អ្នកគាំទ្របក្សកាន់អំណាចនិងអតីតបក្សប្រឆាំងហូបនំបញ្ចុកក្នុងថ្ងៃតែមួយ តែមិនមែនជាសញ្ញានៃការចរចានយោបាយ
ដូចការគ្រោងទុក អ្នកគាំទ្រគណបក្សកាន់អំណាចនិងអតីតគណបក្សប្រឆាំង បានជួបជុំគ្នាហូបនំបញ្ចុកដោយឡែកពីគ្នា នៅថ្ងៃអាទិត្យ ទី ០៩ មិថុនា នេះ នៅក្នុងក្របខណ្ឌទូទាំងប្រទេស។ នេះគឺជាព្រឹត្តិការណ៍ដ៏កម្រមួយ នៅក្នុងប្រទេសកម្ពុជា។ ភ្លាមៗនេះ ប្រមុខរដ្ឋាភិបាលកម្ពុជា លោក ហ៊ុន សែន បានចេញមកអរគុណដល់អ្នកគាំទ្ររបស់លោក ខណៈលោក សម រង្ស៊ី ដែលកំពុងស្ថិតនៅក្រៅប្រទេសវិញ បានអំពាវនាវឲ្យអ្នកគាំទ្ររបស់ខ្លួនបន្តសកម្មភាពហូបនំបញ្ចុកនេះ នៅថ្ងៃស្អែក និងថ្ងៃបន្តបន្ទាប់ទៀត។
ចុះផ្សាយនៅថ្ងៃ៖
ស្តាប់ - ០២:៤១
ប្រមុខរដ្ឋាភិបាលកម្ពុជា លោក ហ៊ុន សែន នៅព្រឹកថ្ងៃអាទិត្យនេះ បានចេញមកថ្លែងអំណរគុណដល់ជនរួមជាតិរបស់លោក ដែលបានរៀបចំហូបនំបញ្ចុករួមគ្នា ដោយមិនប្រកាន់ក្រុម ប្រកាន់ជំនឿសាសនា ឬប្រកាន់និន្នាការនយោបាយអ្វីឡើយ។ សម្រាប់លោកនាយករដ្ឋមន្ត្រី ហ៊ុន សែន ការហូបនំបញ្ចុកនៅថ្ងៃនេះ បានបង្ហាញពីមិត្តភាព សាមគ្គីភាព ការស្រឡាញ់រាប់អាន និងឯកភាពជាតិ កាន់តែរឹងមាំថែមទៀត។ តាមរយៈសំណេរនៅលើគណនីយហ្វេសបុករបស់ខ្លួននៅព្រឹកថ្ងៃអាទិត្យនេះ លោកនាយករដ្ឋមន្ត្រី ហ៊ុន សែន ក៏បានជូនពរឲ្យជនរួមជាតិរបស់លោក ជួបតែសេចក្តីសុខ និងសំណាងល្អគ្រប់ៗគ្នា។
គួរជំរាបជូនថា អ្នកគាំទ្រគណបក្សកាន់អំណាច និងអតីតគណបក្សប្រឆាំង នៅថ្ងៃអាទិត្យ ទី ០៩ មិថុនា នេះ បានជួបជុំគ្នាហូបនំបញ្ចុកតាមការគ្រោងទុក នៅតាមទីកន្លែងរៀងៗខ្លួន នៅក្នុងក្របខណ្ឌទូទាំងប្រទេស បន្ទាប់ពីការអំពាវនាវរបស់លោកនាយករដ្ឋមន្ត្រី ហ៊ុន សែន។ នេះគឺជាព្រឹត្តិការណ៍ដ៏កម្រមួយ នៅក្នុងប្រទេសកម្ពុជា។
យ៉ាងណាក៏ដោយ លោក សម រង្ស៊ី អតីតប្រធានគណបក្សប្រឆាំង ដែលកំពុងស្ថិតនៅក្នុងប្រទេសបារាំង បានចាត់ទុកព្រឹត្តិការណ៍នៅថ្ងៃនេះថា ជាជោគជ័យមួយរបស់អតីតគណបក្សប្រឆាំងរបស់លោក។ ជោគជ័យ ដោយសារតាមរយៈការជួបជុំគ្នាហូបនំបញ្ចុកនៅថ្ងៃនេះ បានធ្វើឲ្យសកម្មភាពរបស់អតីតគណបក្សប្រឆាំងនៅកម្ពុជារស់ឡើងវិញ។ បើតាមលោក សម រង្ស៊ី សកម្មជនរបស់លោកនាពេលកន្លងមក មិនហ៊ានជួបជុំគ្នានោះទេ។ ជោគជ័យមួយទៀត អតីតប្រធានគណបក្សប្រឆាំងដែលកំពុងរស់នៅដោយនិរទេសខ្លួននៅប្រទេសបារាំងរូបនេះ យល់ថា មេដឹកនាំគណបក្សកាន់អំណាចលោក ហ៊ុន សែន កំពុងរត់តាមព្រឹត្តិការណ៍របស់ខ្លួន។ បន្ថែមលើនេះ លោក សម រង្ស៊ី ដែលបានថ្លែងតាមរយៈវីដេអូស្កែបពីប្រទេសបារាំង ទៅកាន់អ្នកគាំទ្រនៅឯសហរដ្ឋអាមេរិកនៅយប់មិញនេះ បានអំពាវនាវឲ្យសកម្មជនអតីតគណបក្សប្រឆាំងរបស់លោកបន្តសកម្មភាពជួបជុំគ្នាហូបនំបញ្ចុកនេះនៅថ្ងៃស្អែក និងនៅថ្ងៃបន្តបន្ទាប់ទៀត ខណៈលោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងថា គណបក្សប្រជាជនកម្ពុជារបស់លោក នឹងបន្តសកម្មភាពហូបនំបញ្ចុកនេះដូចគ្នា អាស្រ័យលើមូលដ្ឋាននីមួយៗ។
យ៉ាងណាក៏ដោយ ទោះបីជាគេបានមើលឃើញថា នេះគឺជាព្រឹត្តិការណ៍ដែលអ្នកគាំទ្របក្សកាន់អំណាច និងអតីតគណបក្សប្រឆាំង បានហូបនំបញ្ចុកនៅចំថ្ងៃតែមួយនិងជាលើកទីមួយក្តី តែនេះមិនមែនជាសញ្ញានៃការឈានទៅរកការចរចានយោបាយនោះឡើយ។ ប្រមុខរដ្ឋាភិបាលកម្ពុជាលោក ហ៊ុន សែន បានថ្លែងកាលពីថ្ងៃទី ០៦ មិថុនាថា ការប្រកាសឲ្យប្រជាពលរដ្ឋទូទាំងប្រទេស និងគ្រប់និន្នាការនយោបាយ ចូលរួមហូបនំបញ្ចុកនៅថ្ងៃទី៩មិថុនានេះ គឺដើម្បីជំរុញការប្រើប្រាស់និងទិញផលិតផលក្នុងស្រុក ហើយក៏អាចទុកថា ជាការបង្រួបបង្រួមប្រជាជនផងដែរ។ ប៉ុន្តែ ការហូបនំបញ្ចុកនេះ មិនមែនដើម្បីឈានទៅដល់ការចរចារវាងគណបក្សកាន់អំណាច និងអតីតគណបក្សប្រឆាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ