ជួយកិច្ចការសង្គមល្អហើយ ប៉ុន្តែគួរប្រយ័ត្ន កុំឲ្យគេបោកប្រើ!
ចុះផ្សាយនៅថ្ងៃ៖
ស្តាប់ - ០៣:៥៣
នៅសង្គមខ្មែរបច្ចុប្បន្ន គេសង្កេតឃើញថា មានចលនាយុវជនកាន់តែច្រើនឡើងៗ ចាប់អារម្មណ៍ចូលចិត្ត និងចូលរួមប្រលូកក្នុងកិច្ចការសង្គម។ ដូចជាការងារស្មគ្រចិត្ត នៅក្នុងសកម្មភាពសង្គម ផ្នែកសប្បុរសធម៌ ផ្នែកបរិស្ថាន និងផ្នែកវប្បធម៌ជាដើម។ ក៏ប៉ុន្តែយុវជន ក៏ត្រូវចេះប្រុងប្រយ័ត្នដែរ ព្រោះថាមានក្រុមខ្លះ អាចនឹងបោកប្រាស់ចំពោះសុឆន្ទៈនិងការស្មគ្រចិត្តរបស់យុវជន ដើម្បីផលប្រយោជន៍អ្វីមួយ។
ការងារស្មគ្រចិត្ត និងកិច្ចការងារសង្គមជាទូទៅ ដែលយុវជនខ្មែរបានចូលរួម មិនថា សកម្មភាពផ្នែកវប្បធម៌ សប្បុរសធម៌ ឬផ្នែកបរិស្ថាន ឬក៏ផ្នែកសង្គមអ្វីនោះទេ គឺនឹងបានប្រយោជន៍ ជា ២ ចំណែកធំៗ។
ទី១ ដំបូងបំផុត គឺបានជាប្រយោជន៍ ទៅដល់សង្គមនោះ ផ្នែកណាមួយនោះ បើទោះបីមិនបានធំដុំច្រើនណាស់ណា ក៏បានចូលរួមចំណែកតិចតួចដែរ ជាផលប្រយោជន៍ដល់សង្គមនោះ ផ្នែកនោះ។ វាអាចធ្វើឲ្យរីកចម្រើនជាងមុន ឬក៏អាចធ្វើឲ្យប៉ះពាល់ផ្នែកនោះ ផងក៏បាន។
ទីពីរ ការងារស្មគ្រចិត្តនិងកិច្ចការងារសង្គម គឺនឹងបានជាប្រយោជន៍ទៅដល់យុវជននោះខ្លួនឯង។ ចំពោះចំទង់ខ្លួនឯង គឺនឹងអាចឲ្យយល់ និងស្គាល់ពីសង្គមបានកាន់តែច្រើន និងកាន់តែច្បាស់។ ពួកគេអាចនឹងឃើញទិដ្ឋភាពជាក់ស្តែងក្នុងមូលដ្ឋាន និងនៅក្នុងជីវិតរបស់ពួកគេ ដែលផ្ទុះស្រឡះពីមេរៀនក្នុងសាលា ឬខុសពីសាកលវិទ្យាល័យ ដែលពួកគេធ្លាប់បានរៀន ឬធ្លាប់ជួបប្រទះ។
ម្យ៉ាងទៀត គឺសកម្មភាពសង្គម នឹងជួយពង្រឹងបុគ្គលយុវជននោះផ្ទាល់ តាមរយៈជួយកសាងអភិវឌ្ឍបុគ្គលិកលក្ខណៈរបស់ពួកគេ។ ដ្បិតថា ការធ្វើកិច្ចការសង្គម គឺមានការលំបាកខ្លះ ដែលក្រុមយុវជនត្រូវប្រឈមមុខ និងត្រូវដោះស្រាយ។ តាមរយៈការបញ្ហាទាំងនោះហើយ គឺនឹងធ្វើឲ្យពួកគេកាន់តែមានភាពរឹងមាំ និងមានភាពឈ្លាសវៃក្នុងការដោះស្រាយបញ្ហា។
បន្ថែមពីនេះ តាមរយៈកិច្ចការសង្គម គឺអាចជួយយុវជនខ្លះ ឲ្យងាយស្រួលក្នុងការដាក់ពាក្យសុំអាហារូបករណ៍ទៅបន្តការសិក្សានៅប្រទេសក្រៅជាដើម។ ចូរកុំភ្លេចថា ការសុំអាហារូបករណ៍ទៅរៀននៅបរទេស ចំពោះប្រទេសមួយចំនួន នៅពេលខ្លះ គេទាមទារឲ្យមានបទពិសោធចូលរួមកិច្ចសង្គម និងការងារស្មគ្រចិត្ត ជាការចាំបាច់។
ប្រយោជន៍ច្រើនជាងនេះ គឺការងារស្មគ្រចិត្តក្នុងសង្គម គឺជួយឲ្យយុវជនមានមិត្តភក្តិច្រើន និងបង្កើតបណ្តាញទាក់ទងក៏ច្រើនផ្សេងទៀត ដែលតាមរយៈទំនាក់ទំនងនេះ គឺធ្វើឲ្យពួកគេរីកចំណេះដឹង និងទទួលបានឱកាសផ្សេងៗទៀត ដូចជាឱកាសចេញទៅចូលរួមកិច្ចប្រជុំ អន្តរជាតិ ឬដំណើរកម្សាន្តនៅបរទេសជាដើម ដោយឥតគិតថ្លៃ។ ហើយក៏តាមរយៈបណ្តាញទាក់ទងជាច្រើននេះហើយ គឺនឹងបង្កើតឱកាសការងារ និងឱកាសរកលុយកាក់ ក៏បានច្រើនដែរ។
ក៏ប៉ុន្តែទោះបីជាយ៉ាងណាក្តី យុវជនខ្លួនឯង ក៏ត្រូវតែចេះប្រុងប្រយ័ត្នផងដែរ ចំពោះការចូលរួមចលនាសង្គមរបស់ខ្លួននោះ។ ព្រោះដ្បិតថា មានក្រុមមនុស្សខ្លះ អាចនឹងឆ្លៀតកេញចំណេញពីចលនាសកម្មភាពទាំងនោះ។
ដូច្នេះ ដើម្បីកុំឲ្យខកចិត្តចំពោះការលះបង់របស់ខ្លួនក្នុងសកម្មភាពសង្គមដោយស្មគ្រចិត្តនិងដោយសុទ្ធចិត្តរបស់ខ្លួន ហើយទីបំផុត ត្រូវគេបោកប្រើ ឬក៏នាំឲ្យខាតបង់ពេលវេលានោះ យុវជន ត្រូវប្រយ័ត្ន និងគិតគូរ ៣ ចំណុច ៖
ទី១ ត្រូវឈ្វេងយល់ពីប្រវត្តិនៃចលនាសកម្មភាពនោះ ព្រមទាំងប្រវត្តិនៃមេក្រុមដឹកនាំកិច្ចការនោះ។ ស្រាវជ្រាវរកអ្វីដែលគេធ្លាប់ធ្វើកន្លងមក ហើយសាកសួរអ្នកធ្លាប់ចូលរួមសកម្មភាពពីមុនៗមក។
ទី២ ត្រូវពិចារណាមើលថា តើសកម្មភាពទាំងនោះ វាពិតជាអាចជួយសង្គមពិតប្រាកដមែនដែរឬទេ? ឬក៏សកម្មភាពទាំងនោះ គឺគ្រាន់តែជួយលើកមុខលើមាត់តែចំពោះក្រុមណាមួយ ឬបុគ្គលណាមួយ ដែលជាការកេងចំណេញប្រយោជន៍ផ្ទាល់របស់ពួកគេទេ?
ទី៣ សួរថា តើសកម្មភាពសង្គមទាំងនោះ ត្រូវនឹងទៅគោលដៅអនាគតរបស់យុវជនខ្លួនឯងដែរឬទេ?
ជាការពិត ការជួយអ្នកដទៃ ឬជួយសង្គម ដែលចេញចិត្តបរិសុទ្ធពិតប្រាកដ គឺគ្មានចង់បានអ្វីត្រឡប់មកវិញនោះទេ។ ប៉ុន្តែយុវជនត្រូវប្រយ័ត្ន ប្រយ័ត្នគេបោកប្រើចិត្តស្មោះរបស់ខ្លួន ក្នុងបំណងកេញចំណេញ ដើម្បីផលប្រយោជន៍អ្វីមួយ ឲ្យសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ