មេធាវីដើរចេញពីសវនាការ ព្រោះគ្មានវត្តមានលោកកឹម សុខាចូលរួម
នៅព្រឹកនេះក្រុមមេធាវីការពារក្តីឲ្យលោកកឹម សុខា ទាំង៨នាក់បានសម្រេចដើរចេញពីសភាស៊ើបសួរនៃសាលាឧទ្ធរណ៍ ដោយសារតែសវនាការមិនមានវត្តមានកូនក្តីរបស់ពួកគាត់ គឺលោកកឹម សុខា។ ទោះអវត្តមានមេធាវីក្តី តែសភាស៊ើបសួរនៃសាលាឧទ្ធរណ៍បានដំណើរការសវនាការរហូតដល់ចប់ និងតម្កល់ដីកាសម្រេចឃុំខ្លួនរបស់សាលាដំបូងរាជធានីភ្នំពេញ ទុកជាបានការដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
តំណាងមេធាវីបញ្ជាក់ ដោយលើកយកគោលការណ៍ច្បាប់ជាតិ និងអន្តរជាតិថា នៅក្នុងសវនាការត្រូវមានវត្តមានរបស់កូនក្តី ហើយម្យ៉ាងទៀត លោកកឹម សុខាប្រធានគណបក្សសង្រ្គោះជាតិជាតំណាងរាស្ត្រ ដែលមានអភ័យឯកសិទ្ធិ ដូច្នេះវត្តមានរបស់លោកគឺជារឿងចាំបាច់។
លោកទូច ថារិទ្ធិ អគ្គលេខាធិការរងនៃសាលាឧទ្ធរណ៍បានបញ្ជាក់ថា ការធ្វើពហិការបស់ក្រុមមេធាវីលោកកឹម សុខាមិនប៉ះពាល់ដល់ដំណើររបស់សវនាការទេ។ លោកបន្ថែមថាសភាស៊ើបសួរនៃសាលាឧទ្ធរណ៍បានបន្តនីតិវិធីរហូតដល់ចប់សវនាការ ហើយតម្កល់ដីកាសម្រេចឃុំខ្លួនរបស់សាលាដំបូងរាជធានីភ្នំពេញ ទុកជាបានការដដែល។
សវនាការនេះធ្វើឡើងតាមបណ្ដឹងរបស់ក្រុមមេធាវីប្តឹងប្រឆាំង នឹងដីកាសម្រេចឃុំខ្លួនបណ្តោះអាសន្នរបស់ចៅក្រមស៊ើបសួរសាលាដំបូងរាជធានីភ្នំពេញ។ លោកកឹម សុខា ត្រូវបានតំណាងអយ្យការអមសាលាដំបូងរាជធានីភ្នំពេញ សម្រេចចោទប្រកាន់ពីបទ “សន្ទិដ្ឋិភាពជាមួយបរទេស” ដែលជាបទល្មើសមួយក្នុងអំពើក្បត់ជាតិ តាមមាត្រា៤៤៣ នៃក្រមព្រហ្មទណ្ឌ។ ប្រធានគណបក្សប្រឆាំងរូបនេះ ត្រូវបានឃុំខ្លួនចាប់តាំងពីថ្ងៃទី៣ ខែកញ្ញាមក នៅក្នុងពន្ធនាគារត្រពាំងផ្លុង ស្ថិតនៅខេត្តត្បូងឃ្មុំ។
លោកសំ សុគង់ តំណាងក្រុមមេធាវី ដែលបានធ្វើពហិកាមិនចូលរួមក្នុងសវនាការនៅសាលាឧទ្ធរណ៍នាព្រឹកថ្ងៃទី២៦ ខែកញ្ញានេះ បានលើកឡើងពីមូល ដែលតុលាការមិនអនុញ្ញាតឲ្យលោកកឹម សុខា ចូលរួមថា ដោយសារតែនេះជារឿងហេតុមុនអង្គសេចក្តី ហើយម្យ៉ាងដោយសារតែព្រួយបារម្ភពីបញ្ហាសន្តិសុខនៅពេលដែលបញ្ជូនលោកកឹម សុខាមកសវនាការនៅរាជធានីភ្នំពេញ។
នៅបរិវេណខាងក្រៅសាលាឧទ្ធរណ៍សមត្ថកិច្ច និងកម្លាំងសន្តិសុខខណ្ឌពី២០០ទៅ៣០០នាក់ ត្រូវបានដាក់ពង្រាយជាមួយនឹងរណាំងបិទផ្លូវផងដែរ។ នៅក្បែរសួនច្បារទល់មុខអគាររដ្ឋសភាចាស់ឯណោះវិញ ក្រុមតំណាងរាស្ត្រគណបក្សប្រឆាំង ដែលដឹកនាំដោយលោកសុន ឆ័យបានឈររងចាំចូលរួមស្តាប់សវនាការក្នុងករណីបើមានវត្តមានរបស់លោកកឹម សុខាចូលរួម។
ចាប់តាំងពីថ្ងៃចាប់ខ្លួនលោកកឹម សុខា រហូតមកដល់ពេលនេះ ក្រុមតំណាងរាស្ត្ររបស់គណបក្សសង្រ្គោះជាតិមិនទាន់បានជួបលោកកឹម សុខានៅឡើយទេ។ លោកសុន ឆ័យ មន្ត្រីជាន់ខ្ពស់គណបក្សសង្រ្គោះជាតិបានថ្លែងថាគណបក្សបានដាក់ពាក្យស្នើសុំរាល់សប្តាហ៍ដើម្បីជួបលោកកឹម សុខា ហើយគណបក្សនឹងបន្តដាក់ទៀត ព្រោះគណបក្សយល់ថាមិនមានហេតុផលអ្វី ដែលមិនអាចជួបលោកកឹម សុខានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ