ប្រតិបត្តិករបង្កើនការប្រុងប្រយ័ត្នខណៈរដ្ឋាភិបាលដាក់កំហិតឲ្យអ្នកទិញស៊ីមកាតត្រូវមានអត្តសញ្ញាណប័ណ្ណ
ក្រសួងប្រៃសនីយ៍ និងទូរគមនាគមន៍រួមទាំងប៉ូលិសជាតិ បានកំហិតឲ្យអ្នករកស៊ីក្រុមហ៊ុនទូរស័ព្ទទាំងអស់នៅក្នុងប្រទេសកម្ពុជាត្រូវតែជូនដំណឹងទៅអតិថិជនរបស់ខ្លួនដើម្បីឲ្យពួកគេបំពេញឯកសារអត្តសញ្ញាណប័ណ្ណត្រឹមត្រូវក្នុងរយៈពេល៣ខែ បើពុំនោះទេនឹងប្រឈមការលុបលេខចោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ប្រតិបត្តិករក្រុមហ៊ុនទូរស័ព្ទនានានៅក្នុងប្រទេសកម្ពុជា បានចាប់ផ្តើម ជូនដំណឹងដល់អតិថិជនរបស់ខ្លួនក្នុងការទិញស៊ីមកាតយកទៅប្រើប្រាស់ចាំបាច់ត្រូវភ្ជាប់មកជាមួយនូវ ឯកសារច្បាស់លាស់ ពោលគឺត្រូវតែមានអត្តសញ្ញាណប័ណ្ណ ទើបអាចទិញលេខយកទៅប្រើបាន។
បុគ្គលិកមួយរូបបំរើការងារនៅក្រុមហ៊ុនទូរស័ព្ទម៉ូប៊ីតែលដែលជាក្រុមហ៊ុនទូរស័ព្ទចល័តធំជាងគេ សុំមិនបញ្ចេញឈ្មោះ បានបញ្ជាក់ឲ្យដឹងថា បន្ទាប់ពីក្រសួងបានប្រកាសកាលពីម្សិលមិញ ពីការទាមទារឲ្យមានឯកសារត្រឹមត្រូវក្នុងការទិញស៊ីមកាតយកទៅប្រើនោះ ក្រុមហ៊ុនបានបង្កើនការប្រុងប្រយ័ត្នបន្ថែមទៀត ក្នុងការផ្សព្វផ្សាយទៅអតិថិជនរបស់ខ្លួនឲ្យគោរពគោលការណ៍នេះ។
ការលើកឡើងដូច្នេះបន្ទាប់ពីក្រសួងប្រៃសនីយ៍ និងប៉ូលីសជាតិ បានធ្វើការរឹតបន្តឹងលើការប្រើប្រាស់ស៊ីមកាតទូរស័ព្ទ សំដៅរឹតបន្តឹងសន្តិសុខ ដោយកន្លងមកបញ្ហាភេរវកម្មដែលបានកើតឡើងមួយចំនួននៅប្រទេសកម្ពុជាត្រូវគេបង្ហាញថាបានជាប់ទាក់ទងទៅនឹងការប្រើប្រាស់ទូរស័ព្ទដៃ។
កាលពីថ្ងៃរសៀលថ្ងៃអង្គារម្សិលមិញក្រសួងប្រៃសនីយ៍និងទូរគមនាគមន៍ និងអគ្គស្នងការនគរបាលជាតិ បានប្រកាសតាមរយៈសន្និសីទកាសែតរួមគ្នាថា រដ្ឋាភិបាលនឹងកាត់ផ្តាច់លេខទូរស័ព្ទចំពោះអ្នកដែលទិញស៊ីមកាតដែលមិនបានផ្តល់ឯកសារអត្តសញ្ញាណប័ណ្ណ។
លោកឧត្តមសេនីយ៍ ឆៃ ស៊ីណារិទ្ធិ អគ្គស្នងការរងប៉ូលីសជាតិ បានថ្លែងបញ្ជាក់ថានៅក្នុងប្រទេសកម្ពុជាមានស៊ីមកាតចំនួន២០លានដែលកំពុងត្រូវបានប្រើប្រាស់ ក្នុងនោះ៧០ភាគរយបានទិញដោយមិនមានភា្ជប់អត្តសញ្ញាណប័ណ្ណជាប់ជាមួយ។ ហើយបើគិតពីចំនួនអ្នកប្រើប្រាស់វិញគឺមានមនុស្សរហូតដល់១៤លាននាក់ ប្រឈមនឹងការបាត់បង់លេខទូរស័ព្ទរបស់ខ្លួន ប្រសិនបើពួកគេមិនទៅចុះបញ្ជីដោយមានអត្តសញ្ញាណប័ណ្ណ។
ជាមួយគ្នានេះ រដ្ឋាភិបាលតាមរយៈក្រសួងប្រៃសណីយ៍និងអគ្គស្នងការប៉ូលីសជាតិ ក៏បានប្រាប់ប្រតិបត្តិករទូរគមនាគមន៍ផងដែរ ត្រូវតែប្រាប់អតិថិជនក្នុងនោះក៏មានជនបរទេសផង ឲ្យផ្តល់ឯកសារអត្តសញ្ញាណប័ណ្ណពេញលេញ ក្នុងរយៈពេល៣ខែ បើពុំនោះទេលេខទូរស័ព្ទរបស់គេនឹងត្រូវលុបចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ