បុណ្យសមុទ្រធ្វើនៅកោះកុង ចាប់ផ្តើមនៅថ្ងៃនេះ
នៅថ្ងៃសុក្រ ទី១២ ធ្នូនេះ ពិធីបុណ្យសមុទ្រលើកទី៣ ក្រោមប្រធានបទ “ អេកូទេសចរណ៍តំបន់ឆ្នេរ-ការអភិវឌ្ឈបៃតង” បានចាប់ផ្តើមហើយនៅក្នុងខេត្តកោះកុង។ ជាមួយគ្នានេះប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន ក៏បានចេញសារលិខិតអបអរសាទរពិធីបុណ្យសមុទ្រលើកទី៣នេះនៅថ្ងៃនេះផងដែរ។
ចុះផ្សាយនៅថ្ងៃ៖
ស្តាប់ - ០២:០៨
ដូចការគ្រោងទុក ពិធីបុណ្យសមុទ្រលើកទី៣ ត្រូវបានប្រារព្ធធ្វើឡើងហើយនៅថ្ងៃសុក្រ ទី១២ ធ្នូនេះនៅក្នុងខេត្តកោះកុង ។ ពិធីបុណ្យដ៏ទាក់ទាញនេះ មានរយៈពេលបីថ្ងៃ ដោយចាប់ផ្តើមពីថ្ងៃទី១២ ធ្នូ និងបញ្ចប់នៅថ្ងៃទី១៤ ធ្នូខាងមុខ។
លោកថោង ខុន រដ្ឋមន្ត្រីក្រសួងទេសចរណ៍ បានថ្លែងប្រាប់វិទ្យុបារាំងអន្តរជាតិថា នៅក្នុងរយៈពេលបីថ្ងៃនៃពិធីបុណ្យសមុទ្រនេះ គណៈកម្មការរៀបចំពិធីបុណ្យបានរៀបចំបង្ហាញនូវទស្សនីយភាព និង ការកម្សាន្តផ្សេងៗទៀតសម្រាប់ភ្ញៀវទេសចរជាតិ និងអន្តរជាតិដែលបានចូលរួម។ ក្នុងនោះរួមមានដូចជា ការៀបចំប្រកួតកីឡាចំនួន១៥ ប្រភេទ ពិព័រណ៍ពាណិជ្ជកម្ម មហោស្រពម្ហូបអាហារចម្រុះជាតិសាសន៍ និង ការបង្ហាញផ្ទាំងទស្សនីយភាពអំពីប្រវត្តិខេត្តកោះកុងជាដើម។ បើតាមលោកថោង ខុន អាជ្ញាធរក៏បានរឹតបន្តឹងសន្តិសុខ សណ្តាប់ ដើម្បីធានាសុវត្ថិភាពជូនភ្ញៀវទេសចរណ៍ផងដែរ។
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន នៅថ្ងៃសុក្រ ទី១២ធ្នូនេះ បានចេញសារលិខិតមួយសម្តែងការអបអរសាទរពិធីបុណ្យសមុទ្រលើកទី៣ ឆ្នាំ២០១៤នេះ។ ក្នុងសារលិខិតនោះ លោកហ៊ុន សែន បានអំពាវនាវដល់ក្រសួង ស្ថាប័នពាក់ព័ន្ធ អាជ្ញាធរ និងប្រជាពលរដ្ឋទាំងអស់ចូលរួមឲ្យបានផុសផុលប្រកបដោយស្មារតីទទួលខុសត្រូវខ្ពស់ ក្នុងការអភិវឌ្ឈតំបន់ឆ្នេរសមុទ្រកម្ពុជាឲ្យកាន់តែស្រស់ស្អាត។ ជាមួយគ្នានេះ លោកនាយករដ្ឋមន្ត្រី សង្ឃឹមយ៉ាងមុតមាំថា ការប្រារព្ធពិធីសមុទ្រជារៀងរាល់ឆ្នាំនេះ នឹងក្លាយជាការលើកកម្ពស់នូវស្មារតីសាមគ្គីភាព មិត្តភាព និងកិច្ចសហប្រតិបត្តិការលើគ្រប់ផ្នែក ដើម្បីគោលដៅរួមក្លាយជាកាលានុវត្តភាពដ៏ប្រសើរថ្មីមួយសម្រាប់កម្ពុជា ក្នុងការធ្វើឲ្យឆ្នេរសមុទ្រកម្ពុជាក្លាយជាគោលដៅទេសចរណ៍ដ៏ទាក់ទាញ។
សូមបញ្ជាក់ថា នេះ គឺជាលើកទីបីហើយដែលរដ្ឋាភិបាលកម្ពុជា បានរៀបចំប្រារព្ធពិធីបុណ្យសមុទ្រនេះឡើង។ កាលពីឆ្នាំ២០១២ រដ្ឋាភិបាលកម្ពុជាបានប្រារព្ធពិធីនេះនៅក្នុងខេត្តព្រះសីហនុ ហើយចំណែកនៅក្នុងឆ្នាំ២០១៣ បានរៀបចំធ្វើឡើងនៅក្នុងខេត្តកែប។
លោកថោង ខុន បានរំពឹងថា ការរៀបចំពិធីបុណ្យសមុទ្រនៅក្នុងខេត្តកោះកុងនេះ នឹងទទួលភ្ញៀវទេសចរច្រើនជាងខេត្តពីរផ្សេងទៀត ព្រោះថា ខេត្តកោះកុងជាប់នឹងប្រទេសថៃដែលសង្ឃឹមថា ភ្ញៀវទេសចរណ៍ថៃ១ម៉ឺននាក់ នឹងឆ្លងដែនមកទស្សនាបុណ្យសមុទ្រនេះ។ យ៉ាងណាក៏ដោយ លោកថោង ខុន បានបញ្ជាក់ថា ពិធីបុណ្យសមុទ្រលើកទី៤ ឆ្នាំ២០១៥ នឹងត្រូវរៀបចំធ្វើឡើងនៅក្នុងខេត្តកំពត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ