លោកសម រង្ស៊ី ប្រាប់អឺរ៉ុបឲ្យបិទទីផ្សារនាំចេញសម្លៀកបំពាក់ ហើយបើកវិញជាមួយលក្ខខណ្ឌ
លោក សម រង្ស៊ី ប្រធានគណបក្សសង្រ្គោះជាតិ បានលើកឡើងថាបើសហភាពអឺរ៉ុបបិទទីផ្សារនាំចេញសម្លៀកបំពាក់ពីកម្ពុជា គឺនៅពេលបើកទីផ្សារវិញ ត្រូវមានភ្ជាប់ជាមួយនឹងលក្ខខណ្ឌ។ ជាការលើកឡើងក្នុងសភាអឺរ៉ុប កាលពីថ្ងៃទី១៣ ខែកក្កដា កន្លងទៅ។ ចំណែកភាគីរដ្ឋាភិបាលថាលោក សម រង្ស៊ី មិនដែលលើកឡើងពីចំណុចល្អរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:០៦
ប្រធានគណបក្សសង្រ្គោះជាតិ ថាបើសហភាពអឺរ៉ុបលូកដៃក្នុងរឿងនាំចេញសម្លៀកបំពាក់នេះ គឺមិនមែនកម្មករ ឬប្រជាជនតូចតាចទេដែលប៉ះពាល់ គឺពួកថៅកែធំៗ មេឈ្មួញធំៗទៅវិញទេ ដែលប៉ះពាល់។ លោកបន្តថាឈ្មួញធំៗ ទាំងអស់នោះហើយដែលសូកលុយមួយចំណែកធំទៅឲ្យគណបក្សកាន់អំណាច។
លោក សម រង្ស៊ី បញ្ជាក់បន្តថា ហេតុដូចរៀបរាប់ខាងលើនេះ បើសហភាពអឺរ៉ុបបិទទីផ្សារនាំចេញសម្លៀកបំពាក់ពីកម្ពុជា គឺនៅពេលបើកទីផ្សារវិញ មិនចេះតែបើកទេ គឺត្រូវមានភ្ជាប់ជាមួយលក្ខខណ្ឌផងដែរ។ បើសភាពអឺរ៉ុប ធ្វើដូច្នេះ រដ្ឋាភិបាលកម្ពុជា ប្រហែលជាចាប់ផ្តើមពីចារណាឡើងវិញ។
ការបញ្ជាក់របស់លោកសម រង្ស៊ី ធ្វើឡើងតាមរយៈបទអន្តរាគមន៍របស់លោក ជាភាសាបារាំង នៅសភាអឺរ៉ុប កាលពីថ្ងៃទី១៣ ខែកក្កដា កន្លងទៅនេះ។ បទអន្តរាគមន៍នេះត្រូវបានដាក់ផ្សាយក្នុងបណ្តាញសង្គមរបស់លោកកាលពីថ្ងៃទី១៦ ខែកក្កដា។
ចំណែកលោកផៃ ស៊ីផានលើកឡើងថា លោកសម រង្ស៊ី មិនដែលនិយាយល្អពីកម្ពុជា មិនដែលឲ្យតម្លៃលើកម្មករ។ អ្នកនាំពាក្យរាជរដ្ឋាភិបាលរូបនេះចាត់ទុកថា វាគឺជារឿងគួរឲ្យសោកស្តាយ ហើយការអំពាវនាវឲ្យបិទផ្សាររបស់អឺរ៉ុបនេះ គឺជាការកាត់ផ្តាច់ឆ្នាំងបាយខ្មែរ។
លោកគង់ អាទិត្យ អនុប្រធានសហជីពប្រជាធិបតេយ្យកម្មករកាត់ដេរកម្ពុជា ថាការលើកឡើងរបស់លោកសម រង្ស៊ី ឲ្យទីផ្សារអឺរ៉ុបមិនទទួលយកផលិតផលសម្លៀកបំពាក់ពីកម្ពុជា អាចធ្វើឲ្យប៉ះពាល់ដលកម្មករ ដែលធ្វើការក្នុងវិស័យនេះ។
ផ្ទុយទៅវិញ លោក ជា មុន្នី ជាទីប្រឹក្សាសហជីពសេរីកម្មករនៃព្រះរាជាណាចក្រកម្ពុជា បានថ្លែងថា លោកសម រង្ស៊ីយល់ច្បាស់ពីសេដ្ឋកិច្ច ហើយលោកចាត់ទុកថាការលើកឡើងរបស់លោកសម រង្ស៊ី គឺជាសញ្ញាណដ៏ល្អ និងមិនប៉ះពាល់ដល់ឧស្សាហកម្មកម្ពុជាទេ។
បើតាមរបាយការណ៍របស់សហភាពអឺរ៉ុបស្តីពីពាណិជ្ជកម្មសភាពអឺរ៉ុបកម្ពុជាបានឲ្យដឹងថា កម្ពុជាអឺរ៉ុប ផ្លាស់ប្តូរពាណិជ្ជកម្មជាមួយគ្នាក្នុងរង្វង់ទឹកប្រាក់ប្រមាណ៤,៥៥១លានអឺរ៉ូ ឬ៥ពាន់លានដុល្លារអាមេរិក កាលពីឆ្នាំ២០១៥កន្លងទៅ ក្នុងនោះសម្លៀកបំពាក់ដែលកម្ពុជានាំចេញមានទំហំជាទឹកប្រាក់ប្រមាណ២,៩៦២លានអឺរ៉ូ ឬ៣.២ពាន់លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ