កម្ពុជាបំបែកកំណត់ត្រាប្រវត្តិសាស្រ្តឈ្នះសិង្ហបុរីជាលើកដំបូងក្នុងរយៈពេល៤៤ឆ្នាំមកនេះ
កាលពីយប់មិញនេះ ក្រុមបាល់ទាត់ជម្រើសជាតិ កម្ពុជាបានយកឈ្នះក្រុមបាល់ទាត់ជម្រើសជាតិសង្ហបុរីក្នុងលទ្ធផល ២ទល់នឹង១ នៅក្នុងការប្រកួតមិត្តភាពអន្តរជាតិនៅពហុកីឡាដ្ឋានជាតិអូឡាំពិក។ លទ្ធផលនេះ គឺជាជ័យជំនះដំបូងរបស់កម្ពុជាទៅលើសិង្ហបុរីនៅក្នុងរយៈពេល៤៤ឆ្នាំមកនេះ បើទោះបីវាកើតឡើងក្នុងន័យប្រកួតមិត្តភាពក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
គ្រាប់បាល់ពីរគ្រាប់របស់កម្ពុជា គឺរកបានដោយកីឡាករចាន់ វឌ្ឍនាកា និងទិត្យ ឌីណា នៅក្នុងតង់ទីមួយ។ កីឡាករឆ្នើមចាន់ វឌ្ឍនាកា មកពីក្លឹបបឹងកេតអង្គរ បានទម្លុះសំណាញ់ទីរបស់ក្រុមបាល់ទាត់ជម្រើសជាតិសិង្ហបុរីនៅនាទីទី១៩ តាមរយៈការទាត់បាល់ Free Kick ដ៏អស្ចារ្យចំកែង៩០ដឺក្រេ ដែលធ្វើឲ្យអ្នកចាំសិង្ហបុរី មិនអាចសង្គ្រោះបាល់ដ៏គ្រោះថ្នាក់នេះបាន។ ប៉ុន្តែ៤នាទីក្រោយមក កីឡាករប្រធានក្រុមសិង្ហបុរី Khairul Armi បានតែតបាល់រំលងផុតដៃអ្នកចាំទីដៃស្អិតកម្ពុជាស៊ូ យ៉ាទី បញ្ចូលទីតាមស្មើជាមួយក្រុមជម្រើសជាតិកម្ពុជាវិញ។
ទោះបីប្រដេញត្រសងគ្នាយ៉ាងណាក៏ដោយ ប៉ុន្តែកម្ពុជានៅតែបន្តនាំមុខក្រុមសិង្ហបុរីបាននៅក្នុងម៉ោងបន្ថែមត្រឹមតែ១នាទីនៅក្នុងតង់ទីមួយ។ គឺគ្រាប់បាល់នេះហើយដែលរកបានដោយកីឡាករទិត្យ ឌីណា មកពីក្លឹបអគ្គស្នងការនគរបាលជាតិ ដែលស៊ុតទម្លុះសំណាញ់ទី បន្ទាប់ពីទទួលបានបាល់បញ្ជូនយ៉ាងល្អពីកីឡាករចាន់ វឌ្ឍនាកា។ គ្រាប់បាល់ទីពីររបស់កម្ពុជានេះ បានធ្វើឲ្យគ្រូបង្វឹកក្រុមសិង្ហបុរីកើតទុក្ខមិនសុខចិត្ត ព្រោះលោកគិតថា ជាគ្រាប់បាល់កើតឡើងដោយកីឡាករកម្ពុជា Off-Side។ ក៏ប៉ុន្តែការតវ៉ានេះ មិនមានប្រយោជន៍អ្វីនោះទេ ព្រោះអាជ្ញាកណ្តាលដែលជនជាតិវៀតណាម នៅតែឲ្យគ្រាប់បាល់ដល់កម្ពុជាដដែល។ ចំណែកនៅក្នុងតង់ទីពីរវិញ គ្រាន់តែចាប់ផ្តើមភ្លាម ក្រុមសិង្ហបុរីបានវាយលុកគ្របដណ្តប់លើកម្ពុជាតែម្តង ដើម្បីតាមយកស្មើ។ ប៉ុន្តែការព្យាយាមនេះ មិនបានសម្រេចនោះទេ ពោលគឺនៅតែរក្សាលទ្ធលផលដដែល បើទោះបីខ្សែការពារម្នាក់របស់កម្ពុជាត្រូវអាជ្ញាកណ្តាលពិន័យកាតក្រហមបណ្តេញចេញនៅជិតបញ្ចប់តង់ទីពីរក្តី។
លទ្ធផលល្អ២ទល់នឹង១ របស់កម្ពុជានៅក្រោមសម្រែកហ៊ោរកញ្រ្ចៀវពីសំណាក់អ្នកគាំទ្រខ្មែរជាង៥ម៉ឺននាក់នៅក្នុងពហុកីឡាដ្ឋានជាតិអូឡាពិកនេះ គឺជាជ័យជំនះដំបូងរបស់កម្ពុជាទៅលើក្រុមខ្លាំងសិង្ហបុរីនៅក្នុងរយៈ៤៤ឆ្នាំមកនេះ។ កាលពីពេលកន្លងមក កម្ពុជា ធ្លាប់ជួបជាមួយសិង្ហបុរីចំនួន១៦លើក ប៉ុន្តែកម្ពុជាឈ្នះតែមួយលើកប៉ុណ្ណោះ នៅក្នុងឆ្នាំ១៩៧២ ក្នុងប្រទេសឥណ្ឌូនេស៊ី។ តាំងពីនោះមក កម្ពុជាមិនដែលឈ្នះក្រុមសិង្ហបុរីឡើយ។
ចប់ការប្រកួតមិត្តភាពអន្តរជាតិកម្ពុជា-សិង្ហបុរី កីឡាករឆ្នើមកម្ពុជាចាន់ វឌ្ឍនាកា ត្រូវបានជ្រើសរើសជាកីឡាករឆ្នើមឫ Man of The Match ជាមួយប្រាក់រង្វាន់១ពាន់ដុល្លារពីក្រុមហ៊ុនណាហ្គាវើល។ ជាមួយនេះ ប្រមុខរដ្ឋាភិបាលកម្ពុជាលោកនាយករដ្ឋមន្ត្រីហ៊ុន សែន ក៏បានផ្តល់ទឹកប្រាក់លើកទឹកចិត្តដល់ក្រុមកីឡាករ គ្រូបង្វឹក និងក្រុមមន្ត្រីកម្ពុជាដែលបានចូលរួមក្នុងការប្រកួតនេះក្នុងម្នាក់ៗ១ពាន់ដុល្លារផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ