ក្រសួងមហាផ្ទៃមិនទាន់កំណត់ពីជំនួបរវាងលោក ស ខេង និងសង្គមស៊ីវិលពីបន្ទប់ស្ថានការណ៍
មកទល់នឹងពេលនេះ ក្រសួងមហាផ្ទៃនៅតែមិនទាន់បានឆ្លើយតប នឹងសំណើដែលក្រុមអង្គការសង្គមស៊ីវិលនៃបន្ទប់ស្ថានការណ៍បានដាក់ សុំឲ្យមានការជួបពិភាក្សា តាំងពីថ្ងៃទី១៨ កក្កដាមកម្ល៉េះ។ ការដាក់លិខិតស្នើសុំនេះ ត្រូវបានធ្វើឡើងបន្ទាប់ពី បន្ទប់ស្ថានការណ៍ ត្រូវបានបង្គាប់ឲ្យបញ្ឈប់សកម្មភាព ដោយលោករដ្ឋមន្ត្រីក្រសួងមហាផ្ទៃ ស ខេង កាលពីដើមខែកក្កដា។ យ៉ាងណាមិញ អ្នកនាំពាក្យរបស់ក្រសួងមហាផ្ទៃថា ក្រសួងកំពុងតែធ្វើការលើរឿងនេះ។ អត្ថបទដោយ៖ ប៊ុន សៅសុភនាថ និង ហេង ពុធីរៈ
ចុះផ្សាយនៅថ្ងៃ៖
ស្តាប់ - ០១:៥៤
លោក សំ គន្ធាមី នាយកប្រតិបត្តិអង្គការនិកហ្វិច និងជាអតីតសមាជិកនៃបន្ទប់ស្ថានការណ៍ បានប្រាប់វិទ្យុបារាំង នៅព្រឹកថ្ងៃទី៧សីហាថា មកទល់ពេលនេះ ខាងតំណាងក្រសួងមហាផ្ទៃ ពុំមានការផ្តល់ដំណឹងឆ្លើយតបថា មានជំនួប ឬមិនមាននោះទេ។ លោកបានបន្ថែមថា ទោះបីជាបន្ទប់ស្ថានការណ៏បិទមិនឲ្យដំណើរក៏ដោយ ក៏លោកនឹងតែអាចចូលរួមដំណើរការបោះឆ្នោតថ្នាក់ជាតិ ដែលនឹងប្រព្រឹត្តទៅនៅក្នុងឆ្នាំ ២០១៨ ខាងមុខនេះ និងអាចធ្វើសេចក្តីថ្លែងការណ៍ជារួមបានដដែល។
កាលពីថ្ងៃទី១៨ កក្កដា ក្រុមការងារអង្គការសង្គមស៊ីវិលជាង ២០ស្ថាប័ន តំណាងដោយគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (Comfrel) និងគណៈកម្មាធិការអព្យាក្រឹត្យ យុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (Nicfec) បានផ្ញើលិខិតជូន លោក ស ខេង ដើម្បីស្នើសុំជួបពិភាក្សាអំពីសិទ្ធិស្របច្បាប់ ដែលជាការចូលរួមរបស់ក្រុមសង្គមស៊ីវិលក្នុងសកម្មភាពសង្កេតការណ៍បោះឆ្នោត។
ជុំវិញបញ្ហានេះ លោកខៀវ សុភ័គ អ្នកនាំពាក្យក្រសួងមហាផ្ទៃ បានឲ្យដឹងថា ក្រសួងកំពុងរៀបចំចេញលិខិតឆ្លើយតបជាផ្លូវការមួយ នៅពេលឆាប់ៗនេះ ប៉ុន្តែលោកមិនទាន់អាចបញ្ជាក់ ពីពេលវេលាច្បាស់លាស់នៃការចេញលិខិតឆ្លើយតបពីជំនួប លោក ស ខេង ជាមួយ អង្គការក្រៅរដ្ឋាភិបាល បាននៅឡើយទេ។
គួររំលឹកថា ការប្រកាសបញ្ឈប់សកម្មភាពរបស់បន្ទប់ស្ថានការណ៍នេះ បានកើតឡើងបន្ទាប់ពី លោកនាយករដ្ឋមន្ត្រី ហ៊ុន សែន បានបញ្ជាឲ្យ លោកស ខេង ពិនិត្យមើលផ្លូវច្បាប់ចំពោះបន្ទប់ស្ថានការណ៍ ព្រោះលោកនាយករដ្ឋមន្ត្រី បានចាត់ទុកថា បន្ទប់ស្ថានការណ៍មាននិន្នាការគាំទ្របក្សប្រឆាំង ក្រោយបានវាយតម្លៃថា ការបោះឆ្នោតឃុំ-សង្កាត់អាណត្តិទី៤ នៅមិនទាន់មានភាពសេរី និងត្រឹមត្រូវពេញលេញនៅឡើយទេ។
សូមជំរាបថា បន្ទប់ស្ថានការណ៍ត្រូវបានបង្កើតឡើងចាប់តាំងពីឆ្នាំ ២០១៣ ហើយរហូតមកដល់ការបោះឆ្នោតឃុំ-សង្កាត់ ឆ្នាំ ២០១៧ទៀត ក៏ប៉ុន្តែបណ្តុំអង្គការជាង៣០នេះ ធ្វើសកម្មភាពតែក្នុងអំឡុងពេលមានការបោះឆ្នោតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ