អាជីវកម្មខ្សាច់មិនទាន់ត្រូវបានលាតត្រដាង
ក្រោយការស្នើសុំបំភ្លឺរបស់សង្គមស៊ីវិលជិត ៥០ស្ថាប័ន ក្រសួងរ៉ែកាលពីថ្ងៃទី២ ម្សិលមិញ បានឆ្លើយតបទៅកាន់សង្គមស៊ីវិលវិញថា ក្រសួងកំពុងតែសិក្សាស្រាវជ្រាវពីភាពខុសគ្នារបស់រដ្ឋាភិបាលកម្ពុជា និងអង្គការសហប្រជាជាតិស្តីពីពាណិជ្ជកម្ម។ ទន្ទឹមនឹងនោះ សង្គមស៊ីវិលស្នើឱ្យរដ្ឋាភិបាលត្រូវលាតត្រដាងពីពាណិជ្ជកម្មខ្សាច់ក្រៅប្រទេស ដែលជាចំណូលប្រាក់រាប់លានដុល្លារនេះ។
ចុះផ្សាយនៅថ្ងៃ៖
ស្តាប់ - ០២:០២
សង្គមស៊ីវិលនៅមិនទាន់ពេញចិត្តចំពោះការឆ្លើយបំភ្លឺរបស់ក្រសួងរ៉ែ និងថាមពលនោះទេ ស្តីពីការនាំខ្សាច់ចេញនោះ។ ជាការមិនពេញចិត្ត បន្ទាប់ពីក្រសួងរ៉ែមិនទាន់ផ្តល់ និងលាតត្រដាងពីចម្ងល់ដ៏ធំមួយស្តីពីការនាំខ្សាច់ចេញពីទៅកាន់ប្រទេសសិង្ហបុរី និងចំណូល ដែលសង្គមស៊ីវិលសង្ស័យថាមានរាប់លានដុល្លារអាមេរិក ដែលត្រូវបានលាក់បាំង។
តំណាងឱ្យក្រុមសង្គមស៊ីវិលជិត ៥០ស្ថាប័ន លោក សន ជ័យ ប្រធានសម្ព័ន្ធគណនេយ្យភាពសង្គមកម្ពុជា បានអះអាងថា ចម្លើយរបស់រដ្ឋាភិបាល គឺគ្រាន់តែជាព័ត៌មានបឋមហើយនៅមិនទាន់ឆ្លើយពីចំនួនប្រទេស ដែលកម្ពុជានាំខ្សាច់ចេញ និងទំហំនៃការនាំខ្សាច់ចេញនៅឡើយ។ លោក សន ជ័យ បន្ថែមថា ព័ត៌មានដែលមិនទាន់ច្បាស់លាស់ និងត្រូវបានលាតត្រដាងនេះ គឺជាការព្រួយបារម្ភ ព្រោះថាអាជីវកម្មនេះបានប៉ះពាល់យ៉ាងខ្លាំងទៅដល់ប្រជាពលរដ្ឋក្នុងសហគមន៍ដូចជារលំផ្ទះ បាក់ច្រាំង និងផលប៉ះពាល់ជាច្រើន។
ទន្ទឹមនឹងនេះ សង្គមស៊ីវិលក៏បានស្នើឱ្យក្រសួងពាក់ព័ន្ធត្រូវវាយតម្លៃចំពោះហេតុផលប៉ះពាល់បរិស្ថានស្តីពីការបូមខ្សាច់នេះ។ សម្រាប់ក្រុមសង្គមស៊ីវិល ប្រសិនបើផលប៉ះពាល់នៃការយកខ្សាច់នេះ មានផលធៀបស្មើនឹងចំណូលរដ្ឋាភិបាលកម្ពុជាត្រូវបញ្ឈប់ការយកខ្សាច់នេះ ព្រោះថាផលប៉ះពាល់ ដែលលេចចេញពីពាណិជ្ជកម្មនេះនឹងប៉ះពាល់ទៅដល់ប្រជាពលរដ្ឋក្រីក្រដែលងាយរងគ្រោះមុនគេ។ ក្រសួងរ៉ែ បានអះអាងថាអាជីវកម្មខ្សាច់ទាំងអស់សុទ្ធតែមានអាជ្ញាបណ្ណ ហើយរាល់ការបូមខ្សាច់ទាំងអស់ត្រូវបានវាយតម្លៃយ៉ាងដិតដល់។
តាមរយៈលិខិតបីទំព័ររបស់ខ្លួន ក្រសួងរ៉ែកំពុងសិក្សាលើភាពខុសគ្នាខ្លាំងជ្រុលរវាងតួលេខអង្គការសហប្រជាជាតិ និងរដ្ឋាភិបាលកម្ពុជា។ ចំពោះភាពមិនប្រក្រតីនេះ ក្រសួងរ៉ែ និងថាមពល បានស្នើឱ្យសង្គមស៊ីវិលផ្តល់ទិន្នន័យពាក់ព័ន្ធសំខាន់ៗស្តីពីអាជីវកម្មខ្សាច់។ ក្រៅពីនេះ រដ្ឋាភិបាលក៏បានស្នើឱ្យសង្គមស៊ីវិលផ្តល់ព័ត៌មានអំពីភាពមិនប្រក្រតីរបស់ក្រុមហ៊ុន ដែលកំពុងធ្វើអាជីវកម្ម ហើយ ដើម្បីបង្ហាញពីតម្លាភាពក្រសួងរ៉ែបានអនុញ្ញាតឱ្យក្រុងសង្គមស៊ីវិលអាចពិនិត្យឯកសារអាជីវកម្មខ្សាច់របស់ក្រសួងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ