កម្មករនិយោជិតនឹងទទួលបានសេវាថែទាំសុខភាពចាប់ពីខែឧសភានេះតទៅ
របបសន្តិសុខសង្គមផ្នែកថែទាំសុខភាពរបស់កម្មករនិយោជិត នឹងត្រូវអនុវត្តចាប់ពីខែឧសភានេះតទៅ។ ការអនុវត្តរបបសន្តិសុខជំហានដំបូងនេះ គឺដើម្បីចូលរួមកាត់បន្ថយការចំណាយរបស់កម្មករនិយោជិតលើការថែទាំងសុខភាព។ ការអនុវត្តរបបសន្តិសុខសង្គមផ្នែកថែទាំសុខភាព ធ្វើឡើងក្រោយពីរបបសន្តិសុខសង្គមផ្នែកហានិភ័យការងារបានដាក់ឲ្យអនុវត្តកាលពីឆ្នាំ២០០៨។
ចុះផ្សាយនៅថ្ងៃ៖
ស្តាប់ - ០១:៥២
របបសន្តិសុខសង្គមផ្នែកថែទាំសុខភាពសម្រាប់ជនទាំងឡាយ ដែលស្ថិតនៅក្រោមបទបញ្ញត្តិនៃច្បាប់ស្តីពីការងារ ត្រូវបានផ្តើមអនុវត្តចាប់តាំងពីថ្ងៃទី០១ ខែឧសភា ឆ្នាំ២០១៦នេះតទៅ។ លោក ជាវ ប៊ុនរិទ្ធ អ្នកនាំពាក្យបេឡាជាតិរបបសន្តិសុខសង្គម (ប.ស.ស) បានបញ្ជាក់ប្រាប់វិទ្យុបារាំងអន្តរជាតិថាកម្មករនិយោជិតនឹងទទួលបានការត្រួតពិនិត្យសុខភាពដោយឥតគិតថ្លៃនៅតាមមន្ទីរពេទ្យរដ្ឋ និងឯកជន ដែលមានកិច្ចព្រមព្រៀងជាមួយនឹង ប.ស.ស។
លោកបានបញ្ជាក់ទៀតថា ការអនុវត្តរបបសន្តិសុខសង្គមផ្នែកថែទាំសុខភាព នឹងធ្វើឡើងនៅក្នុងខេត្តនិងរាជធានីមួយចំនួន ដូចជាខេត្តកំពង់ស្ពឺ កណ្តាល និងរាជធានីភ្នំពេញ ក្នុងនោះមានកម្មករនិយោជិតប្រមាណ៣៦ម៉ឺននាក់។ លោកបន្ថែមថាការអនុវត្តរបបសន្តិសុខសង្គមផ្នែកថែទាំសុខភាពនេះមិនមានបញ្ហាប្រឈមអ្វីច្រើននោះទេ ប៉ុន្តែទាមទារឲ្យមានការស្រុះស្រួលគ្នា ដូចជាការបង់វិភាគទានពីនិយោជក និងកម្មករនិយោជិតនៃរោងចក្រនីមួយៗ។
ដើម្បីទទូលបានសេវាព្យាបាល និងថែទាំវេជ្ជសាស្ត្រ កម្មករនិយោជិតទាំងអស់ត្រូវបំពេញលក្ខខណ្ឌមួយចំនួនដូចជា កំពុងបំពេញការងារក្នុងសហគ្រាស គ្រឹះស្ថានដែលបានចុះបញ្ជិកាក្នុងបេឡាជាតិរបបសន្តិសុខសង្គម សម្រាប់របបថែទាំសុខភាព។ ត្រូវចុះបញ្ជិកានៅក្នុងបេឡាជាតិរបបសន្តិសុខសង្គម និងបង់វិភាគទានយ៉ាងតិច ០៦ខែ ក្នុងអំឡុងពេល១២ ខែចុងក្រោយ គិតរហូតមកទល់ខែដែលមានបញ្ហាសុខភាព។ នេះបើតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ។
លោកប៉ាវ ស៊ីណា ប្រធានសហភាពចលនាកម្មករកម្ពុជា (CCW) បានបញ្ជាក់ប្រាប់វិទ្យុបារាំងអន្តរជាតិថា ការផ្តល់របបថែទាំសុខភាពដល់កម្មករ គឺមានលក្ខណៈល្អប្រសើរច្រើន ដោយសារកម្មករមិនបាច់ចំណាយច្រើនលើថ្លៃសេវាសុខភាពទេ គឺពួកគាត់គ្រាន់តែបង់វិភាគទានតិចតួចប៉ុណ្ណោះ។ លោកបន្ថែមថាកន្លងមកបេឡាជាតិរបបសន្តិសុខសង្គម គឺសំដៅតែលើគ្រោះថ្នាក់ការងារទេ ប៉ុន្តែពេលនេះគឺសេវាថែទាំសុខភាព នៅពេលដែលពួកគាត់ឈឺថ្កាត់ក៏ត្រូវបានអនុវត្តដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ