លោកហ៊ុន សែន ស្នើសុំសហភាពអឺរ៉ុបកុំឲ្យស្ដាប់ព័ត៌មានតែពីខាងគណបក្សប្រឆាំង
លោកនាយករដ្ឋមន្ត្រីហ៊ុន សែន នៅព្រឹកថ្ងៃពុធនេះ បានជួបជាមួយលោក Gerd Moller រដ្ឋមន្ត្រីក្រសួងសហប្រតិបត្តិការសេដ្ឋកិច្ច និងអភិវឌ្ឍន៍អាល្លឺម៉ង់ នៅវិមានសន្តិភាព។ នៅក្នុងជំនួបនោះ លោកហ៊ុន សែន បានប្រាប់ភាគីអាល្លឺម៉ង់អំពីស្ថានភាពទាក់ទងនឹងគណបក្សសង្រ្គោះជាតិ និងបានស្នើទៅកាន់សហភាពអឺរ៉ុបកុំឲ្យស្ដាប់តែព័ត៌មានពីខាងគណបក្សប្រឆាំង។ នេះបើតាមខ្លឹមសារនៃជំនួបទ្វេភាគី ដែលត្រូវបានលោកនាយករដ្ឋមន្ត្រីហ៊ុន សែន បង្ហោះនៅលើទំព័រហ្វេសប៊ុកផ្លូវការរបស់លោកនៅរសៀលនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
តាមរយៈរដ្ឋមន្ត្រីអាល្លឺម៉ង់ លោកនាយករដ្ឋមន្ត្រីហ៊ុន សែន ប្រមុខគណបក្សកាន់អំណាច បានស្នើសុំឲ្យអាល្លឺម៉ង់ ជាពិសេសសហភាពអឺរ៉ុបធ្វើការកែទម្រង់ស្តីអំពីការទទួលបានព័ត៌មាន ដោយកុំស្តាប់ និងទទួលតែព័ត៌មានពីគណបក្សប្រឆាំងតែម្ខាង គឺត្រូវឲ្យស្គាល់ពីអង្គហេតុ និងអង្គច្បាប់ឲ្យបានច្បាស់លាស់ ដើម្បីចៀសវាងការបកស្រាយខុស ជាពិសេសមកលើប្រទេស ដែលមានអធិបតេយ្យភាពដូចជាកម្ពុជានេះ។ ចំពោះបញ្ហា គណបក្សប្រឆាំងវិញ លោកហ៊ុន សែន បានប្រាប់លោកGerd Moller ថាបុគ្គលដែលធ្វើខុស គឺមិនត្រូវយកអង្គការចាត់តាំងនយោបាយ ឬយកអង្គការក្រៅរដ្ឋាភិបាល មកធ្វើជាអាវក្រោះការពារខ្លួននោះទេ។
ការស្នើសុំពីប្រមុខរដ្ឋាភិបាលកម្ពុជានៅពេលនេះ គឺបានធ្វើឡើងក្រោយពីសហភាពអឺរ៉ុបកាលពីថ្ងៃទី ៩ មិថុនាកន្លងទៅ បានចេញសេចក្តីសម្រេច ៧ចំនុច ដោយអំពាវនាវ និងជំរុញឲ្យរដ្ឋាភិបាលកម្ពុជា ត្រូវតែបន្ធូរបន្ថយកម្តៅនយោបាយនាពេលបច្ចុប្បន្ន ហើយត្រូវបញ្ឈប់ការយាយីដោយប្រព័ន្ធតុលាការទៅលើមេដឹកនាំគណបក្សប្រឆាំង រួមទាំងសកម្មជនការពារសិទ្ធិមនុស្ស ដែលកំពុងជាប់ឃុំផ្សេងទៀត និង ត្រូវទម្លាក់រាល់បទចោទប្រកាន់ទៅលើពួកគេ។ ជាមួយគ្នានេះ សភាអឺរ៉ុបក៏បានសម្រេចជំរុញឲ្យអាជ្ញាធរកម្ពុជា ត្រូវត្រឡប់មកបង្កើតវប្បធម៌សន្ទនាជាថ្មី ដើម្បីរក្សាសន្តិភាពជាមួយនឹងគណបក្សប្រឆាំង មុនពេលការបោះឆ្នោតក្រុមប្រឹក្សាក្រុមសង្កាត់ នៅឆ្នាំ ២០១៧ និងការបោះឆ្នោតថ្នាក់ជាតិនៅក្នុងឆ្នាំ ២០១៨។
សូមជម្រាបជូនថា បន្ទាប់ពីបញ្ចប់ការជួបជាមួយលោកនាយករដ្ឋមន្ត្រីហ៊ុន សែន ភា្លម លោក Gerd Moller ក៏បានបន្តដំណើរទៅជួបជាមួយលោកកឹម សុខា ប្រធានស្តីទីគណបក្សសង្រ្គោះជាតិដោយផ្ទាល់នៅឯទីស្នាក់ការកណ្តាលគណបក្សទៀត។ បើតាមលោកយឹម សុវណ្ណ អ្នកនាំពាក្យគណបក្សសង្រ្គោះជាតិ នៅក្នុងជំនួបនោះ លោកកឹម សុខា បានរៀបរាប់ប្រាប់លោករដ្ឋមន្ត្រីអាល្លឺម៉ង់ ថាស្ថានការណ៍នយោបាយនៅកម្ពុជាកំពុងតែធ្លាក់ដុនដាបយ៉ាងធ្ងន់ធ្ងរ ដែលទាមទារឲ្យមានការចាប់អារម្មណ៍ពីសហគមន៍អន្តរជាតិជាពិសេសសហភាពផ្ទាល់តែម្តង។ ជាមួយគ្នានេះ លោកកឹម សុខា ក៏បានលើកឡើងពីការគាបសង្កត់របស់គណបក្សកាន់អំណាចមកលើគណបក្សប្រឆាំង តំណាងអង្គការសង្គមស៊ីវិល មន្ត្រីគ.ជ.ប និងការរំលោភបំពានអភ័យឯកសិទ្ធិអ្នកតំណាងរាស្រ្តជាដើម។
បើលោកយឹម សុវណ្ណដដែល លោករដ្ឋមន្ត្រីអាល្លឺម៉ង់ បានលើកឡើងថា អាល្លឺម៉ង់ក៏ដូចជាសហភាពអឺរ៉ុប គឺមានការព្រួយបារម្ភយ៉ាងខ្លាំងចំពោះវិបត្តិនយោបាយនៅក្នុងប្រទេសកម្ពុជាបច្ចុប្បន្ន។ លោកបន្តថា ស្ថានទូតអាល្លឺម៉ង់ប្រចាំនៅក្នុងទីក្រុងភ្នំពេញ នឹងតាមដានស្ថានការនៅក្នុងប្រទេសកម្ពុជាបន្តទៀត។ លោក Gerd Moller ក៏បានគូសបញ្ជាក់ផងដែរថា លោកនឹងនាំយកនូវអ្វីដែលលោកបានឃើញ និងទទួលព័ត៌មានពីគណបក្សកាន់អំណាច និងគណបក្សប្រឆាំង ទៅជម្រាបជូនប្រទេសទាំង២៨ ដែលសមាជិកនៃសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ