៅនឹងការអនុវត្តនីតិវិធីរបស់តុលាការមកលើលោក កឹម សុខា ប្រធានស្តីទី ដែលកំពុងសំងំលាក់ខ្លួនក្នុងបក្ស។
បន្ថែមនេះ ក្រៅពីអង្គទូតនៅកម្ពុជាបានបន្តកន្ទុយគ្នាទៅជួបលោកកឹម សុខា នៅទីស្នាក់ការបក្សនោះ អង្គការសហប្រជាជាតិបានសំដែងក្តីព្រួយបារម្ភចំពោះស្ថានការណ៍នយោបាយនៅកម្ពុជា និងបានអំពាវនាវឱ្យបក្សធំទាំងពីរវិលចូលតុចរចាឡើងវិញផងដែរ។ ប៉ុន្តែគណបក្សប្រជាជនកម្ពុជាបានបញ្ជាក់ជាផ្លូវការថាមិនចរចាជាមួយបក្សប្រឆាំងរឿងអ្នក ដែលកំពុងប្រឈមនឹងប្រព័ន្ធតុលាការនោះទេ។ គណបក្សសង្គ្រោះជាតិ ដែលរងចាំការចរចាជាមួយ គណបក្សកាន់អំណាច បានអះអាងថា ស្ថានការណ៍នយោបាយគឺដល់ផ្លូវទាល់ច្រកហើយ កំពុងធ្លាក់ក្នុងវិបត្តិ។
សូមកត់សម្គាល់ថា ក្រៅពីបង់ពិន័យរួចហើយលោកនាយករដ្ឋមន្ត្រីហ៊ុនសែន ដែលកំពុងបង្ហាញភាពសាមញ្ញរបស់ខ្លួន បានជិះម៉ូតូមួយជុំដោយពាក់មួកសុវត្ថិភាព និងបានចូលដុតធូបនៅព្រះអង្គដង្កើរមុខព្រះបរមរាជវាំង ព្រមទាំងបានចែកប្រាក់ជូនពលរដ្ឋនៅទីនោះផងដែរ។ យ៉ាងណាក៏ដោយ តាមរយៈព្រឹត្តិការណ៍នៅព្រឹកនេះ លោក ក៏បានអំពាវនាវឱ្យអន្តរជាតិមិនត្រូវលូកដៃចូលក្នុងកិច្ចការអនុវត្តច្បាប់នៅកម្ពុជានោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ